SOQQAMAASINETE LOOSO 16
16
XIMOOTEWOOSI PHAAWULOOSINNA SILAASINNI XAADI
1Phaawuloosi Darbenna Lisxira ha'ri. Lisxiraho mittu Ximootewoosi yinanni ammanaanchi no. Amasi Ayihudittete; ikkirono Magano amma'nitinote. Annisi kayinni Giriikichaho. 2Lisxirahonna Iqooniyaho noo roduuwi Ximootewoosi danchumma coyidhanno. 3Phaawuloosi Ximootewoosi ledosi adhe ha'rara hasi'rinohura barcimanno gede assi. Hatto assinohu hakko heedhanno Ayihude Ximootewoosi anni Giriikicha ikkinota affinohuraati. 4Phaawuloosinna Silaasi katamma baalate giddoonni sa'anni ammanaanote, Yerusaalamete noo soqqamaasineranna cimeeyyete, songo coyidhe wortino seera rosiisse agadhitanno gede seekkite kultunsa. 5Kunni garinni ammanaanote mittimma jawaattu. Kiironsano barru barrunni lexxitu.
PHAAWULOOSI MEQEDOONIYU DAAFIRA AFINO AJUUJA
6Phaawuloosinna Silaasi Issiyaho qaale kultannokki gede Qullaawu Ayyaani hoolinsa. Kunni daafira Firigiyunna Galatiyu gobba widoonni higge sa'u. 7Miisiyu danna iillituta Biitaaniya hadhara heddino. Ikkollana Yesuusi Ayyaani hakkiira hadhannota hoolinsa. 8Kunni daafira Miisiyu widoonni higge Xiroaada dirritu. 9Hashsha mittu Meqedooniyu manchi kae uurre, «Meqedooniya dagge kaa'linke!» yee huucci'ranna Phaawuloosi ajuujate afi. 10Phaawuloosi ajuuja afihu gedensaanni, hakkawoyintenni Meqedooniya ha'ra hasi'nummo. Tenne hendoommohuno, Meqedooniyu mannira qaale kullammora Maganu woshshinonketa ammannoommohuraati.
LIIDIYA KIRISTOOSA AMMANTU
11Xiroaadunni yowolote ofolline Samotiraaqe marrummo. Hakkiinni layinki soodo Naaphule ha'nummo. 12Hakkiinni ka'ne Filiphisiyusi yinanniwa iillinummo. Filiphisiyusi Meqedooniyu gobbara jawa katamaati; kuni katami Roomu gashshooti anga nooho. Hakkiicho shiima barra keeshshinummo. 13Fooliishshote Barra huuccattote gamba yinanniwa katamaho gobbaanni noo wayi gamira marrummo. Hakko ofolline gamba yee noo meentira hasaambummo. 14Macciishshanni noo meenti giddo Liidiya yinanniti Tiyaxirooni Katamira duume uddano daddaltanno mancho no. Ise Magano magansidhannote. Maganu wodanase faneenna Phaawuloosi coyi'ranno coye macciishshitu. 15Isenna minese noo manni baalu cuuamihu gedensaanni, «Mooticha ammana'ya affinoonniha ikkiro, amme mini'yara e'ine ofolle» yite lowo geeshsha huuccitunke.
PHAAWULOOSINNA SILAASI FILIPHISIYUSI USURANTU
16Mitto barra huuccattote dargira ha'nanni hee'ne, albillitte ikkara noore kiilunni kulanno ayyaana afidhinotenni mitte seemo soqqamaanchonni xaandummo. Tini beetto biillasera kiilunni lowo woxe gamba assitanno. 17Ise ninke faana hadhanni, «Kuni manni Wo'munkura Aliidi Magani soqqamaanooti; insa gatote doogo kultannoreeti» yitanni cancite coyidhu. 18Kunni garinni lowo barra marro marro higge coyidhu. Kunnira Phaawuloosi hanqe caaqqi yee lae konne ayyaana, «Yesuusi Kiristoosi su'minni tenne beetto giddonni fulatto gede hajajeemmohe!» yii. Bushu ayyaanino hakkawoyintenni fule bai. 19Beettote biilla abbitannonsa woxi bainsata affe, Phaawuloosinna Silaasi amadde goshooshshanni gudumaale massite roorrootunniwa shiqishshunsa. 20Roomu roorrootiwa massite, «Kuni manni Ayihudete. Kataminkera qarra kalaqqanni no. 21Ninke Roomu manni adhineemmokkihanna assineemmokki coye rosiissanni no» yitu. 22Kunnira mannu Phaawuloosinna Silaasi gawajjara kai. Roorrootuno Phaawuloosiuu uddanonsa mulqine gannanni gede hajajju. 23Lowo geeshsha gantunsahu gedensaanni usuru minira eessite, agaraanchu seekke agaranno gede kultu. 24Agaraanchu kulloonnita macciishshe insa usuru mine giddoyidi golira masse lekkansa biqe haqqaho usuri.
25Hashshu taalootira Phaawuloosinna Silaasi huuccattotenninna faarsotenni Magano galaxxitanna, wolu usuranyino macciishshi. 26Hakko mereero hedeweelcho baatto shafanteenna, usuru mini tenqe yii. Cufanna baala mitteenni fa'nantu. Usuranyu baalunku cagaageno tatta'u. 27Agaraanchu baqqi yaanno woyite, usuru mini fa'name nooha afe, usuranyu fule bainoha laweennasi, isonoo shaara bise fushshi'ri. 28Phaawuloosi kayinni, «Ninke baalunku konne hee'noommona umokki galaaffattooti!» yee qoonqosi naggi asse coyi'ri. 29Agaraanchuno caabbicho abbisiisi're dodanni giddora e"e, qece yee huxi'ranni Phaawuloosinna Silaasi albaanni diriire uwi. 30Insa gobbara fushshe, «Mootoolle'ya, gateemmo gede ma asso?» yii.
31Insano, «Atino minikki mannino gattinannina, Mooticha Yesuusa ammani» yitusi. 32Mootichu qaale isiranna minesi noo manni baalaho kultu. 33Hakko hashshanni usuru mini agaraanchi insa minisira masse madansa hayishshi. Isinna minisi manni hakkawoyintenni cuuantu. 34Hakkunni gedensaanni Phaawuloosiranna Silaasira ittannore uyinsa. Usuru mini agaraanchi minisi manni ledo Magano amma'nino daafira hagiidhi.
35Soodita gashshaano, «Hakkonne manna tirre» yite gaaddo sokku. 36Usuru mini agaraanchino Phaawuloosira, «Roorrootu ki'ne ‹Tirre hadhona› yite manna sokkinona, keerunni mini'nera hadhe!» yiinsa.
37Phaawuloosi kayinni, «Ninke Roomu gosa ikkine hee'neennanni, doogimale gudumaaleho gante halaale beeshshite usurtinonke. Xa kayinni badheenni tirtannonke? Di"ikkannona, insa dagge fushshitonke» yii. 38Gaaddono konne coye roorrootaho marte kultuta, roorrootu Phaawuloosinna Silaasi Roomu manna ikkitinota affe, lowo geeshsha waajjitu. 39Insano hakkawoyintenni dagge, konne coye sa'annonsa gede huuccidhe usuru mininni fushshitunsa. Katamunnino fulte hadhanno gede huuccidhunsa. 40Phaawuloosinna Silaasi kayinni usuru mininni fulte Liidiya minira martu. Hakkiicho roduuwunni xaadde jawaachishshunsahu gedensaanni, fulte hadhu.
Iliyochaguliwa sasa
SOQQAMAASINETE LOOSO 16: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014
