Joira ja Anamarumiwa 2
2
Za wa Munemba Otchena
1Siku na Pwando ya Johanda Joroma#2:1 Pwando ya Johanda Joroma yali pwando yomutamalela Nabwiya Mulugu zela udja wahanda atu. AJudewu kohotongiwa na Mulugu ira kamala handa jodja jiwa, kadje Pwando ya Johanda Joroma. (Ezodu 23:16, 34:22) Kamala dja Pwando ya Johanda Joroma, vamala malambo 50 padja atu Pwando ya Mavirelo. Sawasawa nnga Pwando ya Mavirelo yoholingana na siku nakumile aIzarayeli muIjipitu, Pwando ya Johanda Joroma tchi yenno yalinganne na siku notambilra Malamulo Kumi a Mulugu. nagafiyile, anamamuhara Yesu kafwanyeya kagagumanne vamohive. 2Morurumutcha wohozaga kukuma ulukulu wokumela zulu nnga womba wa nipevo nlukulu. Kukuma ule wohozalaga nyumba yatene mwagaratilege atu mule. 3Evale kohoona jengo jakalaga nnga malumi a munlo jazilege, aliwa mwadeya muwari mwa aliwa atene, za kala vazulu va kada mutu. 4Mwa enne atene kohozaleliwa Munemba Otchena eto aliwa roma wonga na viwongelo dimohi diwa dahafundjile atu, malringana Munemba mwanvahele liye kada mutu ira awongege.
5MuJeruzalemu mule mohokala aJudewu omuriheda Mulugu kakumile vilambo datene da ilambo ya vati.#2:5 aJudewu omuriheda Mulugu kakumile vilambo datene da ilambo ya vati: Mulugu oharuma aIzarayeli ira: <<Nyo kamunavelelege mikuto daga vaheno vene. Munerege pa nimburo nnafuna miyo uwandelani.>> (Detoronomiyo 12:11-14) Nimburo nasakunlre Mulugu ali Nyumba ya Yehova muJeruzalemu. Nyumba ya Yehova mwilamboni ya vati yali imohive. Afwase aJudewu kakala vilambo dohiyana-hiyana kazile ira kawande pa vinyama, kapiha mendo diwa, aliwa za Jeruzalemu ira kawande kuta mikuto diwa na makalelo afunne Nabwiya Mulugu. Nione eto (Detoronomiyo 16:5-16) 6Kavwaga aliba zeliwa Munemba Otchena kawongaga, atu oindjiva kohogumanelavo. Evale kohokukumuwaga mwasiwa kada mutu ovwaga mazu na iwongelo yaye. 7Kohokukumuwaga eto kohotikiniheyaga kafukanaga ira: <<Atu anawonga eni ala kakumile ilambo imohive ya Galileya. 8Kodi anawanda avi wonga, fiyeda kada mutu muwari mwa hiyo liye vwaga na iwongelo ibaliwena liye?>> 9Tchoira atu ovwale kali atu ohiyana-hiyana. Kohokalavo aParto, aMediya, aElami, aMezopotamiya, aJudeya, aKapadosiya, aPonto, aAziya, 10aFirijiya, aPanfiliya, aIjipitu, atu a ikukuru ya Libiya wandamelana Sirene, aRoma. 11Amohi aJudewu mobaliwa, amohiwa ohara mangano a aJudewu. Amohi aKereta, akuda Araba, atu ohiyana-hiyana. Atu kwi: <<Hiyo nnoavwa kawongaga zela jotikiniha ja Mulugu. Kada mutu unavwa na iwongelo yaye.>> 12Vevale aliwa kohokala otikiniheyene eto okukumuwene keraga: <<Jeji jinatapulela nni?>>
Laleya wa Peduru
13Amohiwa eto koapeta keraga: <<Atwala kere lrezelra na vinyu muxa.>>#2:13 vinyu muxa: Ora yenno atu kasakanyaga vinyu muxa, vinyu ule otapilra. Mutu ang'waga muwari moziveliwa tapilra wewo agomela lrezelra. 14Evale Peduru na afwaye kumi na mmohi kohovenyaga. Peduru ohawandelaga na mazu okuwa eraga: <<Alombwana a Judeya, atu atene anafwanyeya mwemu muJeruzalemu, mudivuruwane pama inafuna miyo wonga ira muonelremo pama inaireya va. 15Atwala kilrezenlre nnga munaumbuwela nyo. Ora ila ya 9 ora kahi tempu yolrezelra. 16Inaireya tcheniyo yawongile namafiyiheda Joweli wanle ira:
