Markuji 4

Yofwalrafwaniha ya maliba woka mbewu

Matewuji 13:1-23; Lukaji 8:1-15

1Evale Yesu ohodowa tcherela ya ntiya na Galileya, liye roma afundjiha atu wewule akoka. Mwa enne mwindji wa atu kagumanne evale tchali a masika. Na mwasa oindjiva wa atu, liye ohogwela mmwadeyani liye garati roma afundjiha atwale kali mutcherelani mule.

2Yesu ohafundjihaga jengo jidjindji muwari mwa jofwalrafwaniha. Muwari moafundjiha, liye ohowonga ira: 3<<Kavuruwanani! Ohokala namazala mmohi avennye ira awoke mbewu daye. 4Evale awokaga mbewu dile, mbewu dimohi dohomorela mmambalo mwa ndila. Vevale mbalrame dovava zulu dohoza aliwa dodamo, mala dja. 5Eto mbewu dimohi diwa damorenlege nimburo nafwanyeyana mabwe vevo vahali teya idjindjene. Evale kadarutchile, dohomelaga mobaranya, mwasiwa mbewu dile kadatimbeleyile didowa vati bure. 6Mbwenye nzuwa nagazilewo, mbewu damenle dile dohomala ja, aliwa umma, mwasiwa mitchitchi diwa kadadowile vati na mwasa wa mabwe ale. 7Mbewu dimohi diwa damorenle vamenle minga. Evale dohomela, roma ulukulaga pama. So mbwenye minga dile diulukulaga, dohomala pitikelrelra jomela jile, mala nyala. Noira eno, jomela jile kajabalihile. 8Mbwenye mbewu dimohi diwa dohomorela vateyani vapama. Dedo damorenle vateyani vapama, dohomela aliwa ulukula. Edile mbwenye dohobaliha 30, 60, ante 100 kada mutati.>> 9Evale Yesu agamanle wonga eno, ohomariha eraga: <<Ule unna mabaru ovwana, avwe.>>

Atu kohonfuka Yesu zela yotapulela ya yofwalrafwaniha yawongile liye

Matewuji 13:10-17; Lukaji 8:9-10

10Anamwindji kagamanle balaleya, vagahanle atu a vang'ono bahi vamohi na anamamuharaye kumi na ambinli ale, aliwa kohonfukaga Yesu zela yofwalrafwaniha yawongile liye ile. 11Evale liye ohawakulaga eraga: <<Nyo muhuvahiwa ira muonelremo jokoyeya ja Umwene wa Mulugu. Mbwenye zela atu ali unde wa umwene, anafundjihiwa muwari mwa jofwalrafwaniha 12ira kaing'anagave kahawande ona yengo eto ira masiki kavuruwanagave, kahawande onelramo yengo.#4:11-12 atu ali unde wa umwene, anafundjihiwa muwari mwa jofwalrafwaniha ira… kahawande ona yengo eto… kahawande onelramo: Mazu a Mulugu anoniwandela ira onelramo ibaribari no twaruwa no kana nroromelo kunazela mofuna wa kada mutu. So mbwenye mutu ira akayena, unavahiwa. Kohokalawo anavahiwa eto kohokalawo kahanavahiwa. Nione Matewuji 19:11; Juwawu 6:65; Joira ja Anamarumiwa 16:14; Roma 9:16; 2 Timoteyo 2:25. Tawiha ira kaona, kaonelramo, anawelele wa Mulugu ira aakurumuwele.>>#Izaiya 6:9-10

Yesu ohotapulela yofwalrafwaniha ya maliba woka mbewu

Matewuji 13:18-23; Lukaji 8:11-15

13Evale Yesu ohafuka ira: <<Akala nyo kamuonenlremo yofwalrafwaniha ila, kodi munowanda onelramo jofwalrafwaniha jatene nnafuna miyo wongaga? 14Namazala damuwonga miyo, unazala mazu a Mulugu. 15Atu amohiwa kavwa mazu, anakala nnga mbewu yenno yamorele mmambalo mwa ndila. Tempu imohive inavwa atu mazu, Satana unoza mobaranya, liye kumihamo mazu anne kazaliwe mmirimani mwewa. 16Eto mbewu yenno yamorenle vamabweni ba atu anne anavwa mazu, karumelaga mohodibeliwa mohagalala. 17Eto mwa tempu ya vang'ono anohiya mazwale mwasiwa aliwa kimenle mitchitchi mwa mazwale. Anavilela tempu ing'onong'onove mbwenye kaona ira muwari mwa mazu munoza sanyeya wohokala wa masika no harahariwa, aliwa anovayela balrabanduwa.

18<<Eto kohokalawo aliba vwa amohiwa anakala nnga mbewu dedo damorenle vamingani. Aliwa anovwa mazwale 19mbwenye, waza makatamiho a mwilamboni muno, kanyengiwa funaga jorayela, kasilrilra jengo jimohi jiwa, jengo jejo jinopitikelrelra mazwale. Vevale mazu a Mulugu kinabalihave yengo.

20<<Eto kohokalawo atu amohiwa ali nnga mbewu yenno yazaliwe vevo vali teya yapama. Aliwa anovwa, anorumela mazwale eto anobaliha jovaha jidjindji: amohiwa 30, amohiwa 60, amohiwa fiyeda 100 eto kwaranya mbewu yazanlevo atu ile.>>

Yesu ohowonga zela panti

Lukaji 8:16-18

21Yesu ohowongagave eraga: <<Kodi ukala unahindiha panti agudumeya na ngogoda owu hehi ahela mukukusuni mwa kama? Nari. Panti inaheliwa nimburo napama. 22Tchoira pantile yahindaga, yengo ili yatene yokoyeya inofiyeda oneya eto yengo ili yatene yokuweya inofiyeda iziweya.#4:21-22 Panti inaheliwa nimburo napama. Mazwala anatapulela zela makalelo anafuna mutu aire agamanle vwa mazu a Mulugu. Inafwanela mutu atukule mazu a Mulugu, ahele vasogolro va jatene ira kamoneyege ingumi yaye yatene. 23Ule unna mabaru ovwana, avwe.>>

24Yesu ohowonga eto eraga: <<Ifwanele muumbuwele pama zela jinavwa nyo! Tchoira mapimelo munapimana nyo, na nyenne munoza mupimiwena makalelo mamohive anno. Eto munoza muwendjediwe kwaranya. 25Tchoira mutu wenne unna, gunafuna vahiwave. Mbwenye ule ahanna, mwa yengo ya vang'ono yenno inna liye unoza awakiwe.>>

Yofwalrafwaniha zela ulukula wa Umwene wa Mulugu

26Yesu ohowonga eraga: <<Umwene wa Mulugu unakala nnga mbewu yenno mulombwana mmohi unazala liye vateyani. 27Liye amala zala, masiki agonaga, nari agavenyile, ntana na mahiyu, mbewu ile inomela, ulukulaga, liye mbwenye mwinnya maliba zala kanaiziwa makalelo anaireya ira yengwele iulukule. 28Tchoira teya inabaliha okave bahi. Mbwenye yamela, unaroma gu mutati, amala zawo isotokwa, amala zawo kongolo diwa dedo nnazala isotokwani ule. 29Mwa enne jovaha jile jagamanle itwa, mutu unodowa gwadaga, mwasiwa ihifiya tempu yohanda.>>

Yofwalrafwaniha ya mbewu ya mostarda

Matewuji 13:31-35; Lukaji 13:18-21

30Yesu ohowongagave eraga: <<Hiyo nnafuna nifwalrafwanihe Umwene wa Mulugu na yengo nni? Nnafuna niwonge yofwalrafwaniha nni yokwakwanela na Umwene wa Mulugu? 31Umwene wa Mulugu unakala nnga mbewu imohi ya mostarda. Mbewu ya mostarda tchi mbewu ing'ining'inive igomihedile yeva muwari mwa mbewu datene da mmundani. 32Mbwenye yazaliwa, yamela, mutenguwa unoulukula kwaranya mbewu datene dozaliwa da mmundani. Eto tambi daye nnakala dilukulu. Evale mbalrame dovava zulu, nnoza aliwa mangaga jitundji mmifulrini mwiwa mule.>>

Yesu alabana jofwalrafwaniha jidjindji

Matewuji 13:34-35

33Yesu oafundjiha atu mazu a Mulugu muwari mwa jofwalrafwaniha jidjindji nnga jeji, mokwakwanela na vevo vagomela onelramo wa kada mutu. 34Kilivo yengo yahawongile liye muwari mwa jofwalrafwaniha. Mbwenye adediha ora yakala liye na anamamuharaye vewa vene, amala liye roma awandelamo pama pama yotapulela iwa.

Yesu ohomiyaliha nipevo

Matewuji 8:23-27; Lukaji 8:22-25

35Siku nenne nzuwa nagavirile, Yesu ohawandela anamamuharaye ira: <<Ndoweni nilambuwele kombela ya ule.>> 36Evale aliwa kohahiyaga anamwindji ale, aliwa gwela mmwadeyani mwafwanyeya Yesu mule. Eto dohokalawo mwadeya dimohi diwa dadowaga vamohi na aliwa.

37-38Kawendagave, Yesu ohodowaga mundulri mwa mwadeya mule, liye samela musamelro waye, roma gona. Morurumutcha nohozaga nipevo nlukulu roma womba vamohi na mahindje omanganyeya fiyeda mmwadeyani mule roma zalagamo mahindje. Vevale anamamuharaye kohonvenyihaga keraga: <<Namafundjiha, kodi nyo kamunakukumuwa ira nihanle vang'ono ira nikwe?>>

39Yesu agavennye, ohosumulula nipevo nne eto ohowonga na mahindje ira: <<Kamiyalani mukale pama.>> Vevale nipevo nohonvwelela aliwa miyala, jatene aliwa kala pama.

40Agairile eno, ohafuka anamamuharaye ira: <<Munaova nni? Evale na vano kamunakayena nroromelo?>> 41Vevale anamamuharaye kohomuova valukulu kawongaga oka oka keraga: <<Nipevo na mahindje jinonvwelela. Kodi wenna uli nnga ani?>>

Iliyochaguliwa sasa

Markuji 4: iLolo

Kuonyesha

Shirikisha

Nakili