UMI QORONTOOSI 4
4
SOQQAMAASINETE SOQQANSHO
1Mannu ninke Kiristoosi soqqamaanonna go'le nooha Maganu coye mannaho xawinse kulleemmore asse hedankera hasiisanno. 2Hatto ikkiro, Maganu Mini soqqanshora hendoonniri ammanantinore ikka hasiisannonsa. 3Ki'newano ikko wolewa ane aana yoo yiniro, anera mitiimma dinoe. Ani umi'ya aana yoo diyeemmo. 4Anera giddo'ya keeraanchote; hatti kayinni ane fayyaaleessa diassitannoe. Ane aana yoo yaa dandaannohu Mooticha Yesuusaati. 5Kunnira, Mootichu Yesuusi yoo yaara daa geeshsha, aye aanano yoo yitinoonte. Isi daanno woyite, tunsote go'le noore haa're xawo fushshanno; mannu wodani giddo nooreno reqecci assanno. Hakka waro, Maganu baalanka gari garisinni jajanno.
6Roduuwa'ya, ki'ne kaa'lammora yee aneneenna Aphiloosi lawishsha asse shiqishoommo. Hatto assoommohuno, «Borreessine worroonnihunni sa'ooti» yinoonni coye ninkewiinni rossinara yeeti. Kunnira, mito minshe mito adawadha dihasiissanno. 7Ati wolu mannira aliidiha assinohehu ayeti? Noohere baala uyinohehu Magano di"ikkino? Uyinoonnisikkihu gede ikkite umokki mayira bokkeessattoyya?
8Xaa woyite hasiisino'nere baala afidhinoonni! Ninke agurtine ki'ne calluwi'ne mookkinoonni; ninkeno ledo amaddine mookkinoommero danchu baino. 9Maganu ninke soqqamaasine reyote yoo yinoonni mannira aanche uurrisinonkeha lawannoe. Kalqe baala, sokkaasinenna mannu duuchu daa"atannonke gede assinonke. 10Ninke Kiristoosira yine gowwinoommo. Ki'ne kayinni Kiristoosinni busulootaho. Ninke wolqiweelootaho; ki'ne kayinni wolqaataammaho. Ki'ne ayirrinsoonnireeti; ninke kayinni minshoonnireeti. 11Kune xaa geeshsha hudi'nanninna goo'riinanni hee'noommo; kalline hee'noommo; gannoonninke; hingeemmowa hoongoommo. 12Angankenni daafurre loosi'neemmo. Rummanninke woyite, maassi'neemmo; xiimbanninke woyite, cincineemmo. 13Xonnanninke woyite, owaatu qaalinni coyi'neemmo. Xaa geeshsha tenne gobbara ishinu gede kiirammoommo; tunge hunnannirichi gede ikkinoommo.
14Tenne sokka borreessoommo'nehu, saalfachishammo'nera ikkikkinni, ooso'ya baxeemmote gede asse seejjammo'nera hasi'reeti. 15Yesuusinni lossitanno'neri tonnu kumi manni hee'ri'nerono, lowo annuwa dino'ne. Ani kayinni Danchu Duduwi Kiristoosi Yesuusihunni anna ikkoommo'ne. 16Kunnira, ane labbinanni gede huucci'reemmo'ne. 17Baxeemmohanna Mootichaho ammanaminoha beetto'ya Ximootewoosi soommo'nehu kunniraati. Wo'mankawa beetekiristaane baalate rosiisoommo coyi ledo xaaddannota Kiristoosi Yesuusinni hee'roommo heeshsho qaagiissanno'ne.
18Mitu mitu ki'newa dayemmokkiha laweenna'ne boo'natenni ufuufantinoonni. 19Ikkollana, Mootichu yiiro rahe ki'newa dayemmo. Hakka woyite, hatte boonaleeyye coyidhanno coye calla ikkikkinni, wolqansano afeemmo. 20Maganu Gashshooti diafuunniitina, Maganu wolqanniiti. 21Maricho doodhitinanni? Gannanni siqqichonni dayo'nenso, baxillunninna shaqqillunni dayo'ne?
Iliyochaguliwa sasa
UMI QORONTOOSI 4: QulMax
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© The Bible Society of Ethiopia; Sidama Holy Bible BSE-UBS 262 P 2014