SOQQAMAASINETE LOOSO 26
26
PHAAWULOOSI AGIRIPHA ALBAANNI COYI'RINO COYE
1Agiripha Phaawuloosi, «Umikkire ku'latto gede malloonnihe» yiisi. Phaawuloosino anga wixanni aanisinni coye hoo'lanno gede, 2«Moote'ya, Ayihudootu bushiishshinoe coyira aani'yanni coye hoo'late ate albira shiqa'yara lowo geeshsha hagiidhoommo. 3Ati Ayihudete seeranna amanyoote seekkite afoottona, cincatenni macciishshattoe gede huucci'reemmohe.
4«Anje'yanni kayise xaa geeshsha hiitto ikke hee'roommoro Ayihudootu egentino. Hundinni kayise xaa geeshsha gosa'ya giddonna Yerusaalamete hee'reemmo gara affino. 5Qolteno farcidhannoha ikkoommero, amma'nonkera lowo geeshsha xissiisi'reemmo Farisicha ikkoommota bi'renni egentino.#Soq 23:6; Fil 3:5 lai. 6Xa kayinni konne yoote albaanni uurroommohu, Maganu annuwankera uyino gondoori hexxo daafiraati. 7Kunni hagiirriwa iillate tonaa lamenti ga'renke Magano hashshanna barra magansidhanni agadhite no. Moote'ya! Ayihudootu bushiishshannoehu kunniraati. 8Maganu reyitinore kayisannota ki'ne mayira ammana hooggini? 9Ani umi'ya Naaziretennihu Yesuusi su'ma danduummo deerrinni giweemmo yee hedoommo. 10Yerusaalamete assoommohuno konneeti. Qeesootu roorrooti uyitinoe roorrenni lowo ammanaasine usurantanno gede assoommo. Shini woyiteno shituri ledo mala xaadoommo. 11Lowo yanna xaadu minna ha'ranni qorichinshanninsa gedenna insano Mooticha xontanno gede assoommo. Lowo geeshsha giirame, wole katamma nafa ha'ranni insa xiiwoommo.
PHAAWULOOSI MAGANUNNIWA HIGINO GARA KULI
(Soq 9:1-19; 22:6-16)
12«Kunni daafira qeesootu roorrootiwiinni roorrenna hajajo adhe Demaasiqo ha'roommo. 13Moote'ya, ha'ranni hee're barru taalootira arrishshote xawaabba roorino xawaabbi anenna ledo'ya noo manni gaangaawira xawanna afoommo. 14Baalunku baattote aana umbe hee'neenna Ayihudete afiinni, ‹Saawuli, Saawuli, mayira xiiwattoe? Gatima kadittoro umikkira bushshannohe› yaanno qaale macciishshoommo. 15Anino, ‹Mooticha'ya ati ayeti?› yoommo.
«Mootichuno, ‹Xiiwattoehu ani Yesuusaati. 16Xa ka'e gotti yite uurri. Ani atera leelloommohu, xa afittonna kunni ka'ano leelleemmohe coyira soqqamaanchonna naqaashshe ikkattoe gede shoomammoheraati. 17Israeeletenna xa soyemmohe daga anganni gatiseemmohe. 18Illensa fanattonna tunsichunni xawaabba fushshattonsara, Sheexaanu gashshooti giddonni Maganunniwa qolattonsa gede asseemmohe. Insa ane ammanansanni cubbu maaro afidhanno; doorantinori ledono iqqa adhitanno.›
PHAAWULOOSI AYIHUDETENNA DAGATE FARCI'RI
19«Moote'ya Agiripha, tenne gordunni daggino ajuujara hajajama digiwoommo. 20Kunnira, umo asse Demaasiqote noo manna qoleno Yerusaalametenna Yihudu gobbara noorenna daga aagintaabbe Maganunniwa higganno gede rosiisoommo. Aagintaawansa leellishanno coyeno assitanno gede rosiisoommonsa.#Soq 9:20,28-29 lai. 21Kunninni kainohunni Ayihude Qullaawa Mine amadde shitaera ka'ino. 22Xaa geeshsha kayinni Maganu kaa'lanni nooe; kunnira aju akkalira farci'ranni konne uurre noommo. Himanaanonna Muse ikkanno yitinore agurranna wolere dicoyi'roommo. 23Insa, ‹Kiristoosi qarra adhanno; umiha ikke reyotenni ka"atennino Israeeletenna dagate xawaabba leellishanno› yitino» yii.#Isa 42:6; 49:6; 1Qor 15:20 lai. 24Phaawuloosi konne coye coyi'ranni hee'reenna Fisxoosi, «Phaawuloosi, xa sayisitto; lowore rosakki macharaarsitinohe!» yii. 25Phaawuloosi qole, «Ayirrado Fisxoosi! Halaalenna taalo coyella coyi'roommo ikkinnina dimacharaaroommo. 26Moote konne coye seekke egennino daafira, isira coyi'reemmo. Maanxe assinoonni coyi nookki daafira, mittuno go'lannosi coyi hee'rannokkita afoommo. 27Moote Agiripha! Himanaano borreessitino coye diammanatto? Ammanattota afoommo» yii.
28Agiriphano Phaawuloosi, «Ati tenne shiima yanna giddo ammanaasincho assattoeraatinso?» yii.
29Phaawuloosino, «Harancho woy seeda yanna giddono ikkiro ate calla ikkittokkinni techo coye'ya macciishshituri baalu usurama'ya agurranna ane gede ikkitara Magano huucci'reemmo» yii.
30Hakkunni gedensaanni moote, gashshaanchunna Beriniqe ledonsa ofolle noo manni baalu ledo gotti yee kai. 31Hakkiichinni fulte hadhanni mimmitoho, «Kuni manchi mittono reyote iillishanno coye diassino» yitu.
32Agiriphano Fisxoosira, «Kuni manchi ‹Coye'ya jawu Roomu mootewa sayisse"e› yaa hoogoommero tidhamannohu baino» yii.
Iliyochaguliwa sasa
SOQQAMAASINETE LOOSO 26: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
