Joira ja Anamarumiwa 3

Peduru na Juwawu kohonvulumutcha mutu ohowenda na nzina na Yesu

1Siku nimohi, Peduru na Juwawu kohovenya ira kadowe Nyumba ya Yehova kalobele lobela wa 15 ora, nnga veretcha atu. 2Kafunaga volowa vatando va Nyumba ya Yehova, kafiyaga wandamelana va mulango uneriwa Mulango Oriya, kaalingannena atu kamuzagana mutu abaliwe ohowendene, wenno kamuheletcha atu va mulango vale ira aavepege kobiri ale kavolowa Nyumba ya Yehova. 3Maliba rangala ule agamuonne Peduru na Juwawu kavolowaga vatando va Nyumba ya Yehova, ohavepa kobiri. 4Vevale Peduru na Juwawu kohomuing'ana pama. Peduru kwi: <<Kaniing'ane.>> 5Mutu ohowendole ohaing'anaga pama, aumbuwelaga ira: <<Anafuna kadivahe kobiri.>> 6Peduru mbwenye kwi: <<Miyo vano kadinna kobiri nne ya parata nne ya oru. Mbwenye inna miyo, nnouvaha. Mwa nzina na Yesu Kiristu wa Nazareti, nnouruma uvenye, uwende!>> 7Liye muhinda ndanda naye nodjana, muvenyiha. Mwa sanga sanga manyalo aye na mmafwarafwadjuni mwaye mohokala pama. 8Vevale mutule ohovenya molupa, roma wenda. Liye volowa vatando va Nyumba ya Yehova vamohi na Peduru na Juwawu, awendaga pama, alupaga, amutamalelaga Mulugu.

Laleya wa Peduru

9Vevale atu atene kafwanyeyaga evale kohomuona awendaga, amutamalelaga Mulugu. 10Kagamuonne eno, kohotutuwa, katikiniheyaga zela yenno yamuireyele mutule. Mwa enne aliwa kohoona ira: <<Mutula gwenne ahawendetchole, akaletcha Mulango Oriya wa Nyumba ya Yehova avepaga kobiri.>> 11Maliba vulumutchiwa ule ohomubandaga Peduru na Juwawu, liye aharaga wadowa atu. Evale aliwa kohodowa nikonde nimohi nnaitaniwa Nikonde na Salomawu. Mobaranya atu oindjiva kohorindja vali atu vale, katutuwaga.

12Peduru agaonne gumana wa anamwindji ale, ohowonga eraga: <<Alombwana afwaga a Izarayeli, munatutuwela nni? Munaumbuwela nnga mutula unvulumutchile gu hiyo vano mwa kopolo dehu zela upama wehu? Kahi hiyo. 13Mulugu wa Abarahamu, Mulugu wa Izaki na Mulugu wa Jako, vamohi na Mulugu wa makolo ehu gumutitimihile Yesu Namalaba#3:13 Namalaba owu hehi Mwana. Sawasawa Joira ja Anamarumiwa 3:26, 4:27,30. waye muwari monvulumutcha mutula na nzina na Yesu. Yesu gwenno mmutukunle nyo, munvaheda mmandani mwa mundimuwa Pilatu. Pilatu afunaga mukutcha, nyo eto mohoroma muruniha, mmukondaga Yesu. 14Nyo mohonkonda Mutu Otchena, Mutu wapama, mmurumelaga mpanga ira atapuliwe, Yesu mbwenye apiwe. 15Nyo mohompa Namavaha wa Ingumi. Mulugu eto ohonvenyiha mokwani. Hiyo mbwenye nihikana umboni ira Yesu ohovenya mokwani. 16Zela wa mutula, liye uvulumutchiwe na nzina na Yesu. Mutula uvulumuwele na mwasa wa nroromelo nehu wa Yesu. Nyo eto momuiziwa makalelo anna liye. Muwari momuroromela Yesu, peno mutula uli wapamene. Munowanda muona, uli eva vamentoni va nyo mwatene.>>

17<<Abalaga, miyo eto dihiiziwa ira nyo na ale anousogolrelrani mohompa Yesu muwari mohoiziwa yengo tchivi. 18Eto ilukuluwa tchoira Mulugu ere kwakwaneliheda jawongile liye wanle mwa anamafiyiheda atene a malambo a mundulrimu ira Namatikeliwa wa Mulugu aza, unoza aonihiwe goyi. 19Mwa eno, nyo mutwaruwe, muwelele wa Mulugu ira jotega jenyu jikurumuweliwe. 20Mwaira eno Nabwiya unouvahani iwandelo ira malambo matene mukale opwaseyene mmirimani mwenyu eto unomuruma Namatikeliwa wehu Yesu wenno amusakunlre liye, aze akale na nyo. 21Yesu mbwenye unokalave zulu fiyeda tempu inafuna za tchindjeya jatene jene ira jikale pama akoka nnga Mulugu mwawongele liye wanle muwari mwa anamafiyiheda otchena.

22<<Mozeji na liyene ohowonga ira: <Muwari mwa nlogo nehu, Nabwiya Mulugu unoza anirumele namafiyiheda mmohiwa okala nnga ha miyo. Aza, mutu uli watene inafwanela anvwelelege jinafuna liye wonga. 23Mutu uli watene ahanafuna nvwelela namafiyiheda wenno, unopiwa ira ahafwanyeye muwari mwehu.> >> 24Peduru ohowongagave eraga: <<Anamafiyiheda atene owonga mazu a Mulugu kuma Samuweli zaga sogolro kawonga zela jinaireya malambwala.

25<<Nyo eto muli ahima a anamafiyiheda, muli ahima a yopangana Mulugu asakannye liye na makolo enyu. Mulugu opangana na Abarahamu ira: <Mwa ahimawo a musogolro, malogo matene a ilambo ya vati anoza karelihiwe.> 26Mwa eno, Mulugu ohonvenyiha Mwanaye mokwani. Aganvenyihile mokwani, muwari mwa malogo matene a ilambo ya vati ababihile muruma wa nyo ira aze aureliheni muwari mokwakwaneliheda nipangano nne, ira kada mutu ahiye jotakala jaye.>>#3:26 MaBibiliya amohiwa kinazana mazu owonga jovenyihiwa wa Yesu mokwani. So anawonga ira Mulugu ohokwakwaneliheda nipangano neno muwari momuruma Yesu Namalaba waye, liye babiha za wa nyo ira aureliheni muwari moutwarutchani nyo mwatene ira muwande hiya jotakala jenyu.

Iliyochaguliwa sasa

Joira ja Anamarumiwa 3: iLolo

Kuonyesha

Shirikisha

Nakili