Ijaag Wosɛytaanakoŋk 8
8
Sɔɔkɛ Saaol Dooytaanak
1Doomɛɓa Saaol kɛnɔ ɓokotɛɛ Istipaanoos. Waawuy sinaanɛɓa rɛrɗi Istipaanoosuk, ŋaarkiɓa epaayan sinɔ obiiŋɔŋk dooytaanakɛ sigaagɛ atu Yorsaleemek. Wosɛytaanakɛ sɔgɔɔsɔyk kɛɛtiɗiiɓa ŋaadtaana baŋɛ ɗooka Yuudaak a ɗooka Sɛmaariyaak. 2Joop Waakoyotoŋk kɔwarɓa Istipaanoosuŋ, nɛɓa wuɗaa a ooyɛr a ɗooruŋ. 3Maɓa Saaol ɗɛyɛ sɔɔkɛɛta dooytaanak jɛt. Nɛɓa guuguny godeyika Sambatɛyɛkoŋk nɛ pururutku ŋaadtaanak sigɛ moojakik a sigɛ peetakik walasa nɛ gaɓɛ sɛɛg godeya korkoɗɔɔnoŋk.
Waasɛɛ Pɛɛni Sinɔ Ɓɛlkɛɛstank Sɛmaariyaake
4Ŋaadtaanak sigɛɓa kɛɛtiɗiik waasɛrɓa pɛɛni Waakoyotoŋk saagiyakɛɓa kaargeeɗik baŋɛ. 5Kɛɛɓa Pilipoos katamɛya Sɛmaariyaak nɛɓa tonɗi joopa gɛɛna agut Keresee. 6Saaɓa joop gɛɛnɛ tiyɛrɗi any sinɛɓa tonu Pilipoosuk ɛ saaɓa dɛnɛrɗi sɔɔriyɛ sigɛ ijaag sɛɛgik, nɛɓa geleewɛrgeeɗ kɛ ɗɔm agut omoŋ. 7Ŋaararkiɓa wɛɛŋa sigɔ somkaanakik joope a ɓɔɔkaaŋ a duriyer a ɗooruŋ. Bɔdɛrkiɓa nyɔŋtaanak a joop sigɔ kamarŋɔŋk a ɓɔɔkaaŋ. 8Agut sini lakɛɓa katamɛɛ sinaanɛ yaaka sinɔ obiiŋɔŋk.
9Lakɛɓa saadi iɗit sinɔ riyɛ kɛ Simionuk sinɔɓa ijaag ŋɛyikeen katamɛɛ nɛɛkɛ takik. Nɛɓa ijajag joop Sɛmaariyaak a reemɗi ɓayɛtun gɛŋk nɛɓa toton kɛ, "Eet iɗit sinɔ obiiŋɔŋk." 10Joop sigɛ boobɛrk a sigɛ balaatuk baŋɛ geleewɛrgeeɗɓa a tonur kɛ, "Ege iɗit sini ɓaŋkawuka Waakoyotoŋk sinɔ tonɛɛ kɛ Obiiŋɔŋk." 11Nɛɓa nomɛrɗi joop gɛɛnɛ, agut sinɔɓa ariiɗ sɛɛg ŋɛyikent a reemɗi ɓayɛtun gɛŋkik aɓa tukiɗiik ɗeeŋk. 12Yakana sisɔ tonuɓa Pilipoos joopa Pɛɛni sini Ɓɛlkɛɛstank agut burɛ Waakoyotoŋk a tiriya Yeeseek, nɛɓa moojak a jartiyatɔk ŋaadiɗi nɛ aadɛɛ sɛɛgiŋ. 13Ŋaadiɗiiɓa aasi ɓɔrɛ Simion nɔɓa aadɛɛ nɛɓa nomɛ Pilipoose. Dɛnɛɓa ola sigɔ reemɗi ɓayɛk a sɔɔriyɛ sigɛɓa ijaag Pilipoosuk, nɛɓa reemɗi ɓayɛ nɛɛkɛŋ.
14Tiyɛrɓa nomtaana sigɛɓa atu Yorsaleemek kɛ boŋurnɔ joop Sɛmaariyaak pɛɛni Waakoyotoŋkuŋ, nɛɓa wosɛyɛr Petros a Yowanis Sɛmaariyaaka. 15Nɛɓa kaar Petros a Yowanis nɛ ɗanɗama kɛnɔ joop Sɛmaariyaak boŋur Wɛɛŋa sigɔ Geetitaanakik, 16agut sinɔ inɓa kirki sɛɛga worworiit Wɛɛŋa sigɔ Geetitaanakik eta sinɔɔna omoŋɔŋk. Joop sigɛ aadɛɛɓa sɛɛg tiriyaakɛ Yeeseek dakɛɗa. 17Saaɓa riiɓerɗi Petros a Yowanis sɛɛge arin raŋk, nɛɓa joop gɛɛnɛ boŋur Wɛɛŋa sigɔ Geetitaanakik.
18Saaɓa Simion dɛnɛɛɗ wosɛytaanak saa riiɓerɗi sɛɛge arin gɛŋk raŋk a gaɓɛ Waakoyot Wɛɛŋa sigɔ Geetitaanakik joopak, nɛɓa ɗɔku sɛɛga wori nɛ tonu kɛ, 19"Inta gaɓɛɛ ɓaŋkawuka sini kɛnɔ ɓɔra riiɓa ari ete raŋk nɔ boŋu Wɛɛŋa sigɔ Geetitaanakik!"
20Yakanaɓa Petros tongeeɗ kɛ, "Badik, iin a wori nook agut omoŋ, agut sinɔkɔ ɗɛyɛɛɗin ɓaliiɗa tigi Waakoyotoŋk woriik! 21Kin seŋk gayɛ anta sineena, agut sinɔ kiiɗi ɓayɛ nookɛ mentanka taamɛkɛ Waakoyotoŋkuk. 22Sisɔ weeraka Waakoyota tikiyɛɛkɛ sigeege goonɛ nɔ ɗanɗamaakin Sɛɛna, kaɗɛɛŋkɔɔ ŋɔɗurune koɓi ɓayɛ nookkuŋ. 23Agut sinɔ dɛna a enyaakin any sinɔ ɓaayŋɔŋk a kɔnu korkoɗar tikiyɛ."
24Nɛɓa Simion tonu sɛɛga kɛ, "Inta ɗanɗamaakɛ sɔɔk Waakoyota kɛnɔ kat laŋka any sinɔ omoŋɔŋk olaatɛ sigaagɛkɔ toniirik."
25Waasɛrɓa Petros a Yowanis pɛɛni Waakoyotoŋkuk baŋiya, nɛɓa weeri Yorsaleema a waawasar Pɛɛni sinɔ Ɓɛlkɛɛstank mɛndɛrakɛ Sɛmaariyaak raŋan.
Aadi Pilipoos Iɗit Itiyopiyaak
26Nɛɓa tonu wosɛytan Waakoyotoŋk Pilipoosa kɛ, "Ŋaari ɗooka gɔɔta sineena ɗiɗikaak, gopɛ sinaanɛ paaton sinɛ ŋaar Yorsaleeme Gaajakaak." 27Nɛɓa sɛŋk ŋaar raŋana nɛ kɛɛŋ.
Dɛnko, lakɛɓa iɗit om Itiyopiyaak sinɔ kɛɛ Yorsaleema kɛnɔ kɛɛ ugume Waakoyotak. Iɗit sini lakɓa ɓaŋkawuka ɛ sɛɛn ɔɗɔwen wori suumi Itiyopiyaak sinɔ jartik sinɔ riyɛ kɛ Hindɛkeek. 28Weeriikiɓa nyaka nɛɛkaak a beeɗ gaariye raŋk, nɛ ambabɛ wargatɛ iɗit pɛrkaakoŋk Isaayasik.
