Malakiya 2
2
Mazu oamanga mulandu anamakuta
1Yehova wa Makuru Matene unawonga ira: <<Peno nnawonga na nyo anamakuta. Nlamulo nnakumiha miyo para nyo ti ni. 2Mwahadivwelele eto mmirimani mwenyu mwahafune riheda nzina naga, miyo Yehova wa Makuru Matene nnoutembelrelrani. Joreliha jinawatchela nyo miyo nnotembelrelra. Eto dihimala tembelrelra joreliha jenyu mwasiwa kamunadivwelela na mmirimani mwenyu mwatene. 3Kavuruwanani. Nnoza daonihe goyi ahiminyu a musogolro eto nnoza dupamedeni mambi wintoni wenyu, mambi a jifuwo jinavelela nyo muwari mwa pwando dinyu. Amala eno nnoutatilani vamohi na mambi anno. 4Jaireya eno, nyo munoiziwa ira para miyo uvahani nlamulo nodivwelela, ili ira yopangana ipanganne miyo na aLevi#2:4 aLevi: Ba anamakuta tchoira anamakuta atene kakumile nlogo na Levi. idowegeve sogolro. Unawonga gu miyo Yehova wa Makuru Matene.
5<<Yopangana yaga na aLevi yali yovaha ingumi eto yovaha murendele. Eto yali yopangana ira kadiovege. Evale kodiova eto kowopihiwa na mwasa wa nzina naga. 6Jofundjiha ja ibaribari jali wanoni wewa. Johokala pama kajafwanyeya vamilomoni vewa. Kawenda na miyo mwa murendele eto mowongowa. Kohawelihawo adjindji ubureni wafwanyeya atu ira kahiye joira jiwa jabure. 7Mwasiwa mmilomoni mwa anamakuta inafwanela mukumege zelru eto inafwanela atu kadowege wa aliwa ira kafundjihiwe na aliwa. Tchoira anamakuta ba aliba milanyo aga miyo Yehova wa Makuru Matene. 8Mbwenye nyo anamakuta muhumala hiya ndila daga. Muhumala agwagwadutcha atu adjindji na jofundjiha jenyu. Muhumala takaliha yopangana yaga na aLevi. Unawonga gu Yehova wa Makuru Matene. 9Nona miyo dihisakanya ira mukale atu opetiwa, atu ohokana mabasa vamentoni va atu atene mwasiwa nyo kamuharile ndila daga eto munatonga milandu muwari mwa nsakulro hiya muwari mwa malamulo.>>
Malakiya ohowonga mazu oamanga mulandu akuda Juda zela jotela jiwa
10Kodi hiyo atene kaninna babihu mmohive? Kodi unipandutchile kahi Mulugu mmohive? Akala ti eno, nnga mwasiwa gwa nni hiyo kalaga atu ohororomeleya mmohi na nfwaye, hiyo viringanihaga yopangana Mulugu asakannye liye na ababihu? 11Akuda Juda ba atu ohororomeleya. Muwari mwa ilambo ya Izarayeli na ilambo ya Jeruzalemu munoireya jengo jotakaletchetcha. Tchoira akuda Juda kohotakaliha Nyumba ya Yehova yenno inazivela liye. Aliwa kohodowa atela ahiyana olobela amilugu a unde.#2:11 Sawasawa nnga wanle Mulugu okameliha eto ohotakaleliwa zela atela ahiyana olobela amilugu a unde, tempu ili hiyo ila inafwanela atu omuroromela Yesu katelane omuroromela Yesu ve. Nione Detoronomiyo 7:3; 1 Korinto 7:39, 9:5; 2 Korinto 6:14. 12Yehova unomukumihamo mutu uli watene unairana jatene ejo ira ahakale muzizani mwa Jako, mutule vamohi na ahimaye. Masiki mutu wenno azegenave jovelela wa Yehova wa Makuru Matene, unokumihiwamo.
13Eto jengo jimohi jiwa munaira nyo ti ji. Vaibuwani va Yehova muhumala zalihavo misodi, nyo nlaga no dumbela na mwasa oira Yehova kanabalra yovelela yenyu eto kanawatchela inazana nyo mmandani mwenyu. 14Mbwenye nyo munafuka ira: <<Nnga mwasiwa gwa nni habalraga jovelela jehu?>> Yehova kanabalra mwasiwa liye gu mboni wa yopangana yenno yapanganne we siku namutenle we muhiyanawo oroma. Wagamanle pangana kala ororomeleya na muhiyanawo, weyo kuharihile masiki liye agalive nfwawo eto agalive muhiyanawo upangannena we telana.#2:14 Wagamanle pangana kala ororomeleya na muhiyanawo, weyo kuharihile: Mazwala Mulugu ohowonga malro oagwihana mulandu atu atene oraruwa nari atu oalanya ahiyaniwa vahali mwasa. Fwanyeya ira tempu ili hiyo ila Yesu ohowonga ira mwasa omulanyana muhiyana ku raruwa bahi. Nione Matewuji 19:3-9. 15Mulugu asakanyile ira atu ambinli kakale mmohive mwa maningo eto kakale mmohive mwa munemba. Mulugu para irana eno, afunavo nni? Liye afuna ira aliwa kaabalege ahima omuhara liye. Na mwasa wenno inafwanela kada mutu aviing'ane pama eto akale ororomeleya na muhiyanaye oroma. 16Tchoira Yehova Mulugu wa Izarayeli unawonga ira: <<Miyo nnoida mwalana. Eto nnomwida mutu unakana uwali na muhiyanaye.>>#2:16 Owu hehi Eto nnomwida mutu wenno unakunela yowara yaye na joira jabure. Inafwanela atu katelana, kaiziwe ira inafwanela telana udowege sogolro fiyeda ukwa wewa mwasiwa Mulugu ohowonga ira: Miyo nnoida mwalana. Inafwanela eto mulombwana awande muwongana muhiyanaye mopwaseya hiya mbubuda, mwasiwa Mulugu ohowonga ira: Eto nnomwida mutu unakana uwali na muhiyanaye. Nione 1 Peduru 3:7. Na mwasa wenno polre polre tawiha ira munaze mukale atu ohororomeleya na ahiyaninyu. Unawonga gu Yehova wa Makuru Matene.
17Muhumala muwaheyiha Yehova na jowonga jenyu. Mbwenye nyo munofuka iraga: <<Nimuwaheyihile avi?>> Mmuwaheyihile muwari mowonga ira: <<Mutu uli watene unairana jabure gwapama vamentoni va Yehova eto Yehova unomuziveliwa.>>#2:17 Mutu uli watene unairana jabure gwapama vamentoni va Yehova: Yowonga yabure yenno yawonga atu yazenle mwasiwa atu kohoona atu abure karayelaga jiwa kalaga nnga Mulugu unaakamiheda atu abure. Yowakula ya Mulugu zela yowonga yenno ili ira nihikalawo siku nnafuna za ira Mulugu aatonge atu atene abure eto aavulumutche atu atene apama. (Nione 3:2,5,18; 4:1-3) Eto mmuwaheyihile muwari mofuka ira: <<Uli waani Mulugu otonga mwa ibaribari?>>
Iliyochaguliwa sasa
Malakiya 2: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral