Markuji 5

Yesu ohonvulumutcha mutu ozaleliwa minemba dabure

Matewuji 8:28-34; Lukaji 8:26-39

1Yesu na anamamuharaye koholambuwa, dowa kombela ya ntiya na Galileya, aliwa fiya ilambo wakala akuda Jeraza. 2Evale Yesu atitaga wene mmwadeyani mule, ohokala mulombwana mmohi okana munemba otakala azilege. Mulombwanole akumelaga masiye wewo wakala liye. 3Atu kovenda jommanga mbwenye liye kawanda mangeya, nne masiki na makurenti. 4Fendo didjindji dene kommangetcha na makurenti vamohi na momba miwono na manyalo, mbwenye liye opaza makurenti ale na momba dile eto kalivo awanda mugondjiha. 5Liye ntana na mahiyu akaletcha mmasiyeni na mmwangoni, akuwaga eto aviporotchaga na mabwe.

6Mwa enne agamuonne Yesu olapela wene, ohotamangaga, fiya vali Yesu vale, liye mukokorela. 7-8Evale Yesu ohomuwongana munemba otakala ule ira: <<Munemba otakala we, kakumamo mwa mutula!>> Nomuruma enne, mutule ohowongaga mokuwa eraga: <<Kodi mwazela mudikayena ani, nyo Yesu Mwana wa Mulugu Okwaranya Jatene? Mwa nzina na Mulugu nnavepa ira mwahadionihe goyi.>> 9Evale Yesu ohonfuka eraga: <<Weyo nzina nawo uli ani?>> Liye ohomuwakula ira: <<Miyo nzina naga nnaitaniwa Anamwindji mwasiwa nihindjivana, kanili ang'ono.>> 10Nomala enne, minemba dabure dile dohonvepa Yesu na ntindi ira: <<Nnouvepani ira mwahanitamangihemo mwilamboni muli hiyo muno.>>

11Wandamelana vali atu vale vohokala nguluwe didjindji dene daligi vankumani didjaga. 12Evale minemba dotakala dile dohonvepaga Yesu na ntindi ira: <<Mwanikumihamo mwa mutula, munirume ira nidowe nakale munguluweni mule.>> 13Evale Yesu ohorumeliha. Minemba dile dohokuma mwa mutule, aliwa dowa volowa munguluweni mule. Evale nguluwe datene edile dohotamangaga, dititelaga vodiha, aliwa dowa morela mbara, kwela emule. Nguluwe dile indjiva uwa dali wandamelana 2.000.

14Evale alombwana kakumbuza nguluwe dile, kagaonne jejile, kohotawa, aliwa dowa roma wongaga musidadi mule na mmatemba zela jejo jaonne atu. Atu kawandeliwale kagavwile ejile, kohodowa wali Yesu ule ira kadowe kaone jaireyile. 15Kagafiyile wandamelana vali Yesu vale, kohomuonaga mutu anna anamwindji a minemba dabure ule, agagaratile vali Yesu vale, agawarile jowara jaye pama eto aganna zelru daye dokwakwanela dene. Kagaonne eno, atwale kohoova. 16Ale kaonile jatene ejile zela maliba kana minemba dabure ule eto zela ja nguluwe jile, kohawandelamo afwiwa kazile ale. 17Noira eno, kohonvepa Yesu ira akumemo mwilamboni mwewa mule.

18Evale Yesu agamaruwile agwelaga mmwadeyani mule ira adowege, mulombwana avulumutchiwe ule ohonvepa na ntindi eraga: <<Miyo nnafuna duharegeni.>> 19Yesu mbwenye ohomuwakula eraga: <<Wela udowege vande ira waawandele afwawo zela upama uuirele Nabwiya na tangaranga duwendenle liye.>> 20Evale mulombwanole ohovenya, liye dowaga ilambo yeriwa Dekapoliji, wewo wali sidadi kumi, liye roma laleyaga zela sayi Yesu amuirele liye. Evale atenene kagavwile, kohotikiniheyaga.

Mulombwana Jairo ohodowa wa Yesu

Matewuji 9:18-19; Lukaji 8:40-42

21Yesu ohogwela mmwadeyani akoka, liye welelaga kombela ya ntiya nne, wakoka wene wakumele liye. Evale agafiyile wewule, atu ohokala a masika kohodowa gumana na liye mutcherelani mwa ntiya nne. 22Yesu agali wewule, mundimuwa mmohi wa nyumba yofundjamo Mazu aitaniwa Jairo, ohozaga liye kokora vamanyaloni va Yesu, 23amuguzelaga Yesu mendo eraga: <<Mwanaga wa muhiyana murenda, uhanle vang'ono ira akwe. Ndoweni vande, mwamuhinde ira liye awande vulumuwa.>> 24Evale Yesu ohovenyaga vamohi na ndimuwole, aliwa roma dowa.

Vulumutchiwa wa muhiyana mmohi wa nroromelo

Matewuji 9:20-22; Lukaji 8:43-48

Kadowaga, atu ohokala a masika komuharaga Yesu eto kofiyedaga finyanaga bure. 25Evale ohozaga muhiyana mmohi amanle yaka kumi na mbinli aganna urenda ohamba, kumaga sangiri malambo matene. 26Muhiyanole jaye janna liye jatene ja vande vaye johomala na amediku adjindjene asakaga mirombwe. Eto kawanda vulumuwa, mbwenye urendole wera simbwa. 27-28Mwa enne agavwile zela Yesu, ohomutamangelaga, liye papareda vevale vafwanyeyaga atu oindjiva, fiyeda dowa muwandamela Yesu. Tchoira liye ohokanamo youmbuwela ira: <<Dahinda kapa yaye bahi, nnovulumuwa.>> Agafiyile vali Yesu vale, ohodowaga unduli waye ule, liye muhinda kapa. 29Evale agahindile kapa, mohodibeliwa sangiri nne nohomiyalaga. Mwa ora yenne liye iziwa ira eniva dihivulumuwa. 30Mwa ora imohive yenne, Yesu ohoona ira ukala uvulumuwile muwari mwa kopolo daga. Evale mobaranya ohorungunuwaga, liye fuka ira: <<Bani uhindile jowara jaga?>> 31Anamamuharaye kohomuwakula keraga: <<Kaing'anani vili hiyo va atu kohosimbwa indjiva bure eto nnofinyana bure. Nnga munawanda wonga avi ira: <Ukala udihindile!>?>> 32Mbwenye Yesu orungunuwagave aaing'anaga anamwindjale ira amuone mutu guvi amuhindile. 33Muhiyanole agaonile jatene jamuireyele, ohozaga moova eto morendjeya, liye gwela vamanyaloni va Yesu awongagamo jatene jene jamuireyele. 34Evale Yesu ohomuwongana muhiyanole eraga: <<Mwanaga, na mwasa wa nroromelo nawo, umala vulumuwa. Venya udowege mwa murendele, urenda wanna we uhumala.>>

Yesu ohonvenyiha mokwani mwana Jairo

Matewuji 9:23-26; Lukaji 8:49-56

35Yesu awongagave enne, kohozaga atu okumela vande va ndimuwole Jairo, aliwa ira: <<Andimuwa, mwaninyu uhukwa! Kammukukumuleve namafundjiha.>> 36Yesu mbwenye agavwile jawongile atu jile, ohowonga na Jairo, liye ira: <<Kuove, so mbwenye uroromele!>> 37Evale Yesu ohawelihaga anamwindji kamuhara ale, liye mulanda Peduru, Tiyagu vamohi na Juwawu, wenno afwanyeya agali Tiyagu mbalaye. 38Kagafiyile vande va mundimuwa wa nyumba yofundjamo Mazu ule, Yesu ohofwanyaga madugudugu ohokala a masika, atenene kanlaga molimbiha eto kakuwaga. 39Evale Yesu ohovolowa mmba, liye fuka ira: <<Kodi madugudugu matene anna, nlaga eni mwasiwa gwa nni? Tchoira namwali ula kakwile. Liye unagona.>> 40Evale aliwa kohoroma muteya. Eto Yesu ohavenyihagavo atu atene kafwanyeya evale. So mbwenye avolowile mmba mule na anamamuharaye araru ale, vamohi na namwali ule ababaye, liye dowa kwartu yenno wali mwanokwa ule. 41Yesu agavolowile mmba mule, ohomuhinda namwali ule na ndanda naye eraga: <<Talita kumi!>> tapulela ira: <<Namwali, miyo nnouwandela ira uvenye!>> 42Mwa ora imohive yenne, namwali ule ohovenya, liye roma wenda. Fwanyeya ira ora yenno namwali ule anna yaka kumi na mbinli. Atu atene kaligi vevale kagaonne ira uhuvenya, kohotikinaga valukulu. 43Evale Yesu ohowonga na atwale ira kahamuwandele mutu mmohiwa zela jaireyile. Eto oharuma ira kanvahe yodja.

Iliyochaguliwa sasa

Markuji 5: iLolo

Kuonyesha

Shirikisha

Nakili