29Nɛɓa Wɛɛŋa sigɔ Geetitaanakik tonur Pilipoosa kɛ, "Widar ɛɛk gaariya sinɔɔna nɔ koyowɛɛrɗ."
30Nɛɓa Pilipoos reeriir gaariya nɛɛka nɛ tiyɛ a ambabɛ iɗit sinɛ Wargatɛ iɗit pɛrkaakoŋk Isaayasik, nɛ tongeeɗ kɛ, "Mɛlɛna any sinɛ ambabunkuŋ?"
31Nɛɓa jumurgeeɗ kɛ, "Mɛlɛta ɛk ma kɛɛ iɗit sinɔtu kɔnyɛɛɗik?"
Nɛ tonu Pilipoosa kɛ, "Teeŋa gaariya nɛɛka nɔ beeɗii a eet agut omoŋ." 32Nyon sinɛɓa ambabɛ iɗit sinɛ Wargatɛɛ Waakoyotoŋkuk sinɔ tonu kɛ,
"Itoɓa jiŋkuy sinɔ diilɛɛ ŋɔɔlɛtaak.
Ɛ ito jiŋkuy sinɔ tɛmŋɔŋk sinɔ pɛtɛɛ ami gɛɛŋk nɛ ki nayɛk.
Kiɓa ɓuukɛ ato nɛɛk toniiɗa,
ma dakɛ kɛ manyk.
33Daraayɛɛɓaŋ kiigiɗɛɓa gaamit wooran sinɔ mentanŋɔŋk.
Wooɗ sinɛ tonɗi agut komoy nɛɛkik
aalɛɛɓa wɛɛŋa gɛɛŋk ɗook raŋk?"
34Nɛɓa ɔɗɔwen sinɛ kɔɔniy Pilipoos kɛ, "Tonuɓa iɗit pɛrkaakoŋk Isaayas sini agut wooɗ agut ɛɛk nɛɛk, maŋk iɗit om? tonureeta."
35Nɛɓa Pilipoos a tukiɗi Wargatɛɛ Waakoyotoŋkuk nyon sineenekɔ ambabɛk rɔɔriyɓa Pɛɛnii sinɔɔnɛ Ɓɛlkɛɛstank agut Yeesee.
36Saaɓa kaarɗik nɛɓa mɛlɛr soona lakiɗɛ maawuk, nɛɓa iɗit sinɛ tonu kɛ, "Dɛnko, lakɛ maawu seedi, kɛɛti aadi agut jikon?" 37[Nɛɓa Pilipoos tongeeɗ kɛ, "Ɔkɔn ŋaadiɗiikin ɓayɛ nook baŋɛŋ, aadɛɛni nɔ gayɛɗ." Nɛɓa iɗit sinɛ tonu kɛ, "Ŋaada kɛ ege Yeese Keresee Tɔɔn Waakoyotoŋk."] 38Nɛɓa ari a ɛtɛ gaari nɛɛkɛŋ, nɛ kɔtar maawa gɛɛna takana a getu pɛɛy, nɛɓa sɛɛn aadi Pilipoosuŋ. 39Saaɓa ŋaararkiɗ maawɛ gɛɛnɛk baŋiya, nɛɓa Wɛɛŋa Suumiyoŋk boŋur Pilipoosuŋ. Kiirɓa sɛɛn taanta kɛkar iɗit sinɛ adaktan, yakanaɓa ŋaar saadi a yaageeɗiŋ. 40Laŋkɛɛɓa Pilipoos Ajotoose, nɛɓa waawas Pɛɛni sinɔ Ɓɛlkɛɛstank katamɛɛkɛ raŋan mɛlɛɛɗa Keesaariyaaka.
Iliyochaguliwa sasa
Ijaag Wosɛytaanakoŋk 8: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