17 <Mulugu unawonga ira: <<Miyo malambo ogomiheda, nnoza dimurume Munemba waga ira aazele atu atene. Ahiminyu a anapongwe, nari ahiminyu a ahiyana, mwa Munemba anoza kafiyihedege mazu. Muwari mwa nyo, azombwe anerege ona jengo mmuruni mwewa, kawandeliwaga ja Mulugu. Andimuwa anerege wandeliwa jengo moroha. 18Malambo anne miyo nnoza dimurume Munemba waga ira aazalele atwaga anafwanyeya kagali azari a alombwana nari azari a ahiyana. Aliwa anerege fiyiheda mazu a Mulugu mwa Munemba. 19Miyo nnoza dirume jionihedo mwilamboni ya vati. Jinoza jioneye jengo johiyana hiyana, sangiri, munlo na utchi. Eto nnoza dirume jotikiniha zulu. 20Nzuwa nnoza nidibe, mwedi unoza afile nnga sangiri. Jatene ejo jinoza jiireye nahanafiye siku nindimuwa eto notikiniha na Nabwiya. 21Evale ule unadivepe na nzina naga dagali Nabwiya, mutu wenno unovulusiwa.>> > >>#Joweli 2:28-32
22Peduru ohowonga eraga: <<Muvuruwane pama alombwana a Izarayeli inafuna miyo duwandeleni. Nyo muhumala iziwa joira na jotikiniha na jionihedo johokala ja masika Mulugu airile liye muwari mwa mulombwana mmohi eriwa Yesu wa Nazareti ira mukayena ibaribari zela liye. 23Nyo mwagaonne jatene jene jaira Yesu, mohorimbitula, nyo dowa mukomeliha, nyo mpa monvaheda mmandani mwa atu otega. Jatene ejo johokwakwanela funa wa Mulugu nnga mwabalrele liye wanle. 24Mbwenye masiki Yesu akwileve, Mulugu ohomuvenyiha, amukutchaga mokwani mwasiwa ukwa kwawanda mugondjiha.
25<<Mulombwana Davi eto oholremba mazu zela Yesu oira:
<Miyo domuonetchave Nabwiya agali vamohi na miyo. Tchoira liye uli ikukuru yaga ya muwononi odjana ira miyo dahakukumuliwege. 26Nona murima waga unohagalala eto nlumi naga nnowonga mazu oteyela. Maningo aga anovuma muwari mokana yoing'anela. 27Miyo dihiiziwa ira nyo Mulugu kamunahiya munemba waga dowa Nimburo na Anokwa. Miyo dihiiziwa ira nyo kamunamuhiya Mutu wenyu Otchena maningo aye kavunda, nari. 28Nyo muhumala diwandela ndila da ingumi. Miyo nnokala ozaleliwene no hagalala mwasiwa nyo muli na miyo.> >>
29Peduru ohowongagave eraga: <<Abalaga, miyo nnafuna duwandeleni ibaribari ira nikolo nehu Davi ohokwa, liye koyiwa eto fiyeda peno nihiiziwavo vakoyiwe liye. 30Davi muwari mokala namafiyiheda wa Mulugu eto aiziwaga ira Mulugu oholumbela ira: <Mwa ahimawo a musogolro, ukala mutu unafuna za agarati vampandoni vawo va umwene>, 31Davi ohoona jafuna za ireya eto ohowonga zela venya mokwani wa Namatikeliwa afuna za ira Namatikeliwa ule kaza ahiyiwa Nimburo na Anokwa, nne maningo aye tchavunda.
32<<Mutu Mulugu anvenyihile liye mokwani ali Yesu. Hiyo anamarumiwa atene nili eva nili amboni ira Yesu uvenya mokwani. 33Agavennye mokwani, ohodowiwana zulu, Mulugu ohomuriheda anvahaga nimburo na muwononi odjana waye#2:33 nimburo na muwononi odjana ku wonga nimburo na utongi. eto anvahile Yesu ira amurume Munemba Otchena nnga Mulugu apanganne liye. Jatene jinaona nyo na jinavwa nyo, jinazela muwari mwa Munemba Otchena umurumile Yesu.
34<<Tchoira afuna gwela zulu kaali Davi. So mbwenye Davi oholremba ira:
<Nabwiya uwonga na Nabwiya waga eraga: <<Ugarati muwononi waga odjana 35ante difiyede agondjiha amwidanawo ira kakale nnga yengo yonyingalihavo manyalo awo.>> > >>
36Evale Peduru ohowongaga, liye ira: <<Nnouwandelani nyo nlogo na aIzarayeli muiziwe ira Yesu wenno mumpile nyo, Mulugu ohomuhambiha ira akale Nabwiya eto akale Namatikeliwa.>>
37Kagavwile mazu anno, atwale kohokukumuwa valukulu, aliwa nfuka Peduru na anamarumiwa afwaye keraga: <<Ki abalihu, niire avi?>> 38Peduru ohawandelaga eraga: <<Nyo mwatene mutwaruwe, mubatiziwe na nzina na Yesu Kiristu. Mwaira eno, jotega jenyu jinokurumuweliwa. Eto mwa sayi da Mulugu munomuwatchela Munemba Otchena.#2:38 Eto mwa sayi da Mulugu munomuwatchela Munemba Otchena. Mazwala kinawonga ira mutu unovahiwa Munemba Otchena muwari mobatiziwa. Tchoira mazu anawonga ira kohokalawo atu katambilra Munemba Otchena kahanabatiziwe. (Joira ja Anamarumiwa 10:44-48) Eto nafwanya Efezo 1:13, nnovwa ira mutu unotambilra Munemba Otchena ora inamuroromela liye Yesu. Eto ule ahanna Munemba Otchena kali na Mulugu. (Roma 8:9) Mazwala eto kinawonga ira mutu unoleveleliwa jotega jaye muwari mobatiziwa. So anamuwandela mutu ira ule unamuroromela Yesu inafwanela abatiziwe. 39Nipangano neno nizele nyo na ahiminyu na atu ali olapela wene. Izele atu atene Nabwiya Mulugu wehu unaaitana liye ira kaze wa liye.>> 40Mulombwana Peduru ohokalelagave laleya, adowagave sogolro, aawandelaga atu mazu madjindjene. Ohawelruza eraga: <<Inafwanela muvivunele tawiha ira munaze mutongiwe na atu abure a tempu ili hiyo ila.>> 41Ale karumenle mazu a Peduru, kohobatiziwa. Evale siku neno wandamelana atu 3.000 kohogumanela vamohi na atu omuroromela Yesu oromale.
Wenda wa atu omuroromela Yesu oroma
42Aliwa kofundjihiwave na anamarumiwa, aliwa wendaga vamohi, meyaga pawu#2:42 meyaga pawu: Muwari momeya pawu mule, atu omuroromela Yesu kadja seya muwari moumbuwela ukwa wa Yesu. vamohi, aliwa lobelaga vamohi. 43Mwa tempu yenne, atu atene kakala otikiniheyene mwasiwa Mulugu oirana jengo jotikiniha na jionihedo muwari mwa anamarumiwa. 44Atu omuroromela Yesu atene kakala vamohi eto kovahana jengo jatene janna atu. 45Aliwa kotukula jengo na fwaramento danna atu, aliwa dowa gulihaga, tukula kobiriwa, za agawelaga ale kasimenle muwari mwewa. 46Malambo matene aliwa kodowetcha vamohi Nyumba ya Yehova.#2:46 Nyumba ya Yehova: Nione foto na rodape unafwanyeya Matewuji 4:5. Aliwa dowaga vamohi mmavande mwiwa, aliwa meyaga pawu, kadjaga vamohi. Muwari modja emule, kohagalala vamohi, aliwa vahanaga jodja jiwa. 47Aliwa kawenda kamutamalelaga Mulugu, kawandanaga na atu atene. Va kada siku Nabwiya oavulusa atu amohiwa, aliwa indjivanagave.
Iliyochaguliwa sasa
Joira ja Anamarumiwa 2: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral
