Malakiya 1
1
1Ula gu muselu wa mazu a Yehova awongile liye na aIzarayeli muwari mwa Malakiya.
2Yehova gunawonga ira: <<Miyo nnazave duzivelagani nyo aIzarayeli.>> Mbwenye nyo munorungunuwa nyo fukaga ira: <<Yehova unizivenle moira avi?>> Yehova unawakula ira: <<Kodi Ezawu kahi Jako mbalaye wa mulukulu? Mbwenye masiki Ezawu agalive mulukuluwa, miyo dimuziveliwe Jako 3eto Ezawu dihimwida. Ilambo yakala liye ya mwangoni dihisandutcha kala muisalesaleni. Ilambo yanvahile miyo, dahiyedile anambwa a mukokolani. 4Eto akuda Edomu anno anafwanyeya kagali ana Ezawu#1:2-4 Nikolo na aIzarayeli ali Jako. Eto nikolo na akuda Edomu ali Ezawu. Nione Jenesesi 25:30, 32:28. kaza kawonga ira: <Nihimala bwanyuliwa, nnafuna nimange akoka madebe ehu>, miyo dagali Yehova wa Makuru Matene nnoza daawakule ira: <Kaahiyeni kamange akoka. Miyo mbwenye nnogwiha. Nnosakanya ira aliwa kaitaniwege: <<Ilambo ya ubure ya atu anno Yehova aatakaleliwe liye kala no kala.>> >#1:4 Mulugu muwari moatonga akuda Jako, aliwa kohokana yodediheda ira kavenye akoka. Mbwenye akuda Edomu kadediha itaniwa anno Yehova aatakaleliwe liye kala no kala. 5Nyo aIzarayeli munoza muone eji na meso enyu eto munoza muwonge ira: <Yehova gu mulukulu ilambo yatene na unde wene wa Izarayeli.> >>
Takaleliwa wa Mulugu zela jovelela ja akuda Juda
6Yehova wa Makuru Matene unawonga ira: <<Mwana unomuriheda babaye eto namalaba unomuriheda patarawu waye. Akala na miyene dili babi, nnga rihediwa waga uli uvi? Akala na miyene dili patarawu, oviwa waga uli uvi? Nyo anamakuta munapeta nzina naga eto munawonga ira: <Nzina nenyu nipetile moira avi?> 7Nyo munapeta nzina naga muwari movelela jodja jotakala vazulu va ibuwa yaga ya mikuto. Eto munawonga ira: <Hiyo nutakalihileni moira avi?> Nyo muditakalihile muwari mowonga ira: <Meza ya Yehova kahi yengo.> 8Kodi mwavelela mwanainyama ohoona ira akale mukuto, yenno kahi yabure?#1:8 mwavelela mwanainyama ohoona: Fwanyeya ira mazu a Mulugu kohokameliha mutu velela mukuto wa mwanainyama orangala. (Levitiku 22:18-25; Detoronomiyo 15:19-21) Eto mwavelela mwanainyama otchikama owu obulela, yenno kahi yabure? Mwanvaha yenno governadore,#1:8 Owu hehi: perezidenti. kodi liye unowatchela mohagalala, owu hehi, kodi liye unouziveliwanani? Jatene ejo unawonga gu Yehova wa Makuru Matene.>>
9Yehova wa Makuru Matene unawonga ira: <<Masiki mudivepe dagali Mulugu na upama unna miyo ira dikayena sayi na nyo, kodi na jovelela jotakala jejo jili mmandani mwenyu, miyo nnowanda rumela? Miyo kannamuirela upama nne mutu mmohi mwa nyo. 10Yali yapama mutu mmohi adowe afunge mulango ira mwahawandege tumbanya munlo vasayi vaibuwani vaga va mikuto.>>#1:10 tumbanya munlo vasayi vaibuwani vaga: Fwanyeya ira zela ona wa Mulugu, yapama ku garati vande hiyaniha no wonga nzina na Mulugu agali mmirimani mwawo uli olapela wene na liye. Yehova wa Makuru Matene unawonga ira: <<Kadinna ziveliwa zela nyo. Eto nne kannawatchela jovelela jili mmandani mwenyu. 11Tchoira roma makumelo wa nzuwa fiyeda mavirelo wa nzuwa atu a unde anerege iziwa ira nzina naga ti nlukulu. Eto mamburo matene atu anerege tumeya jonukela na nzina naga eto anerege velela jovelela ja ibaribari. Mwasiwa atu a unde anerege iziwa ira nzina naga ti nlukulu. Unawonga gu Yehova wa Makuru Matene. 12Mbwenye nyo munapeta nzina naga iraga: <Meza ya Yehova imala takalihiwa. Eto jodja jili vevo kajinna mabasa.> >>
13Yehova wa Makuru Matene unawonga eto ira: <<Nyo munawonga ira: <Aa, jeji jihimala niwaheyiha!> Eto munaombela musinyu jovelela. Eto munovelela joba, jotopinya, jobulela, nyo zagana vaibuwani va mukuto. Kodi miyo nnowatchela jejo jokumela mmandani mwenyu? Unawonga gu Yehova wa Makuru Matene. 14Otembelrelreya akale ngongomwa wenno unna nibila na mulombwana napama muwari mwa jifuwo jaye eto agalumbenle ira avelele, mofutukula avelela wa Yehova mwanainyama mmohiwa orangala. Tchoira miyo dili Mwene Mundimuwa eto nzina naga nnerege oviwa muwari mwa malogo matene. Unawonga gu miyo Yehova wa Makuru Matene.>>
Iliyochaguliwa sasa
Malakiya 1: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral