Chapa ya Youversion
Ikoni ya Utafutaji

Ijaag Wosɛytaanakoŋk 10

10
Petros A Kornelewoos
1Lakɛɓa iɗit om Keesaariyaake sinɔ riyɛ kɛ Kornelewoosuk. Sɛɛnɓa ɔɗɔwen amaasiniyɛ sigɔ ɗibɛk, pony amaasiniyɛɛkoŋk sinɔɔnɛ riyɛ kɛ Pony Itaaliyaak. 2Sɛɛnɓa iɗit sinɔ ɓaŋkaawur ɗanɗamɔɔnuk jɛt, ugumeɓa Waakoyota sɛɛn a joop wɛy nɛɛkik baŋɛ. Gigijɓa sankaanak sigɛ atu Ayuudek, ɛɓa ɗanɗama Waakoyota ɓɛɛnyɔwɛ gɛɛŋk baŋɛ. 3Ɓeny omalte ajigeya sayitiyɛɛkɛ sigɔɔgɛ tula aŋank, riyɛɛɓa sɛɛn kɛ, "Kornelewoos!" nɛ dɛnɛ yaaŋiyɛɛkɛ eekeerɛ wosɛytan Waakoyotoŋk a guugunyku son lak sɛɛnik.
4Nɛɓa ŋaati nɛ mermenaar son lak wosɛytan nɛɛkik jɛt, nɛ tongeeɗ kɛ, "Suumi naakɛ, jikon?"
Nɛɓa wosɛytan nɛɛkɛ tongeeɗ kɛ, 'Koɓɛɛ kɔna sooy lak Waakoyok ɗanɗamɔn nook, a tigi sinɛkɔ gagaɓun sankaanakaakiŋ." 5Sisɔ wosɛyi joop Iyopeya nɔ kɛɛɗɛɛ riykɛ Simion sinɛ riyɛ kɛ Petrosuk. 6Sɛɛn sisɔ koonat woy Simion sinɛ wɛkɛkɛr tarmakik, sinaanɛ ar goroo sinɔɔnɛ obiiŋɔŋk kɛntɛɛk." 7Saaɓa ŋaarɗi wosɛytan sinɛkan tongeeɗ any sinik, nɛɓa riyiri Kornelewoos ijaageerɛ gɛɛnɛk a pɛɛy, a amaasiniyɛɛkɛ sigaagɛ atu sɛɛnek sinɔ ŋaadɛɛŋɔŋk a omoŋ. 8Nɛɓa tonu sɛɛga any baŋɛ nɛ wosɛyɛ sɛɛg Iyopeya.
9Alɛ nɛɛkɛ waawuy sayitiyɛɛkɛ sigɔɔgɛ tula omk, kaarɓa nɛ saaɓa woontukuɗ katamɛya nɛɛkaakik, nɛɓa Petros teeŋɛ pooka raŋana ɗanɗamɔɔna, 10nɛɓa lak ŋaawu nɛ ɗɛyɛ ɗama. Saaɓa arkiɗɛ ijaag ɗamatoŋkuk, nɛɓa tawuku ɗoŋ a tekerŋ nɛ yaaŋɗigiɗɛɛ dɛnɛɛɗ. 11Any sinɛɓa dɛnɛ yaaŋiyɛɛkɛk, dɛnɛɓa a ɓuukiɗi dari, nɛ kus ɗooka any sinɔ gayi a abii sinɔ birittank sinɔkan gaamɛɛ a gɔɔteer aŋank. 12Lakɛɓa saadi nɛɛkɛ raŋk keegu sigɔ ɓɛɛlɛr kundiyaakɛk, a ola sigɔ pupuuter ɗookuk, a teetɔ sigɔ pirer rakaayk. 13Saaɓak tiyɛɓa sɛŋk koŋgoy sinɔ tonu kɛ, "Iin Petros, ŋaar raŋana nɔ ŋɔɔŋɔliikin nɔ ɗamikin."
14Yakanaɓa Petros tonu kɛ, "Suumi naakɛ, ki gayɛ. Inɓa kaa ada any sinɔɓa kɛɛ toniiɗ kɛ in ɗamɛɛk, maŋk any sinɔ somkaank."
15Nɛɓa tiyɛ kɛkar koŋgoy sinɔ tonu kɛ, "Any sinɔkan ijaag Waakoyot a mentanŋɔŋk kin seŋk toniiɗ kɛ somkan." 16Nɛɓa ɓɛɛlɛ oko sinik agut jiit baŋiya, nɛɓa boŋɛɛ any sinɛ gayi a abii sinɔ birittank dariya sisa.
17Saaɓa Petros koɓiiɗ kɛ wooran yaaŋiyɛ gɛɛŋk jikonk, maɓa joop sigɛɓa wosɛyɛ sɛɛg Kornelewoosuk kɔɔniyar wɛy Simionuk, nɛɓa laŋir nɛ ɛtɛtɛɗar tugaat. 18Nɛɓa riya nɛ kɔɔniya kɛ, "Simion sinɛ riyɛ kɛ Petrosuk ɓɛɛlɛ seediiŋ?"
19Saaɓa Petros arkiɗ koɓiiɗ yaaŋiyɛ gɛɛŋkik, nɛɓa tonurgeeɗ Wɛɛŋa sigɔ Geetitaanakik kɛ, "Wawararni joop a jiit. 20Ŋaari raŋana nɔ ɓurɓuɗiikin nɔ kaari a sɛɛg agut omoŋ. Kat ɓakɛyɗiikin, agut sinɔ wosɛyɛɛrakɔ sɛɛg saak."
21Nɛɓa Petros ɓurɓuɗi nɛ tonu sɛɛga kɛ, "Eet iɗit sinɛ wawararik. Kurakɔɔkɔ agut jikon?"
22Nɛɓa sɛɛk jumurgeeɗ kɛ, "Kusii sooy lak Kornelewoos sinɛ ɔɗɔwen amaasiniyɛ sigɔ ɗibɛk. Sɛɛn iɗit sinɔ mentan taamɛkɛ Waakoyotoŋk, ɛ ugume Waakoyota, ɛ porur sɛɛn joop Ayuuduk baŋɛ. Tongeeɗkɔ wosɛytan sinɔ geetitank kɛnɔnu waki nyaka nɛɛka kɛnɔ kɛɛ tiyɛ any sinɛ tonunk." 23Nɛɓa Petros gaɓɛ sɛɛg nyaka nɛɛka nɛ wɔɔrɛ sɛɛg nɛ ɗeegararŋ.
Nɛɓa alɛ nɛɛkɛ romiiɗ ŋaar raŋana nɛ kaar a sɛɛg agut omoŋ, ŋaadtaanak sigɛɓa atu Iyopeek a omoŋ omoŋ kaarɓa agut omoŋ. 24Nɛɓa alɛ nɛɛkɛ mɛlɛr Keesaariyaaka, nɛɓa Kornelewoos tolɛ tekaaneer gɛɛŋk, a piraakak gɛɛŋk sigɛ atu jɔkuk nɛ koorɛr Petrosak. 25Saaɓa Petros mɛlkiɗik, nɛɓa Kornelewoos wideer ɛɛk son lak sɛɛnik, nɛ oru ɛɛk derakɛ gɛɛnɛ goyse ɗeek nɛ ugumgeeɗiŋ. 26Yakanaɓa Petros ɓɔŋgɔɔrɛ nɛ tongeeɗ kɛ, "Ŋaari raŋana! Eet ɓɔrɛ iɗit oko iin." 27Saaɓa Petros guugunyɗu godeya ma waawasiŋɔŋk, nɛɓa laŋki joop a ɓɔɔkaaŋ a atu tolɛɛɗ. 28Nɛɓa tonu sɛɛga Petros kɛ, "'Ɗegerari sɔɔk ɔɗɔka goŋk kɛ kɛɛ pɛgɛdɛɛt, higii ŋaadiyɛ gaŋkik kɛnɔ lotɛr ɛɛk iɗit Ayuuduk a iɗit sinɔ moko Ayuuduk nɔ guugunyar godeya sinɔɔna omoŋɔŋk, yakana yaaŋɛkɔta Waakoyot kɛnɔ kɛygun wooɗ kat tona kɛ kɛɛkan geetiit maŋk kɛ somkan. 29Agut sini saakɔta wosɛyɗitarkiɗɛk nɛkɔ kusaa a kaa rootaan, nɛ sisɔ ɗɛya a ɗegera any sinɛkɔtu riygiɗɛɛkiŋ."
30Tonuɓa Kornelewoos kɛ, "Kɔ ɗoŋikɛ sigɔɔgɛ aŋank ɔɔtɛ sineene sayitiyɛɛkɛ sigɔɔgɛ tula aŋank, ɗanɗamaakakɔ nyaki naakɛk, nɛkɔ sisa ɛtɛ iɗit om taamɛkɛ gaanɛk, sinɔ lak abii sinɔ nyaalɛŋɔŋkuk. 31Nɛta tonu kɛ, 'Iin Kornelewoos, tiyɛkɔ Waakoyot ɗanɗamɔn nookuŋ, koɓɛɛkɔ tigi sinɛ gagaɓun sankaanakaak taamɛkɛ Waakoyotoŋkuŋ. 32Wosɛyi iɗit sisɔ Iyopeya nɔ kɛɛɗɛɛ riykɛɛ Simion sinɛ riyɛɛ kɛ Petrosuk. Sɛɛn sisɔ koonat woy Simion sinɛ ar goroo sinɔɔnɛ obiiŋɔŋk kɛntɛɛk sinɛ wɛkɛkɛr tarmakik.' 33Nɛ agut sini nɛkɔ wɔsɛyɛɛrana joop a gorgorŋ. Nɛ mentan sinɛkɔ mɛlkiɗikiŋ. Tolɗiikiikɔ sisɔ eteŋk baŋɛ taamɛkɛ Waakoyotoŋk, kɛnɔ tiyii any sinɛ kɔna tonu Waakoyot kɛnɔ waasink.
Waasiyɛ Petrosuk
34Tukeɓa Petros toniiɗa kɛ, "Mɛlɛkɔta eekeerɛ kɛ ki Waakoyot pakaatɛ joop. 35Kɛygun iɗit ɗoo wonk ɔkɔn ɓure Waakoyoŋ ɛ ijaag any sinɔ mentan taamɛkɛ gɛɛnɛkiŋ, nɛ boŋu sɛɛn Waakoyotuŋ. 36Ɗegerɛɛ kɛ wosɛykikan Waakoyot pɛɛni nɛɛk joopa Israeelikiŋ, mɛlkikan sɛɛga Pɛɛni sinɔ Ɓɛlkɛɛstank yaakatoŋk goy Yeeseek. Ege Yeese Keresee Suumi joop baŋɛk. 37Nɛ ɗegerari any sinɛkan ɓɛɛlɛ a tukiɗi Gɛlilaake nɔ ɗooka Yuudaak baŋɛk, a tukiɗi saaɓa Yowanis rɔɔriyaaɗ agut aadiik baŋiya. 38Ɛɓɔrɛ ɗegerari kɛ ɗonyɛɓa Waakoyot Yeesee Naajreetik Wɛɛŋakɛ sigɔɔgɛ Geetitaanakik, a ɓaŋkawukaat. Nɛɓa weeweri a ijaag any sinɔ mentanŋɔŋk, a ebɔdɛ joop sigɛ atu ɓaŋkawukaat setanik goyse ɗeekik, agut sinɔɓa Waakoyo a sɛɛn agut omoŋɔŋk. 39Waasii seek eekeer any sinɛɓa ijaag sɛŋkik sinɔɔnɛ kɛntɛ ɗoo Yuudaak a katamɛ Yorsaleemuk. Nɛɓa sɛɛk joop laalawar keet raŋk nɛ ɓokoturŋ. 40Yakanaɓa Waakoyot boŋku sɛɛn ret walasa ɗoŋikɛ sigɔɔgɛ jiitik, nɛɓa ari a yaaŋɛ ɛɛk. 41Mokokan yaaŋɛ ɛɛk joopa baŋɛ, yaaŋɛkan ɛɛk eteŋka sigaagakan ɗamiikii ɛ utiɗikii a sɛɛn agut omoŋɔŋk saakan ŋaarkiɗ ret walsak baŋiyaak, eteŋk joop sigɛkan daam tin Waakoyot kɛnɔ waasii eekeer joopa agut sɛɛnik. 42Sekɛɓa tina kɛnɔ waasii eekeer joopa, kɛ tonuɓa Waakoyot kɛnɔ koy pɛrɛdɛ bɔdtaanakɛ a reteerɛ. 43Waasɛrɓa joop pɛrkaakoŋk baŋɛ kɛ joop sigɛ ŋaadiɗi sɛɛnek baŋɛ, kɛnɔkoy laŋir tɔŋɔɗ tikiyɛɛkoŋk tiriyaakɛ gɛɛnɛk."
Kurak Wɛɛŋa Sigɔ Geetitaanakik Joopa Sigɔɔga Moko Ayuuduk
44Saaɓa Petros toniiɗ any sinik, nɛɓa kurak Wɛɛŋa sigɔ Geetitaanakik joopa sigaagaɓa tiyɛr pɛɛni nɛɛkik raŋana baŋɛ. 45Joop Ayuuduk sigɔ ŋaadtaanakik sigɛɓa kurak a Petrosuk, saaɓa dɛnɛrɗi a gaɓɛ Waakoyot Wɛɛŋa sigɔ Geetitaanakik, joopa sigɔɔga moko Ayuuduk, nɛɓa reemɗi ɓayɛtun gɛŋkiŋ. 46Nɔɓa ɗegerarɗi kɛ gaɓɛɛkɔ Wɛɛŋa sigɔ Geetitaanakik joopa sigɔɔga moko Ayuuduk, tiyɛrɓa a tonɗi atutunɛ sigɔɔgɛ kɛɛ ɗegerɔɔnuk ɛ eemɛyar Waakoyo pɔɔsiyɛɛkɛ. Nɛɓa tonu Petros kɛ, 47"Joop sigi boŋurkɔ Wɛɛŋa sigɔ Geetitaanakik oko eteŋk, nɛ wooɗ sinɛ ɓaariiɗ kɛnɔ kat sɛɛg aadɛɛ maawɛɛk?" 48Nɛɓa tonu kɛnɔ aadɛɛ sɛɛg tiriyaakɛ Yeese Kereseek. Saadi baŋiya kaaɓurɓa Petros kɛnɔ beeɗ a ɗoŋ tekerŋ a sɛɛg agut omoŋ.

Kuonyesha

Shirikisha

Nakili

None

Je, ungependa vivutio vyako vihifadhiwe kwenye vifaa vyako vyote? Jisajili au ingia