Gɛlatiyaa 5
5
Yaaka Sinɛ Laŋɛɛ Kereseek
1Boŋkukan tin Kerese yaakaata kɛnɔ beeɗii yaakat. Nɛɓɔ in ɛtɛɛ a ɓaŋkawuŋ. Kat kɔnu lowɛɛ toloy laaŋoyoŋk kɛkar.
2Dɛnooko, eet Paawuloos tona kɔna sini. Ɔkɔn toniir kɛ ɗɛyɛ tina yayawuŋ, nɛ kɛɛ any sinɔ kɔna kɔnyku Keresek. 3Rɔɔrɔkaaka kɔna kɛkar iinak baŋɛ. Ɔkɔn ɗɛyɛɛr a kɔnu yayawɛɛŋ nɛkɔna ɗɛyɛ a koorɛɛr higi baŋɛ. 4Iinak sigɛ ɗɛyɛɛr a mentankari goy higiyoŋk baŋɛk. Pakatiirkan ɛɛk Kereseeŋ. Ɗiirarkɔɔkan wookaan nɛɛkɛŋ. 5Yakana seek kookorii mentanka ŋaadiyɛɛkoŋk goy Wɛɛŋa sigɔ Geetitaanakik a ŋaadiyɛɛkɛ. 6Ɔkɔn ijaagɗikari a Yeese Keresee agut omoŋ, kɛygun yayawiikaayɛɛŋ kɛygun kiikaayɛ yayawiitiŋ ki kɔnyɗiit. Ma kɔnyɗi ŋaadiyɛ sigɛ yaaŋɛɛ mɛyink.
7Reerirkɔɔkɔ a mentan mɛlɛɛɗa sisɔwa. Anɛ kɔnu sisɔ ɓaarɗi wooɗ kɛnɔ kirɗɔ tiiɗit eekeeraak? 8Mokokan mɛlki taɓi sini Waakoyote sinaanɛkan kɔnu riyk. 9Irso sinɔ balaaŋɔŋk ari malɛytan nɛɛk a gupuuye baŋɛ. 10Yakana ŋaadiɗika Suumii eekeerɛ kɛ kiir boŋiiɗ rɔɔriyɔn om sinaanɛkan kɔnu rɔɔriyɗaak, kɛygun wooɗ sinɛ kɔnu ari a kiir ɗegerɔɔn kɛ ariir jikonk boŋukoy pirdi nɛɛkiŋ.
11Iinak manyaakak eeta sigɛ dooytaanakik, ɔkɔnkan rɔɔririyika mɛlɛɛɗa sisɔwa kɛ ɗɛyɛ a yayawiikɛɛŋ, nɛ guntu epapaygiɗɛ jikon? Ɔkɔnkan ɓɛɛlɛ oko sinikiŋ, gunkan dakɛ laalawutan Kereseek a gaŋtan joopa. 12Seedi son joop sigɛ kɔnu ooɗɛrk ɔkɔn ɗɛyɛrŋ in sɛɛg yayawurɛɛ kɛ pat ma moko yawɛ dakɛɗa.
13Iinak manyaakak eeta sigɛ dooytaanakik, riykɛɛkan kɔnu yaakaata. Yakana in iɗit omaay ijaagɗi mɛŋka mɛyin ma kat ariir yaaka sini noŋk a dusanɛrɗɔ ɗɛyan taaroŋk. 14Agut sinɔ dusanɛɛɗɛɛ higiyɛ baŋɛ higii sinɔɔnɛ omoŋɔŋk sinɔɔnɛ tonu kɛ, "Poru iɗit sinɛ beeɗiir jɔkikentik oko sinɛ poriiɗin ɛɛk nookuk." 15Yakana ɔkɔn kakawikari ɛ ɗaɗamari ɛkan goŋkuŋ, nɛ in koorɛɛ ɛɛk a kat babadariɗ.
Wɛɛŋa Sigɔ Geetitaanakik A Taar
16Tona kɔna kɛ inɓɔ sisɔ beeɗɛɛ Wɛɛŋakɛ sigɔɔgɛ Geetitaanakik. Ma kat dusanɛɛ ɗɛyan taaroŋk. 17Ɗɛyɛ taar any sinɔ kir ɗɛyɛ Wɛɛŋa sigɔ Geetitaanakik, maɓɔrɛ Wɛɛŋa sigɔ Geetitaanakik ɗɛyɛr any sinɔ ki ɗɛyɛ taark. Nɛ sigi ɗaaki ɛkanɛɛkɛ gɛŋk, nɛ agut sini kiir ijaagɛ any sinɛ ɗɛyɛɛrik. 18Yakana ɔkɔn kɔnu diiler Wɛɛŋa sigɔ Geetitaanakikiŋ, kikɔɔ kɔnu ɓaliiɗ higii.
19Ɗegerɛɛ ijaaga taaroŋkuŋ. Sɛɛg ruunyikeen, somikeen, molkotɔn, 20ugumeet raŋaawotaak, tɔrkiyɔn, gumakikeen, ɗaakan, nyeken, goopan, pori ɛɛkoŋk, pakakat, giiman, 21ŋɔɗɔkikeen anta etoŋk, tɔpɔy, duubiyeet sinɔ ŋɛɛwɛnŋɔŋk sɛɛg sigɔ ito sigik. Rɔɔrɔkaaka kɔna sisɔ kɛkar oko sinɛkan kɔna rɔɔrɔkaaɗa jeemɛk. Joop sigɛ ijaagir ola sigik kirkoy moonɛɛt burɛ Waakoyotoŋk. 22Mayakana taamɛ Wɛɛŋa sigɔ Geetitaanakik mɛyin, yaaka ɓayaayoŋk, bɔdɛ, ɓaŋkawurɔn oolaanik, mentanka ɓayaayoŋk, mentanka, ŋaadiyɛ, 23rikiteet ɛɛkoŋk, ɓali ɛɛkoŋk. Kɛɛ higi sinɔ ɓaari olaatɛ sigɔɔgɛ ito sigik. 24Joop sigɛ atu Yeese Kereseek ɓokoturɓa taar a ijaag nɛɛk a ɗɛyan nɛɛk sinɔ ŋɛɛwɛnŋɔŋkuŋ.
25Ɔkɔn beeɗii wɛɛŋakɛɛŋ, nɛ in ɓɔrɛ tina ikekeɓi Wɛɛŋa sigɔ Geetitaanakik. 26Kat ŋaaŋaarii raŋana ɛ arii nyeken ɛkanɛɛkɛ gaŋk nɔ merii ɛɛk kanysɛya.
Iliyochaguliwa sasa
Gɛlatiyaa 5: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia