ROOMU SOKKA 11
11
MAGANU MANNASI TUGE DIAGURINO
1Hanni xaano xa'meemmo'nena, Maganu mannasi tuge agurinoni? Horonta diagurino! Ani umi'ya Israeelichaho; Abirihaami sirchooti; Biiniyaami ga'reeti.#Fil 3:5 lai. 2Maganu balaxe doodhinoha mannasi tuge diagurino. Qullaawu Maxaafi Eeliyaasi daafira ma yaannoro dibuuxxinoonni? Eeliyaasi, Israeele assitinore Maganoho xissiisi're coyi'rino: 3«Mooticha'ya, himanaanokki shitino; kakkalote dargano diiggino; kune ani callu gatoommo. Aneno shitaera hassanni nooe» yiino.#1Mot 19:10,14 lai. 4Maganu ma yee dawarisi? «Ba"aali yinannihura kaphu maganira kumbuulinokkiha lamala kume manna gatisi'roommo» yiinosi.#1Mot 19:18 lai. 5Xaa yannarano eltosinni doorantinoti shiima taraare no. 6Dooramansa eltosinni ikkitannoha ikkiro, loosunni di"ikkitino yaate. Loosunni ikkoommero, elto halaalunnita di"ikkitanno.
7Xa mayi nooyya? Israeele quqquxante agadhitinoha diafidhino. Doorantinori kayinni hasidhinoha afidhino. Gattinori mokkookkitino. 8Kuni ikkinohu,
«Maganu wodanansa dilleessino.
Kunnira, illetenni la'annota ikkinnina diaffanno;
maccatenni macciishshitannota ikkinnina dibuuxxanno» yine borreessinoonni gedeeti.#Mar 29:4; Isa 29:10 lai.
9Daawitino,
«Hurbaatinsa bagado ikkonsa;
kakkalote sagale huntannonsata ikkito.
10Illensa tunsito;
wo'manka woyite hallinsa ukko»
yiino.#Far 69:22-23 lai.
11Hanni galagale xa'meemmo'nena, Ayihude gufidhinohu co'onta ba'araatini? Dee'ni! Ayihude cubbo loossino daafira, gato dagate iillitino. Kuni coyi Israeele hinaassanno gede assino. 12Ayihude assitino sao gobbate lowo maasso abbitino. Baonsa qolte dagate maasso ikkitino. Ayihude wo'ma gattoommero, maasso lowo geeshsha batidhannoti ba'ino.
DAGATE GATO
13Xa coyi'reemmohu ki'ne dagateeti. Ki'ne soqqamaasincho ikka'yanni, soqqansho'yanni lowo ayirrinyi leellannoe. 14Hatto asseemmohu, fiixa'ya Ayihude hinaasiisatenna insa giddonni mito mito gatisate yeeti. 15Maganu insa tugi yannara, alame Maganu ledo araarantino. Maganu insa adhanno woyite mayi kalaqamannoha lawanno'ne? Hatti, reyotenni ka"ate gedeeti yaate! 16Liisamete giddonni umiti qullaawa ikkituro, hakkunni ka'itino qullaawate. Mitte haqqicho rumushshi qullaawa ikkiro, sinnano qullaawa ikkitanno.
17Gate kaansoonni ejersi sinna muranteenna, dubbu ejersi sinna darga amaddino. Ki'ne daga dubbu ejersi gedeereeti. Kune Ayihudetewiinni afidhinanni maasso qiniite ikkitino'ne. 18Kunnira, ki'ne daga, murantino sinna qacifattinoonte. Hatto ikkitinanniha ikkiro, duhanno'nehu rumushshoho ikkinnina, dukkinanniri ki'ne ikkitinoonnikkita affe. 19Ki'ne, «Sinna murantinohu ninke dargansa amandeemmo gedeeti» yitinanniha ikkanno. 20Yaa'ne halaaleho. Ikkollana insa murantinohu amma'na hoogansaraati; ki'ne dargaho heedhinoonnihu ammana'nenniiti. Kunnira waajje ikkinnina naaxxitinoonte! 21Maganu kalaqamu sinna mararannokkiha ikkiro, ki'neno dimararanno'ne.
22Hanni Maganu shaqqillenna kaajjille la'e! Kaajjillisi ubbinori aanaati. Shaqqillisi kayinni ki'ne kaajjitine heedhinanniriraati. Kaajjitine hee'ra hoogginiro kayinni ki'neno murantinanni. 23Ayihudeno amma'na hoogansawiinni agurte higguro, galagalte dargansa higganno. Maganu albi dargira qolansara dandaanno. 24Kalaqamunni dubbu ejersi sinna ikkitinoonniri ki'ne Daga, darga'ne ikkinokkiha gati ejersi darga amaddinanni gede assini'neha ikkiro, gati ejersi sinna ikkitino Ayihude albi darginsara qola lowo geeshsha di"injiitanno?
MAGANU MAARO WO'MUNKUTE
25Roduuwa'ya, egennaamma ikkitinoonniha lawoonke'ne. Mitto go'le noo halaale kuleemmo'ne: Hakkuno, Israeelete mokkookka wo'mu woyitita ikkitukkinni, wo'ma Daga Maganunniwa dagga geeshshaati. 26Israeele baala gattannohu kunni garinniiti. Kunnira,
«Gatisaanchu Tsiyooninni daanno;
Yaiqoobi sirchiwiinni cubbo hunanno.#Isa 59:20 lai.
27Cubbonsa huneemmo yannara,
insa ledo e"eemmo gondoori konneeti» yine borreessinoonni.#Isa 59:20-21; 27:9 lai.
28Israeele Dancha Duduwo adha hoogansanni Maganoho diina ikkitino. Hakku coyi ki'ne Dagate qiniite ikkino'ne. Doorshu garinni ikkiro kayinni, albi annuwa widoonni qole Maganu baxannonsareeti. 29Maganu doorihunna eltosi uyihu gedensaanni assino coyira digaabbanno. 30Ki'ne Daga, alba Maganoho dihajajantinannireeti; xa kayinni Ayihude hajajama hoogginohunni ki'ne Maganu maaro afidhinoonni. 31Ki'ne maaro afidhinoonni garinni insano maaro afi'rate, xa Maganoho hajajantannokkire ikkite no. 32Maganu manna baalaho maarosi aara yee, manna baala hajajama giwate usuranya assino.
MAGANOHO UYINOONNI GALATA
33Maganu jiro, hayyosinna egennosi dandiinannikkite!
Yoosino fonqollannikkite;
doogosino anfannikkite.#Isa 55:8 lai.
34Kaaliiqi hedo afannohu ayeti?
Isira mala aannosihu nooni?#Isa 40:13; 55:8 lai.
35Maganoho liqiissannohunna,
iso asale yaa'nannohu nooni?#Iyo 41:11 lai.
36Baalunkuri isiwiinniiti, isinniiti, isiraati.
Isira hegere ayirrinyi iillosi!
Hamii'ni!#1Qor 8:6 lai.
Iliyochaguliwa sasa
ROOMU SOKKA 11: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
