Ijaag Wosɛytaanakoŋk 11
11
Yaaŋɛ Petros Any Sinɛkan Ijaagik
1Sisɔ wosɛytaanak a ŋaadtaanak ɔgɔ sigɛ atu ɗook Yuudaak, tiyɛrɓa kɛ joop sigɔ moko Ayuuduk boŋurɓa ɓɔrɛ pɛɛni Waakoyotoŋkuŋ. 2Nɛɓa Petros weeri Yorsaleema, nɛɓa ŋaadtaanak Ayuuduk gɔɔnyɛr sɛɛn kɛ, 3"Guugunyunkan waa joop sigɛɓa kɛɛ sɛɛg yawɛɗik nɔ aasi ɗamikari a sɛɛg agut omoŋ."
4Nɛɓa Petros tuke yaaŋɛɛta ola sigɛkan ɓɛɛlɛrk baŋɛ a omoŋ omoŋ kɛ, 5"Arkaakan ɗanɗamɔɔn Iyopee, nɛkan tawuka ɗoŋ a tekerŋ nɛkan dɛnɗika koɓiiɗ. Dɛnaakan koɓiiɗ any sinɔ gayi a biriittan abii sinɔ obiiŋɔŋk sinɔkan gaamɛɛ a gɔɔteer aŋank a kus dari ɗooka son lak eetik. 6Nɛkan mermena jɛt, nɛkan dɛna keegu sigɔ ɓɛɛlɛr kundiyaakɛk, a ola sigɔ pupuuter ɗookuk, a teetɔ sigɔ pirer rakaayk. 7Nɛkan tiya koŋgoy sinɔta tonu kɛ, 'Iin Petros, ŋaar raŋana nɔ ŋɔɔŋɔliikin nɔ ɗamikin.'
8"Yakanakan tona kɛ, 'Suumi naakɛ, ki gayɛ, inɓa kaa ada any sinɔ ŋɛɛwɛnŋɔŋk maŋk any sinɔ somkank.'
9"Nɛkan gut pɛɛyeene nɛɛkɛ tiya dari koŋgoy sinɔ tonu kɛ, 'Any sinɔkan ijaag Waakoyot a mentanŋɔŋk, kin seŋk toniiɗ kɛ somkan.' 10Nɛkan ɓɛɛlɛ oko sinik agut jiit, nɛkan boŋɛ any sinɛ gayi a abiik baŋɛ dariya.
11"Nɛkan sisa mɛlɛrki godeya sinaana arkiɗiik joop a jiit, sigɔkan wosɛykɛɛ sɛɛg Keesaariyaake son lak eetik. 12Nɛkanta tonur Wɛɛŋa sigɔ Geetitaanakik kɛnɔ kɛɛɗii a sɛɛg agut omoŋ a kat rootaana. Ŋaadtaanak sigi tula omk kaarkan a eet agut omoŋ, nɛkan guugunyii waa Kornelewoosuk. 13Nɛkantina tonu seŋk kɛ dɛnɛkan wosɛytan Waakoyotoŋk a ɛtɛtɛr nyaki naakɛk, nɛkanta tonu kɛ, 'Wosɛyi iɗit Iyopeya nɔ kɛɛɗɛɛ riykɛɛ Simion sinɛ riyɛ kɛ Petrosuk. 14Tonukɔɔna sɛŋk pɛɛni sinɔkoy bɔdɛrɗɔ iin a joop wɛy nookuk baŋɛk.'
15"Saakan tukeeɗa toniik, nɛkan kurak Wɛɛŋa sigɔ Geetitaanakik sɛɛga raŋana oko sinɛkan kurakiɗ eteŋkaak tukik. 16Saakank koɓukakan pɛɛni sinɛɓa waasɛ Suumii kɛ, 'Aadikan kɔnu Yowanis maawɛ, mayakana iinak aadɛɛkɔɔ kɔnu Wɛɛŋakɛ sigɔɔgɛ Geetitaanakik.' 17Saa seek ŋaadiɗii Suumi Yeese Kereseek, nɛ tina Waakoyot gaɓɛ Wɛɛŋa sigɔ Geetitaanakik, nɛ ɔkɔn gaɓɛ sɛɛga tigi sinɛkan gaɓɛ eteŋkaakiŋ nɛ laka oolan sinɔ ɓaarɗa sɛɛnŋɔŋkuŋ?"
18Saaɓa tiyɛrɗi any sinik, nɛɓa nyɛyɛr palamɛ nɛɛk nɛ dakɛr kɛ many. Nɛɓa pɔɔsɛr Waakoyo kɛ, "Sisɔ gaɓɛkɔ Waakoyot joopa sigɔɔga moko Ayuuduk weerɛɛt tikiyɛɛkɛk, sinɔ ari sɛɛg a laŋir wɛɛŋa sigɛkoy nɔkoy nɔkoyk."
Gode Sambatɛyoŋk Ansokiyaak
19Kɛɛtiɗiiɓa ŋaadtaanak a ɓɔɔkaaŋ, agut epaayan saaɓa ɓokotiiɗɛɛ Istipaanoosuk baŋiya. Nɛɓa kaar ɗooka Pinkeek, a sinɔɔnɛ Kopiroosuk, a katamɛya Ansokiyaak, nɛɓa waasɛr Pɛɛni sinɔ Ɓɛlkɛɛstank joopa Ayuuduk dakɛɗa maɓa kir waasɛɛt joopa ɔgɔɔka. 20Sɛɛge a omoŋ omoŋ sigɛɓa kurak Kopiroose a Kɛrenaakek, nɛɓa kaar Ansokiyaaka nɛ ɓɔrɛ waasɛr joopa sigɔɔga moko Ayuuduk Pɛɛni sinɔ Ɓɛlkɛɛstank agut Suumi Yeeseeŋ. 21Nɛɓa kɔnyɛ sɛɛg Suumiiŋ, nɛɓa ŋaadiɗi joop a ɓɔɔkaaŋ nɛ weerik son lak Suumik. 22Saaɓa tiyɛrɗi any sinik joop gode Sambatɛyoŋk Yorsaleemuk, wosɛyɛrɓa Barnabaas Ansokiyaaka.
23Nɛ saaɓa kɛɛɗik dɛnɛɓa a kɔ gaɓɛ Waakoyot wookan nɛɛk joopa gɛɛnaakik, nɛɓa yaageeɗiŋ. Nɛɓa rɔɔriy sɛɛg kɛnɔ beeɗir a sɛɛg ŋaadɛɛ Waakoyote sɛɛg baŋɛ, ɓayɛ nɛŋk baŋɛ. 24Sɛɛnɓa iɗit sinɔ mentanŋɔŋk, sinɔ enya Wɛɛŋa sigɔ Geetitaanakik a ɓaŋkaawur ŋaadiyɛɛkɛk. Weeriikiɓa joop a ɓɔɔkaaŋ son lak Suumik.
25Saadi baŋiya kɛɛɓa Barnabaas Tɛrseesa a warɛ Saaool. 26Saaɓa laŋkiɗik, nɛɓa ɗɔku Ansokiyaaka. Sɛɛg a getu pɛɛy beeɗirɓa a joop gode Sambatɛyoŋk agut omoŋ a eme omoŋ baŋɛ, nɛɓa rɔɔriyar joop a ɓɔɔkaaŋ jɛt. Nomtaanak tuki nɛɛkɛ riyɛɓa sɛɛg Ansokiyaake kɛ Dooytaanak.
27Saaɓak joop pɛrkaakoŋk a omoŋ omoŋ kaarɓa Yorsaleeme Ansokiyaaka. 28Sɛɛge iɗit a omoŋ sinɔ riyɛ kɛ Agaboosuk ŋaarɓa raŋana, nɛ tonu pɛrka Wɛɛgakɛ sigɔɔgɛ Geetitaanakik kɛ lakɛ koy ŋaawu sinɔ obiiŋɔŋk ɗook baŋɛ. Eekeerɛ ɓɛɛlɛɓa oko sinik eme suumi Roomuk Kɛlawudewoosuk. 29Agut sini waasiɗiiɓa nomtaana baŋɛ, nɛ boŋurku wori sɛɛg a omoŋ omoŋ oko sinɛ oolɛrɗik kɛnɔ wosɛyɛr tɔkɔny manyaakaka sigaaga atu ɗook Yuudaak. 30Tolɛrɓa wori nɛɛk nɛ wosɛyɛr gutarɛyɛɛka gode Sambatɛyoŋk Yorsaleemuk ariit Barnabaas a Saaooluk.
Iliyochaguliwa sasa
Ijaag Wosɛytaanakoŋk 11: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
