ROOMU SOKKA 2
2
MAGANU YOO
1Ati woleho yoo yaatto manchi, ku'lite gatattori dinohe. Woleho yaatto yoo ate aanano daggannote. Hatto ikkannohu, woleho yoo yaattohu, atinni qolte hakkonne coye assatto daafiraati. 2Maganu hattoo coye assitannore qorichishasi gara ikkitinota egenninoommo.#Mat 7:1; Luq 6:37 lai. 3Hatto assitannorira yoo yitanni heedhe, insa assitannore assattohu ati manchu kayinni, Maganu yoowiinni gatattoha lawannohe? 4Woy Maganu danchumma, cincasinna dandaasi batinye mishattoni? Maganu shaqqillisinni maarote widira qolahera hede assinota diafootto? 5Aagintaawa hoogakkinninna mokkookka ikkakkinni, Maganu hanqinna halaalaancho yoo dagganno barrira hanqosi aanaho lexxatto. 6Isi mittu mittunkura loosi loosisi gede aanno.#Far 62:12 lai. 7Dancha looso jaatte loosatenni galata, ayirrinyenna ba'annokki heeshsho hasidhannorira, Maganu hegere heeshsho aannonsa. 8Uminsare calla hasidhanno haxawarrootira, halaalaancho coye facci assite agurtannoriranna bunshe hassannori aana kayinni Maganu, hanqonna aara dirrisanno. 9Balaxxe Ayihudete, aanchite dagate bunshe hassannori baalu aana qarrunna shetto dagganno. 10Ayihudeno ikkito, dagate dancha looso loossannore baala galantanninsa; ayirrinyenna keereno uyinanninsa. 11Hakku ikkannohuno, Maganu mannaho godowa hosannokkiha ikkino daafiraati.#Mar 10:17 lai.
12Muse Seeri noonsakkiha cubbo loossannori, Seeru hooginsarono ba'anno. Muse Seeri hee'reennanni cubbo loossannori kayinni, Seeru garinni qorichishantanno. 13Seera macciishshite agadhitannori Maganu albaanni keeraabbanno; macciishshite agadhitannokkiri kayinni dikeeraabbanno. 14Muse Seeri noonsakki daga kalaqaminsanni Seeru yaannore wonshitanno. Kunnira, Muse Seeri hooginsarono, kalaqamu seeri giddonsa noo daafira hasiisanno garinni heedhanno. 15Ikkitonsa Muse Seeri yaannore baala wodaninsara borreessinoonnita leellishshanno. Tii"insano farci'rannonsa; mito mito woyiteno hayi yaannonsa; mito woyite kayinni sumuu yaannonsa. 16Kuni ikkannohu ani kuleemmohu Danchu Duduwi garinni, Maganu Yesuusi Kiristoosi widoonni qole mannunnita maaxante noo hedo qorichishanno Barraati.
AYIHUDENNA MUSE SEERA
17Kuneeti ati, «Ani Ayihudete» yaattohu, Muse Seera ku'lattohu, Maganunniha ikkakkinni adawadhatto. 18Maganu hedono egennootto; Muse Seera rosootto daafira dancha coye badde afootto. 19Ati, «Ani ballootaho massagaanchoho; tunsote noorirano caabbichoho; 20egenno nookkire qajeelcheemmo; qaaqquulle rosiiseemmo» yaatto. Qolteno, Seera afakkinni wo'ma egennonna halaalu noohehu gede assite hedatto. 21Woloota rosiisattohu atenee rosiisa mayira hoogittoyya? «Moortinoonte!» yite kultanni, ati mayira moorattoyya? 22«Foortinoonte!» yaattohu, ati mayira foorattoyya? Kaphu maganna makki'ratto; galmuwansa mayira soqattoyya? 23Ati Maganu Seera adawadhattohu, Seera sa"atenni Magano mayira saalfachishattoyya? 24«Ki'nenni kainohunni Maganu su'mi dagate mereero xonamanno» yine borreessinoonnihu kunniraati.#Isa 52:5 lai. 25Seera wonshattoha ikkiro, barcimakki kaa'litannohe; Seera sa"attoha ikkiro kayinni, barcimakki barcima hoogate ledo taalote. 26Barciminokki manchi Seeru yaannore agadhiro, barcima hoogasi barciminohu gede kiirantannosi. 27Borreessinoonni Seera afidhe barcinte heedhenni Seera sa"attoha ikkiro, barcimikkinni Seera wonshanno manchi, ate aana yoo yaanno. 28Su'mu callunni Ayihude ikkinohu halaalaancho Ayihudicha di"ikkino. Illete leellanno biso mudha halaalaancho barcima di"ikkitino.#Mar 30:6 lai. 29Halaalaancho Ayihudimma wodanunnite. Halaalaancho barcimano Maganu Ayyaaninni wodanu barcimaati. Muse Seeri giddo borreessinoonni garinni barcimmannita bisu barcima di"ikkitino. Hattoo mancho Magano agurranna mannu digalatannosi.
Iliyochaguliwa sasa
ROOMU SOKKA 2: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
