Omoŋ Korontoosuk 16
16
Tolɛɛ Woriyoŋk Joopa Waakoyotoŋk
1Agut tolɛ wori tɔkɔny dooytaanakoŋk, in ɓɔrɔ ijaagɛɛ oko sekiyɛ sigɛkan gaɓa dooytaanaka Gɛlatiyaak. 2In iɗit a omoŋ omoŋ iinakɛ riiɓe wori nɛɛk Sambatɛyoŋk nyaki nɛɛkɛk oko sinɛkɔ laŋiɗik tuki nɛɛk, kɛnɔ mokɔɔ lakɛ iɗit sinɔkɔɔ tolɛ wori saakɔɔ mɛlɛrkiɗak. 3Saakɔɔ mɛlɛrkiɗa son lak iinakik, nɛkɔɔ kɔna wosɛyɛɛra a wargatɛ agut omoŋ joop sigɛkan daamarik a kɔna gaamur worik sinɛkan tolɛɛrik kɛnɔ ɗɔkarki Yorsaleema. 4Ɔkɔn kɔɔ dɛna a ɓɔrɛta gay a kɛɛɗaŋ, nɛkɔɔ kɔrii a sɛɛg agut omoŋ.
Ola Sigɛɓa Gaamu Paawuloos Ijaagaak
5Agut sinɔkɔ gaamiɗa kɛ kɛɛɗakɔɔ Mɛkedooniyaakaak, nɛkɔɔ kɔnu lɛɛwɛra a gopan. 6Ɔkɔn kaɗɛŋ kusa kɔɔ gaalaaka a diŋ ɔɔtɛ nɛɛkɛŋ, maŋk kɔɔ kaala baŋgi nɛɛk saadi. Inta ijaagɛɛ tɔkɔny sinɛta ɗɛyɛ ŋaawita naakaak nyon baŋɛkik. 7Sisɔ kaa ɗɛyɛ a kɔnu lɛɛwɛra a balaaŋ ma ɗeya a gopan. Ma ɔkɔn oko ɗɛyan Suumiyoŋkuŋ, nɛ saadi baŋiya laka ŋaadiyɛ sigɔ kookora kɛ beeɗaakɔɔ sooy lak iinakik a jeeɗo ɔɔtɛ nɛɛkɛŋɔŋk.
8Yakanakɔɔ beeɗaa Epesoone mɛlɛɛɗa Ba'aala Pentekosteek. 9Ɛɓɔrɛ tayɛɛkɔta tuga sinɔ bakaanyŋɔŋk sinɔ lak ijaag a obiiŋɔŋk, yakana ɓɔɔka joop sigɔ ɓooyɗiŋɔŋkuŋ.
10In kɔɔ wɔɔrɛɛ Timotiyoos, saakɔɔ mɛlɛrkiɗik kɛnɔ beeɗ sooy lak iinakik a kat lak keeny, agut sinɔ ijaag ɓɔrɛ ijaag Suumiyoŋkuŋ oko eet. 11Nɛ agut sini kat lakɛ iɗit sinɔ sɛɛn daraayɛk kɛnɔ weeriiki bɔdɛɛɗ son lak eetik, kookorii murun nɛɛk a manyaakak eeta sigɛ dooytaanakik agut omoŋ.
12Kalɛykaayakan manya eteŋka Apiloos sɛɛn a manyaakak eteŋka sigɔ dooytaanakik kɛnɔ gun kɔtar son lak iinakik, nɛkɔ sɛŋk sise kiir mɛlɛ, yakana kɔɔ kɔru saakɔɔ yaageeɗik.
Rɔɔriyɔn A Digoy Sinɛ Pedtank
13In ɓeɗɛɛ, In ɛtɛɛ ŋaadiyɛɛkɛ, in moojanɛɛ, in ɓaŋkaawurɛɛ. 14In ijaagɛɛ mɛyin, any sinɛ ijaagiirik baŋɛ. 15Iinak manyaakak eeta sigɛ dooytaanakik, degerari joop wɛy Istipaanoosuk kɛ sɛɛg ɔɗɔweer dooytaanaka ɗook Akayaak ɛkan gaɓɛr ɛɛk kɛnɔ ijaagɗi joopa Waakoyotoŋk. 16Nɛkɔna rɔɔrɔka kɛ in tiiɗikɛɛ joopa sigɔɔga ɓɛɛlɛr oko sigik a joop sigɛ ijaagɗi jɛtik baŋɛ a sɛɛg agut omoŋ.
17Yaata jɛt mɛlɛ Istipaanoosuk a Pɛrdonatoosuk a Akayakoosuk son lak eetik, agut sinɔ kɔta enyɛrarɗi any sinɛ kɔte bitakɗi saakɔ kɔnu kiiɗɛkiŋ. 18In ɗegerɛɛ joop sigɔ ɓɛɛlɛr oko sigik. Gaɓɛrkɔ imiiny wɛɛŋaaka goŋk a wɛɛŋa gaŋkiŋ.
19Digoyɛrtarnɔ kɔnu dooytaanak sigɛ atu Isiyaakeek, digoyɛrtarnɔ kɔnu jɛt Suumii Yeesee dooytaana sigɛ tolɗi woy Akiilaak a Pirsikilaak baŋɛ. 20Digoyɛrtarnɔ kɔnu dooytaana sigɛ atu seedik baŋɛ. In digogoyikɛɛ a samɓoɓoyikɛɛ ɛkanɛɛkɛ goŋk mɛyin masiikikeenoŋk. 21Eet Paawuloos taapɛɛrakɔ kɔna wargatɛ sini ariit naakɛk. 22Ɔkɔn lakɛ iɗit sinɔ ki poriiɗ Suumi Yeeseekiŋ, in dakɛ a koonykan. In Suumi naŋk waɗik. 23In wookan Suumi Yeese Kereseek a iinak agut omoŋ. 24In mɛyin naak a iinak agut omoŋ Yeese Keresee. Ameen.
Iliyochaguliwa sasa
Omoŋ Korontoosuk 16: KSTM
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia