Luke 2

Sa Niyanaḵan Jesus

(Mat. 1:18-25)

1Sa sadi ye timpu we niyanaḵan John, nangwa'ḵ lintog aḵ Emperor Augustus we umoy da losane tagu'tta ili ye ipangatan da iRome we ḵasapuḻane ampalistada. 2Sana ummunae nampalistaanda si aḵ Quirinius Gobernor si probinsiya'd Syria. 3Gapu'tte sadi ye lintog, ḵasapuḻane umoy ampalista da losane tagu'tta niyanaḵan da danaḵḵoḻda.

4Ummoy os aḵ Joseph we naḻpu'd Nazareth atte probinsiya'd Galilee nampalista'd Bethlehem atte probinsiya'd Judea te siya niyanaḵan Ari David we daḵdaḵoḻna. 5Aḵ Mary ye umaannaḵ, nibuḻun os ḵan Joseph we umoy ampalista te nantuḻagdae an-asawada. 6Inninggawda ḵad ad Bethlehem, sadi ummanaḵana. 7Gapu ta naippun maigawan te napnu da boboḻoy atta tagu, ummoyda'tte iiddungan da baḵa. Pune sadi, nibuḵnag panguḻu we abengnae laḻaḵi. Pun ḵinagoyana woḵ pinaobogna'tte ḵaḵaḵḵanan da baḵa.

Sa Nampail-an Da Anghel Atta Antatangḵon Atta Karnero

8Sa sadi ye labi, inninggaw da ummiyan si puḻag atte adani'd Bethlehem we anangḵon atta karnero. 9Pune sadi, baag-en nampaila anghel Apudyus ḵan dida woḵ naḻangḻanganda'tte ḵinapaddan Apudyus. Pun naḵimtanda. 10Ḵanan ni anghel ḵan dida, “Adi ḵayu maḵimut! Te sa annae ambaḻu we damage ibagaḵ ḵan diḵayu, siya gapun ni lumayadan da losane tagu. 11Te ḵan diḵayu niyanaḵ sinsadi ye labi sina'tte ili ye niyanaḵan Ari David, aḵ Kristu we Apu.#2:11 Sa ugud atte Greek, sa pion ni Kristu ḵanan siya pinilin Apudyus aḵ Anagu ya An-ari. 12Annaya angipanoḵnoḵ ḵan diḵayu we ḵatuttuwaan da ibagaḵ. Odasanyu uttinge naḵagoyan woḵ pinaobogda'tte ḵaḵaḵḵanan da baḵa.”

13Imbagana ḵad ay, daguse nampaila da amoamode anghel we naḻpu'd langit woḵ nidogada'tte ummunae anghel pun ḵanandae nangidaydayaw ḵan Apudyus,

14“Madaydayaw aḵ Apudyus ad langit.

Anna lin-awa'tta tagu'd

lutae mas-omana.”

15Nipauli ḵad da anghel ad langit, nan-uugud da sadi ye anangḵon atta karnero woḵ ḵananda, “Intaḵu sinsadi'd Bethlehem ilan mipanggob atte naḵwa sidi ye impaigammun Apudyus ḵan ditaḵu.”

16Pune sadi, nangganasondae ummoy woḵ indasanda da Mary ḵan Joseph ya sa uttinge pinaobogda'tte ḵaḵaḵḵanan da baḵa. 17Innilada ḵad ay utting, imbagada da imbagan ni anghel we mipanggob ḵan siya, 18woḵ da losane nangngoḻ, amod de nantataagda. 19Yaḵon aḵ Mary ḵad, insisimoḵna da losane naḵwa wok pinopomponna si somsomoḵna. 20Nipauli ḵad da nanangḵon atta karnero si puḻag, nanggappiyada ḵan nandaydayawda ḵan Apudyus gapu'tta losane innilada ḵan dingngoḻda te da losane imbagan ni anghel ḵan dida, tuttuwae naḵwada.

Sa Nangngadananda Ḵan Jesus

21Ḵawaḻun aḻgawna ḵad, ummoyda impasogyat utting ta tuttuwaonda lintog. Pun nginadananda'ḵ Jesus te siya imbagan ni anghel si daan Mary mabugiyan.

Sa Nangiyoyanda Ḵan Jesus Atte Templo

22-24Dummatong ḵad aḻgawe imbilin ni lintog Moses#2:22-24 Leviticus 12:2-8. mipanggob atte pumoḻḵasan ni ḵaḵ-anaḵ, ummoy da Joseph ḵan Mary ad Jerusalem ta umoyda idatun ḵan Apudyus imbagan ni sadi ye lintoge duwae lagadan baḵon nu duwae kalapati. Innawitda bos utting ta idatunda ḵan Apudyus. Te sa nigili si sadi ye Lintog Apudyus ḵanana, “Ḵasapuḻane mitotoḵḵon da losane panguḻu we laḻaḵi aḵ ḵuwan Apudyus.”#2:22-24 Exodus 13:1-2, 12-13.

25Inninggaw maḻmaḻong-ag ad Jerusalem we nangngadan aḵ Simeon. Naun-unane tagu te tinuttuwana Lintog Apudyus ya naapudyusan. Ḵad iinggaw Ispiritu Santu ḵan siya. Nabayage uuwayona dumaḵngan ni Anagu atta ganaḵ Israel. 26Sa awe, impaigammun ni Ispiritu Santu ḵan siyae adipun matoy inggana'ḵ ilana'ḵ Kristu we inkarin Apudyus. 27Impuyut ni Ispiritu Santu aḵ Simeon atte paway ni templo. Inniyoy ḵad da amana ḵan inana'ḵ Jesus ta tuttuwaonda da paḵwan ni lintog Moses mipanggob atte umunae miyanaḵe laḻaḵi, ummadani'ḵ Simeon. 28Innaḻana utting woḵ ḵananae nangidaydayaw ḵan Apudyus,

29“Apu, saḵon sammilum,

maḵwa matoyaḵ

te lummin-awa somsomoḵḵu,

gapu ta tinuttuwam da inkarim ḵan saḵon.

30Te innilaḵe mismu Anagu

ḵan diḵani ye imbuunnu.

31Sa insaganam atte sinagung da losane tagu.

32Isunan silawe allangḻang ta

ipailana da pinion Apudyus atta Gentil.

Gapu bos ḵan siya,

midayaw da tagume ganaḵ Israel.”

33Nataag da ama ḵan inan Jesus atte imbagan Simeon we mipanggob ḵan siya. 34Pune sadi, binindisyunan Simeon dida woḵ ḵanana ḵan Mary, “Dongngom, sa annae abeng, dinutuḵan Apudyus siya'ḵ mataguwan da adu ḵan ditaḵu we ganaḵ Israel ya adu bos da madusa. Awad da anging-ingnga ḵan siya. 35Sa ambanagana, da mitataḻu we ḵasomsomḵanda mipaigammu. Siḵa ḵad Mary, andadauyḵae isun di naduy-uḵ pusum si maḵwa si Abengnu.”

36Inninggaw os sidi mammad-ane profeta we nangngadan aḵ Anna. Abeng Phanuel we naḻpu'tta ganaḵ Asher. Nangasawa ḵad, pitun tawon woḵ natoy asawana. 37Sissiyae baḻu inggana'ḵ nantawon aḵ waḻumpuḻu ya opat. Patilayun umoy si paway ni templo ta andayaw ḵan alluwaḻu ḵan Apudyus atte inaḻgaw ḵan nilabi. Patilayune allaun ta alluwaḻu. 38Dummatong aḵ Anna woḵ innilana'ḵ Jesus, nanggappiya ḵan Apudyus. Inggan ni sadi, insaḻadnae angibagabaga'tta mipanggob ḵan siya'tta tagu we anguuway atte dumaḵngan ni anubut atta iJerusalem.#2:38 Sa annae verse sa pion ni iJerusalem ḵanan iyIsrael.

39Ginanggangput ḵad da Joseph ḵan Mary ḵingwa da paḵwan ni Lintog Apudyus, nipaulida'd Nazareth atte probinsiya'd Galilee ye naḻpuwanda. 40Sa abeng ḵad, dummaḵoḻ, ḵummosdoḻ ḵan nasomḵan. Pun nas-om aḵ Apudyus ḵan siya woḵ binindisyunana.

Aḵ Jesus Atte Templo

41-42Nasawaḻan ḵad aḵ duwa tawon Jesus, nibuḻun ḵan amana ya aḵ inanae ummoy ad Jerusalem naḵagayagaya'tte Gayagayan da Judyu we ngannonda Nallausan#2:41-42 Sa Gayagayae Nallausan we gangganason da Judyu, sana angiḵagasmoḵanda si nangiligsiyan Apudyus atta danaḵḵoḻdae nammusassu'd Egypt atte timpun Moses. Nanggaḵay ḵad anghel we ummoy nangongat atta losane panguḻu we abenge laḻaḵi'd Egypt, nilausana da boḻoy da Judyu we naḵuan da lewanganda si daḻan ni ubbu we karnero Exodus 12. Tinawone gangganasonda ḵad waḻun aḻgawe anggangganasda. Pun da Judyu, naḻpuda'tta adu we ili ya nandatdatongda'd Jerusalem we umoy maḵagayagaya'tte Gayagayae ngannonda Nallausan. te tinawone umoyda. 43Nagangput ḵad gayagaya, nallibbat da Mary ḵan Joseph we nipauli'd Nazareth. Ḵainamada gay natenan aḵ Jesus ad Jerusalem. 44Sa somsomoḵda, nibuḻun atta udume nanaddaḻan, pun iggada gaye ummoyon inggana'ḵ nasdom. Inniladapune ippun aḵ Jesus, ummoyda singngit atta buḻunda ya da agida. 45Pun naippun ḵad ay indasanda, nipaulida'd Jerusalem we umoy anaḻata ḵan siya.

46Ḵaḵlun aḻgawna ḵad, indasanda si paway ni templo we maḵaam-ammung atta mimistulun ni lintog#2:46 Da mimistulun ni lintog, niyiyapda bos atta amo mapatgane tagu'tta ḵailiyandae iyIsrael te iniiggammuda lintog Moses. Naadaḻanda, ḵad dida angituttudu'tte Ugud Apudyus ya da amoamode ugalin da danaḵḵoḻda mipanggob atta imbilin Apudyus we ḵoonda ḵan adida ḵoon. ya nandodongngoḻ ḵan nan-im-imus ḵan dida. 47Da losane nandongoḻ ḵan siya, nataagda'tte laingna ya da isongbatna. 48Pun innilan ḵad da sin-abeng, nataagda bos. Ḵanan inana, “Ngaipam ay ḵoon ḵaḵna ḵan diḵani? Adimpun ḵamman igammu we nambimbinsaw ḵani ye nanaḻata ḵan siḵa?”

49Ḵanan Jesus, “Ngaipayu ḵad ain saḵon taḻataon? Adiyupun ḵamman igammu we ḵasapuḻane annaaḵ si boḻoy Amaḵ?” 50Yaḵon da Mary ḵad ḵan Joseph, adidapun naawatan pion ni inugudna ḵanan.

51Pun nibuḻun aḵ Jesus ḵan didae nipauli'd Nazareth woḵ tinuttuwana da imbagada. Aḵ inana ḵad, iniittomana da losane naḵwa. 52Aḵ Jesus ḵad, dummaḵoḻ ya amo nasomḵan woḵ nas-om aḵ Apudyus ya da tagu ḵan siya.

Iliyochaguliwa sasa

Luke 2: kml

Kuonyesha

Shirikisha

Nakili