Lukaji 10
10
Yesu oharuma anamamuharaye 70
1Jagaireyile enne Nabwiya ohasakulra atu amohiwa 70 ira kadowe sogolro, wewo wafuna liye dowa.#10:1 70: MaBibiliya amohiwa anawonga 72. Aarumile ambinli ambinli ira kadowe sidadi na tatamo dedo afuna liye fiya. 2Evale Yesu ohawandelaga eraga: <<Johanda jihisimbwa indjiva eto anamalaba kohoyeva. Nona inafwanela munvepe Mwinnya wa munda ira aarume anamalaba amohiwa ira kadowe mahandelo waye. 3Venyani mudowege. Muing'ane, miyo nnaurumani nnga mabila ira mudowe vari va anambwa a mukokolani. 4Nyo mwadowaga muulrendoni mwinyu, kamutukule sartera, nne pasta, nne sapato. Eto mwadowaga kamuimele mundila ira mmulondjele mutu. 5Mwadowa vande vinafiye nyo, mubabihege alondjelavo ira: <Murendele akale na nyo vande vano.> 6Nyo mwagaalondjenle, mwaona ira ukalavo mutu wa murendele orumela uwatchelani, murendele wenyu unomutitela liye. Mbwenye mwaona ira kinafuna jouwatchelani, murendele unowelela wa nyo. 7Vande munafiyede nyo mukaleve vevo, mudje eto mung'we yenno inauvaheni atu. Tchoira inafwanela ira namalaba akayena yotambilra yaye. Eto kamuindjivihege mokala. 8Sidadi ili yatene munafiye nyo, kauwatchelani pama inafwanela mudjege yenno inauvaheni atu. 9Eto inafwanela atu atene munaafwanye nyo na maurenda muwari mwa sidadi yenno, mwaavulumutche eto mwaawandele ira: <Umwene wa Mulugu uli vakwikwive na nyo.> 10Mbwenye mwavolowa sidadi imohi mwahatambilriwe pama, inafwanela muvenye mudowege. Eto mwadowaga muwongege mundila ira: 11<Hiyo nuhutatelani nyo tumbulru nafwanyeya na manyalo ehu ira ikale ionihedo zela mulandu wenyu. Mbwenye inafwanela muiziwe ira Umwene wa Mulugu uli vakwikwive.> 12Miyo nnouwandelani ira siku notonga naza nifiya, sidadi yenno inafuna ukondani, goyi diwa nnokala goyi dilukulu dokwaranya goyi nnafuna za vahiwa akuda Sodoma.>>
Tembelrelreya wa sidadi dedo dahamuwatchenle Yesu
13Yesu ohowongave eraga: <<Udilu wa weyo Korazimi! Udilu wa weyo Betisayida! Mwasiwa matikiniho muireliwe nyo sidadi mbinli di, ahakanlege matikiniho anna kaireliwa sidadi ya Tiru na Sidoni, adjindji mwa aliwa kogotwaruwa mwa jotega jiwa, kawarege masakwi, kagarati vati kavihelege ndora mmuruni mwiwa. 14Nona, siku notongiwa naza nifiya, goyi denyu nnokala goyi dilukulu dokwaranya goyi nnafuna za vahiwa akuda Tiru na Sidoni! 15Kodi weyo sidadi ya Kafaranamu unaumbuwela ira unoza ugwele zulu? Weyo unoza utatileliwe Nimburo na Anokwa.>>#10:15 Nimburo na Anokwa: Owu hehi Hades. Ti nimburo na goyi neno Mulugu nnaakoya liye atu abure kahanatatileliwe ntiya na Munlo. Nione Jowandeliwa 20:13-14.
16<<Mutu wenno unauvuruwanani, unadivuruwana miyo. Mbwenye mutu wenne unaukondani, unadikonda miyo. Eto wenne unadikonda, unamukonda wenno udirumile.>>
Welawo wa atu karumiwe na Yesu
17Nomala enne, atu 70 anne aarumile liye ale kagamanle mabasiwa, kohowelawo mohagalala, aliwa za muwandelagamo Yesu keraga: <<Nabwiya, naruma minemba dabure na nzina nenyu, minemba dabure dile nnowanda nivwelela.>> 18Evale Yesu ohawakulaga, liye ira: <<Miyo dihimuona Satana akumaga zulu, amorelaga ilambo ya vati nnga jerima. 19Kavuruwanani, miyo dihimala uvahani kopolo doira nyo mwanyingale nyowa nari awalruze eto mwanyingale kopolo da mwidani. Muwari monyingala, kilivo yabure inafuna ufwanyani. 20Nyo mbwenye kamuteyele zela minemba dabure dedo nnauvwelelani, nari. So mbwenye muteyele zela mazina enyu lrembiwa ilambo ya zulu.>>
21Mwa ora imohive yenne Yesu muwari mwa Munemba Otchena ohagalalaga, liye roma lobelaga eraga: <<Miyo nnoutamalelani nyo Babani, Mwinnya wa ilambo ya zulu na ilambo ya vati, mwasiwa nyo muhuwanda koya jengo jeji ira aliba zelru na aliba onelramo kahawande iziwa. Mbwenye muhuwanda aiziwiha ahima ang'onong'ono. Babani na ibaribari wewo ku funa wenyu ira muirena.>> 22Yesu eto ohowongaga eraga: <<Babaga udivaha jatene mmandani mwaga. Eto kalivo mutu mmohiwa udiiziwile miyo mwanaye ahali Baba. Eto kalivo umuiziwile Baba ahali miyo Mwanaye na anno anafuna miyo aiziwiha!>> 23Evale Yesu ohorungunuwa aing'ana anamamuharaye, liye awandela vewa vene eraga: <<Orelihiwa ba atu anne anaona jejo jinaona nyo! 24Na ibaribari miyo nnouwandelani ira anamafiyiheda adjindji na amwene adjindji kohofunafuna ira kaone jejo jinaona nyo, mbwenye aliwa tchaonile. Eto kohofunafuna ira kavwe jejo jinavwa nyo, mbwenye tchavwile.>>
Yofwalrafwaniha ya muSamariya mmohi wapama
25Ohokalawo namafundjiha malamulo mmohi avenyilege liye nfuka Yesu momuxixa eraga: <<Namafundjiha, dire avi ira dikayena ingumi yohomala?>> 26Evale Yesu ohomuwakula, liye ira: <<Kodi mmalamuloni mulrembiwe avi? Nnga weyo waileri, unaonelramo avi?>> 27Mundimuwole ohowakulaga ira: <<Mmalamuloni mulrembiwe ira: <Umuziveliwege Nabwiya Mulugu wawo na murimawo watene, no kalawo wawo watene, na kopolo dawo datene, no onelramo wawo watene. Eto umuziveliwege mutu uli watene nnga munaviziveliwa we wa mwinnya.> >> 28Mwa enne Yesu ohomuwakula, liye ira: <<Uhuwakula pama. Weyo inafwanela ukwakwanelihedege jejo, waira eno unokana ingumi.>>
29Evale mundimuwa wa malamulo ule mofuna vikaliha mutu okwakwanela, ohonfukaga Yesu akoka eraga: <<Kodi nfwaga bani?>> 30Evale Yesu ohomuwakulaga awongaga ira: <<Ohokalawo mulombwana mmohi akumaga Jeruzalemu adowaga Jeriko. Liye adowaga mundila, ambava kohomuhinda, aliwa mbubuda, muwungula jowara jaye, aliwa muhiya vang'ono no kwa. 31Eto fwanyeya ira ohokalawo namakuta mmohi aviraga ndila imohive yenne. Liye agamuonne mulombwanole, ohomuwereweraga, liye dowaga jaye. 32Noira eno, ohokalawo eto mulombwana mmohiwa muLevi aviraga. Agafiyile nimburo nenne, agamuonne, na liyene ohomuwereweraga, liye dowaga jaye.
33<<Jagaireyile enne vohokalaga muSamariya#10:33 vohokalaga muSamariya mmohi: Nafwanya Juwawu 4:9,20, nnovwa ira aSamariya na aJudewu tchavahana nne vang'onove. Ku wonga muJudewu agabubudiwe, aJudewu afwaye anno kali andimuwa osogolrelra ja Mulugu tchafunne mukamiheda. So amukamihedile ali mwidanaye mmohi wenno ali muSamariya. mmohi aligi muulrendoni mwaye, aviraga ndila imohive yenne. Mbwenye liye agafiyile nimburo nenne, agamuonne, ohomuwendelaga tangaranga. 34Ohowandamelaga evale, liye muhuwa jilonda jamporotchile atu jile na makura na vinyu, agairile enne liye mpota. Agampotile ohomugweliha vaburuni vaye, liye mudowana nyumba yofiyedamo alendo. Agamudowilena wewule, ohokalaga wewule amuing'anelaga. 35Mwa enne mmetcheloni muwa ohompagalrigi maliba nyumba ya alendo ule kobiri mbinli da parata,#10:35 kobiri mbinli da parata: Kobiri nnawongiwa va ali kobiri nnga mutu unatambilra liye alaba mmundani mwa nfwaye malambo menli. liye muwandela ira: <Mmukamihedege mutula. Kobiri datene munanonge nyo, miyo dawelagawo nnopagalri.> >>
36Yesu ohowongaga eraga: <<Moonelramo mwawo, kodi mwa atu araru ale, amusakanyile nnga nfwaye mutu afwanyiwe ambava ule guvi?>> 37Mundimuwa wa malamulo ule ohorumelaga, liye ira: <<Amusakanyile nnga nfwaye ali wenno amuwendenle tangaranga.>> Evale Yesu ohomuwandelaga, liye ira: <<Na wenne udowe wairege makalelo mamohive.>>
Yesu agali vande va Marta na mbalaye Mariya
38Yesu na anamamuharaye kadowagave muulrendoni mwiwa, kohofiyaga tatamo imohi. Mwa enne muhiyana mmohi wa tatamo yenne eriwa Marta, ohomutukula Yesu mudowana vande vaye. 39Marta ule ohomukana mbalaye aitaniwa Mariya.#10:39 mbalaye aitaniwa Mariya: Inafwanela niiziwe ira aMariya anafwanyeya mBibiliyani kohoindjiva. Kahi ira Mariya ula gu mmaye Yesu. Gu muhiyana mmohiwa okana nzina nimohive. Yesu agafiyile vande va Marta vale, Mariya ule ohodowaga garati manyaloni wa Nabwiya, liye vuruwanaga mazu afundjihaga Yesu. 40Marta mbwenye liye ohokalaga okukumuwene na mabasa osapa. Evale liye ohodowaga valigi Yesu vale, liye nfuka ira: <<Nabwiya, kodi nyo kamunabalra Mariya wire liye adihiyeda mabasa meka? Kamurumeni aze adikamihede!>> 41Evale Nabwiya ohomuwakulaga eraga: <<Marta! Marta! Weyo uli osanyeyene eto uhukukumuwa zela mabasa madjindji analaba we, 42mbwenye yengo yofuneya tchi imohi bahi. Tchoira Mariya uhusakulra pandi yapama eto kalivo unawande muwaka.>>
Iliyochaguliwa sasa
Lukaji 10: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral
Lukaji 10
10
Yesu oharuma anamamuharaye 70
1Jagaireyile enne Nabwiya ohasakulra atu amohiwa 70 ira kadowe sogolro, wewo wafuna liye dowa.#10:1 70: MaBibiliya amohiwa anawonga 72. Aarumile ambinli ambinli ira kadowe sidadi na tatamo dedo afuna liye fiya. 2Evale Yesu ohawandelaga eraga: <<Johanda jihisimbwa indjiva eto anamalaba kohoyeva. Nona inafwanela munvepe Mwinnya wa munda ira aarume anamalaba amohiwa ira kadowe mahandelo waye. 3Venyani mudowege. Muing'ane, miyo nnaurumani nnga mabila ira mudowe vari va anambwa a mukokolani. 4Nyo mwadowaga muulrendoni mwinyu, kamutukule sartera, nne pasta, nne sapato. Eto mwadowaga kamuimele mundila ira mmulondjele mutu. 5Mwadowa vande vinafiye nyo, mubabihege alondjelavo ira: <Murendele akale na nyo vande vano.> 6Nyo mwagaalondjenle, mwaona ira ukalavo mutu wa murendele orumela uwatchelani, murendele wenyu unomutitela liye. Mbwenye mwaona ira kinafuna jouwatchelani, murendele unowelela wa nyo. 7Vande munafiyede nyo mukaleve vevo, mudje eto mung'we yenno inauvaheni atu. Tchoira inafwanela ira namalaba akayena yotambilra yaye. Eto kamuindjivihege mokala. 8Sidadi ili yatene munafiye nyo, kauwatchelani pama inafwanela mudjege yenno inauvaheni atu. 9Eto inafwanela atu atene munaafwanye nyo na maurenda muwari mwa sidadi yenno, mwaavulumutche eto mwaawandele ira: <Umwene wa Mulugu uli vakwikwive na nyo.> 10Mbwenye mwavolowa sidadi imohi mwahatambilriwe pama, inafwanela muvenye mudowege. Eto mwadowaga muwongege mundila ira: 11<Hiyo nuhutatelani nyo tumbulru nafwanyeya na manyalo ehu ira ikale ionihedo zela mulandu wenyu. Mbwenye inafwanela muiziwe ira Umwene wa Mulugu uli vakwikwive.> 12Miyo nnouwandelani ira siku notonga naza nifiya, sidadi yenno inafuna ukondani, goyi diwa nnokala goyi dilukulu dokwaranya goyi nnafuna za vahiwa akuda Sodoma.>>
Tembelrelreya wa sidadi dedo dahamuwatchenle Yesu
13Yesu ohowongave eraga: <<Udilu wa weyo Korazimi! Udilu wa weyo Betisayida! Mwasiwa matikiniho muireliwe nyo sidadi mbinli di, ahakanlege matikiniho anna kaireliwa sidadi ya Tiru na Sidoni, adjindji mwa aliwa kogotwaruwa mwa jotega jiwa, kawarege masakwi, kagarati vati kavihelege ndora mmuruni mwiwa. 14Nona, siku notongiwa naza nifiya, goyi denyu nnokala goyi dilukulu dokwaranya goyi nnafuna za vahiwa akuda Tiru na Sidoni! 15Kodi weyo sidadi ya Kafaranamu unaumbuwela ira unoza ugwele zulu? Weyo unoza utatileliwe Nimburo na Anokwa.>>#10:15 Nimburo na Anokwa: Owu hehi Hades. Ti nimburo na goyi neno Mulugu nnaakoya liye atu abure kahanatatileliwe ntiya na Munlo. Nione Jowandeliwa 20:13-14.
16<<Mutu wenno unauvuruwanani, unadivuruwana miyo. Mbwenye mutu wenne unaukondani, unadikonda miyo. Eto wenne unadikonda, unamukonda wenno udirumile.>>
Welawo wa atu karumiwe na Yesu
17Nomala enne, atu 70 anne aarumile liye ale kagamanle mabasiwa, kohowelawo mohagalala, aliwa za muwandelagamo Yesu keraga: <<Nabwiya, naruma minemba dabure na nzina nenyu, minemba dabure dile nnowanda nivwelela.>> 18Evale Yesu ohawakulaga, liye ira: <<Miyo dihimuona Satana akumaga zulu, amorelaga ilambo ya vati nnga jerima. 19Kavuruwanani, miyo dihimala uvahani kopolo doira nyo mwanyingale nyowa nari awalruze eto mwanyingale kopolo da mwidani. Muwari monyingala, kilivo yabure inafuna ufwanyani. 20Nyo mbwenye kamuteyele zela minemba dabure dedo nnauvwelelani, nari. So mbwenye muteyele zela mazina enyu lrembiwa ilambo ya zulu.>>
21Mwa ora imohive yenne Yesu muwari mwa Munemba Otchena ohagalalaga, liye roma lobelaga eraga: <<Miyo nnoutamalelani nyo Babani, Mwinnya wa ilambo ya zulu na ilambo ya vati, mwasiwa nyo muhuwanda koya jengo jeji ira aliba zelru na aliba onelramo kahawande iziwa. Mbwenye muhuwanda aiziwiha ahima ang'onong'ono. Babani na ibaribari wewo ku funa wenyu ira muirena.>> 22Yesu eto ohowongaga eraga: <<Babaga udivaha jatene mmandani mwaga. Eto kalivo mutu mmohiwa udiiziwile miyo mwanaye ahali Baba. Eto kalivo umuiziwile Baba ahali miyo Mwanaye na anno anafuna miyo aiziwiha!>> 23Evale Yesu ohorungunuwa aing'ana anamamuharaye, liye awandela vewa vene eraga: <<Orelihiwa ba atu anne anaona jejo jinaona nyo! 24Na ibaribari miyo nnouwandelani ira anamafiyiheda adjindji na amwene adjindji kohofunafuna ira kaone jejo jinaona nyo, mbwenye aliwa tchaonile. Eto kohofunafuna ira kavwe jejo jinavwa nyo, mbwenye tchavwile.>>
Yofwalrafwaniha ya muSamariya mmohi wapama
25Ohokalawo namafundjiha malamulo mmohi avenyilege liye nfuka Yesu momuxixa eraga: <<Namafundjiha, dire avi ira dikayena ingumi yohomala?>> 26Evale Yesu ohomuwakula, liye ira: <<Kodi mmalamuloni mulrembiwe avi? Nnga weyo waileri, unaonelramo avi?>> 27Mundimuwole ohowakulaga ira: <<Mmalamuloni mulrembiwe ira: <Umuziveliwege Nabwiya Mulugu wawo na murimawo watene, no kalawo wawo watene, na kopolo dawo datene, no onelramo wawo watene. Eto umuziveliwege mutu uli watene nnga munaviziveliwa we wa mwinnya.> >> 28Mwa enne Yesu ohomuwakula, liye ira: <<Uhuwakula pama. Weyo inafwanela ukwakwanelihedege jejo, waira eno unokana ingumi.>>
29Evale mundimuwa wa malamulo ule mofuna vikaliha mutu okwakwanela, ohonfukaga Yesu akoka eraga: <<Kodi nfwaga bani?>> 30Evale Yesu ohomuwakulaga awongaga ira: <<Ohokalawo mulombwana mmohi akumaga Jeruzalemu adowaga Jeriko. Liye adowaga mundila, ambava kohomuhinda, aliwa mbubuda, muwungula jowara jaye, aliwa muhiya vang'ono no kwa. 31Eto fwanyeya ira ohokalawo namakuta mmohi aviraga ndila imohive yenne. Liye agamuonne mulombwanole, ohomuwereweraga, liye dowaga jaye. 32Noira eno, ohokalawo eto mulombwana mmohiwa muLevi aviraga. Agafiyile nimburo nenne, agamuonne, na liyene ohomuwereweraga, liye dowaga jaye.
33<<Jagaireyile enne vohokalaga muSamariya#10:33 vohokalaga muSamariya mmohi: Nafwanya Juwawu 4:9,20, nnovwa ira aSamariya na aJudewu tchavahana nne vang'onove. Ku wonga muJudewu agabubudiwe, aJudewu afwaye anno kali andimuwa osogolrelra ja Mulugu tchafunne mukamiheda. So amukamihedile ali mwidanaye mmohi wenno ali muSamariya. mmohi aligi muulrendoni mwaye, aviraga ndila imohive yenne. Mbwenye liye agafiyile nimburo nenne, agamuonne, ohomuwendelaga tangaranga. 34Ohowandamelaga evale, liye muhuwa jilonda jamporotchile atu jile na makura na vinyu, agairile enne liye mpota. Agampotile ohomugweliha vaburuni vaye, liye mudowana nyumba yofiyedamo alendo. Agamudowilena wewule, ohokalaga wewule amuing'anelaga. 35Mwa enne mmetcheloni muwa ohompagalrigi maliba nyumba ya alendo ule kobiri mbinli da parata,#10:35 kobiri mbinli da parata: Kobiri nnawongiwa va ali kobiri nnga mutu unatambilra liye alaba mmundani mwa nfwaye malambo menli. liye muwandela ira: <Mmukamihedege mutula. Kobiri datene munanonge nyo, miyo dawelagawo nnopagalri.> >>
36Yesu ohowongaga eraga: <<Moonelramo mwawo, kodi mwa atu araru ale, amusakanyile nnga nfwaye mutu afwanyiwe ambava ule guvi?>> 37Mundimuwa wa malamulo ule ohorumelaga, liye ira: <<Amusakanyile nnga nfwaye ali wenno amuwendenle tangaranga.>> Evale Yesu ohomuwandelaga, liye ira: <<Na wenne udowe wairege makalelo mamohive.>>
Yesu agali vande va Marta na mbalaye Mariya
38Yesu na anamamuharaye kadowagave muulrendoni mwiwa, kohofiyaga tatamo imohi. Mwa enne muhiyana mmohi wa tatamo yenne eriwa Marta, ohomutukula Yesu mudowana vande vaye. 39Marta ule ohomukana mbalaye aitaniwa Mariya.#10:39 mbalaye aitaniwa Mariya: Inafwanela niiziwe ira aMariya anafwanyeya mBibiliyani kohoindjiva. Kahi ira Mariya ula gu mmaye Yesu. Gu muhiyana mmohiwa okana nzina nimohive. Yesu agafiyile vande va Marta vale, Mariya ule ohodowaga garati manyaloni wa Nabwiya, liye vuruwanaga mazu afundjihaga Yesu. 40Marta mbwenye liye ohokalaga okukumuwene na mabasa osapa. Evale liye ohodowaga valigi Yesu vale, liye nfuka ira: <<Nabwiya, kodi nyo kamunabalra Mariya wire liye adihiyeda mabasa meka? Kamurumeni aze adikamihede!>> 41Evale Nabwiya ohomuwakulaga eraga: <<Marta! Marta! Weyo uli osanyeyene eto uhukukumuwa zela mabasa madjindji analaba we, 42mbwenye yengo yofuneya tchi imohi bahi. Tchoira Mariya uhusakulra pandi yapama eto kalivo unawande muwaka.>>
Iliyochaguliwa sasa
:
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral