2 Korinto 8
8
Jokokomeza ira aKorinto kaakamihedege afwiwa kasimenle
1Hiyo abalihu nnafuna nyo muiziwe zela sayi da Mulugu dedo daavahile liye makuru a atu omuroromela Yesu a Masedoniya. 2Sayi diwa tchoira masiki aliwa kagalive muwari moxixiwa na makatamiho ohokala a masika eto kagali muwari mosimela undimuwa, aliwa kohowanda akamiheda afwiwa mohagalala.#8:1-2 sayi da Mulugu dedo daavahile liye makuru a atu omuroromela Yesu a Masedoniya: Sayi da Mulugu nnawongiwa ku wonga Mulugu aavahile atu omuroromela Yesu kafwanyeya muwari mosimela zelru na kopolo dowanda soka kobiri ira kaavahe afwiwa kasimenle kwaranya. Ku wonga sawasawa nnga vulusiwa uli muwari mwa sayi da Mulugu, mutu agavulusiwe ira airena yengo yapama, ti sayi da Mulugu. Tchoira ahakala sayi da Mulugu, kagavwile ira: <<Kobiri inasokiwa para atu omuroromela Yesu kasimenle>>, akuda Masedoniya kogowonga ira: <<Na hiyene nnofuna jokamihediwa.>> 3Miyo eto nnoahidedela umboni ira aliwa kohowanda velela na makalelo okwaranya, moholingana na jengo janna atu.#8:3 moholingana na jengo janna atu: Ku wonga aliwa kohovaha na makalelo kwaranya mwaumbuwela Pawulo. Velela uwa, kohovelela na mmirimani mwewa mwatene, 4aliwa nivepaga na ntindi ira: <<Na hiyene nnafuna nigumanele na afwihu anafuna soka kobiri ira niwande akamiheda afwihu otchenihiwa kasimenle.>> 5Yeniyo eto tchairilena na makalelo mwaumbuwela hiyo. Aliwa mbwenye karomile vivaheda mmandani mwa Nabwiya. Nomala eno, muwari mofuna mwa Mulugu, aliwa za vivaheda mmandani mwihu.#8:5 karomile vivaheda mmandani mwa Nabwiya: Ku wonga aliwa kahanakumihe kobiri, aliwa kohowonga na Nabwiya ira: <<Jatene jinna hiyo, kalawo wehu watene, kana wehu watene, nnahiya mmandani mwenyu.>> Evale eto mofuna mwa Mulugu, aliwa za vivaheda mmandani mwihu: Ku wonga aliwa tchaonne aPawulo nnga atu owonga zelru dakumilena atu vande viwa. Kohowanda iziwa ira: <<Atwala kawongaga, kasokaga kobiri, anairana muwari morumiwa na Mulugu.>> Evale kohowanda tukula kobiri, aliwa hiya mmandani mwa aPawulo ira aliba simela kakamihediwe.
6Wanle Titu ohouwandelani zela ja sokasoka ji. Eto fendo ila vamaruwa liye azaga wewo, hiyo nohonvepa ira aukokomezegenive ira mukwakwanelihede zela sayi doakamiheda afwihu. 7Nyo muli atu a nroromelo, muhuiziwa wonga pama, muli atu okana zelru eto muli atu oirana japama. Voira jatene ejo munoirana pama, inafwanela nyo atu anaazivela hiyo mulabe pama zela jovahana ji.
8Miyo dawongaga eni, kahi ira nnaurumani. So miyo nnawongela ira mwagaonne upama unera afwinyu a Masedoniya, na nyenne mulimbihiwe muwari movaha ira zivela wenyu uoneye ira kwa ibaribari. 9Tchoira nyo muhuiziwa sayi da Nabwiya wehu Yesu Kiristu. Liye masiki alive orayela, osanduwa, liye kala osimela ira nyo muwari mosimela mwaye, muwande rayela.#8:9 liye kala osimela ira nyo muwari mosimela mwaye, muwande rayela: Ku wonga muwari mosegedeya mwaye puzile vulusiwa wehu. Rayela unawongiwa va kahi kana ja ilambo ya vati mbwenye rayela zela kana ingumi ixa muwari mwa Yesu Kiristu.
10Nnafuna dukokomezeni onamo waga zela jovaha ji. Miyo nnaonamo ira inafwanela muvelele mwasiwa nyo mwali arandji soka yaka ile eto hiya kala arandji soka bahi, nyo eto mwali ofuna velela na mmirimani mwenyu mwatene mofuna mwenyu. Mabasa anno anairana nyo pakana peno, ba mabasa anafuna upindulrani. 11Mwa eno, inafwanela mudowegenave musogolro ante mufiyede mariha yofuna yenyu yanna nyo voroma vene#8:11 mufiyede mariha yofuna yenyu yanna nyo voroma vene: Mazwala anoniwandela ira aKorinto karomile umbuwela makalelo kafuna atu vaha. Kagamanle pangana makaleluwa, so yahanle yali irana. Tapulela eto ira inafwanela mutu ahanape kobiri daye, arome umbuwela makalelo anafuna liye vaha agapile kobiri diwa. Nione 2 Korinto 9:7. hiya gomela vari. Malringana muvahe muwari mwa yenno inna nyo.#8:11 Malringana muvahe muwari mwa yenno inna nyo. Ku wonga kinafwanela mutu akukumuwe akala vaha waye uhakwaranya afwaye owu hehi afwaye kohomukwaranya. Malringana kada mutu aone inna liye eto aone inawanda liye vaha. 12Tchoira mutu afuna vaha na mmirimani mwaye yengo inna liye, yovaha yofwanela tcheniyo inavaha liye na mmirimani mwaye zela vigomenle liye. Mwasiwa kalivo unakosiwa yengo yahanna liye.
13Dawongaga eno, kannawonga ira afwinyu kawande kala pama, nyo aliba akamiheda mukukumuliwe, nari. 14So mbwenye miyo nnawonga muwari moira kana unna nyo tempu ila uvunguwe vang'ono muwari moakamiheda ira atene mukale okanene.#8:14 atene mukale okanene: Mazwala anakala nnga Joira ja Anamarumiwa 4:34-35. Fwanyeya ira muwari movahana waira atu omuroromela Yesu oroma, kafwanyeyavo mutu asimenle muwari mwa atu omuroromela Yesu. Kawongaga ira atene kali okanene kahi ira atene kohokana karo na jorayela pwi, mbwenye ku wonga ira kalivo asimelela jodja, jowara, na vogona. Atu omuroromela Yesu oroma koagawela ahiyana ohokana yengo jodja jiwa siku na siku. (Joira ja Anamarumiwa 6:1) Ku wonga kahi ira atene kere kala orayelene mbwenye atene kakala okanene zela ja siku nenne. Eto na aliwene kaza kakana sogolro, kawande ukamihedani ira atene mukale okanene. 15Kalaga nnga mazu kalrembiwe wanle oira:
<<Wenno agudile pwi, apima, kajakalawo johala eto wenno agudile vang'ono, apima, kajahalela.>>#8:15 Mazwala kakumile Ezodu 16:18. Anawonga zela aliba doda mana.
Pawulo ohawandela aKorinto zela atu kafuna dowa kaapande
16-17Hiyo nihiwonga na Titu tchineneva ira awelele wa nyo akoka. Liye uhurumela vepa wehu ira aze aupandeni. Hiya vepa wehu bahi, liye unavenya ira aupandeni na mmirimani mwaye mwatene. Nona Mulugu atamaleliwe, na mwasa oira liye gunvahile zelru mulombwana Titu ira akayena funafuna ukamihedani nnga funafuna unna miyo.
18Hiyo eto nnomuruma mbalihu mmohiwa ira adowe vamohi na Titu. Mulombwana unafuna hiyo muruma gwenno usimbwile iziweya muwari mwa makuru matene a atu omuroromela Yesu zela laleya waye wa Muselu Wapama. 19Hiya laleyave, liye gwenno makuru a atu omuroromela Yesu kamusakunlre atu ira awende vamohi na hiyo ulrendo wehu odowana josokasoka jinasogolrelra hiyo. Nnasokela ira Nabwiya mwinnya atitimihiwe eto ira naaonihe afwihu zela zivela wehu. 20Jatene eji nnerela ira ahakalevo mutu unafuna niwanganyeda zela yovaha yapama inasogolrelra hiyo.#8:20 nnerela ira ahakalevo mutu unafuna niwanganyeda: Pawulo afuna ale kakumiha kobiri kamurume mutu mmohi ira adowe vamohi na liye ira akale mboni ira kobiri aliwa kofiyana tawiha ira adowana eka, anamunukede ira: <<Pawulo unaadjelra atu kobiriwa.>> 21Tchoira hiyo kannafuna irana yapama vamentoni va Nabwiya bahi gomela eno. Nnafuna eto niirena yenno ili yapama vamentoni va atu.#8:21 Nnafuna eto niirena yenno ili yapama vamentoni va atu. Fwanyeya ira Pawulo kafunne ira Mulugu eka akayena ibaribari zela joira jaye. Afuna na atwene kahakayena tempu yomuwanganyeda.
22Hiyo eto nnomuruma mbalihu mmohiwa ira aze vamohi na afwihu ambinli ayo. Liye gwenno ninvahile hiyo mabasa fendo didjindji, hiyo muonaga ira gu mutu oirana ja Mulugu muwari mwa jatene. Liye agavwile zela makalelo munna nyo, funa waye oirana ja Mulugu unadowave sogolro.
23Zela Titu, liye gwenno unalabetcha vamohi na miyo ira nyo mukale pama. Zela abalihu amohiwa ambinli ala, aliwa ba atu orumiwa na makuru a atu omuroromela Yesu. Aliwa eto anafwanyeya kagali aliba oniha undimuwa wa Kiristu.#8:23 Aliwa eto anafwanyeya kagali aliba oniha undimuwa wa Kiristu. Aliwa makalelo kanna atu ali nnga makalelo a Kiristu. (2 Korinto 8:9) Sawasawa nnga Kiristu jairile liye, aliwa kohorumela simela ira atu amohiwa karayele. 24Inafwanela mwaairelege alombwana anno upama ira kawelela wa makuru a atu omuroromela Yesu, kawonga upama wenyu, afwiwa kakayena ibaribari zela zivelana wenyu eto kakayena ibaribari zela mwasa unautitimihanani hiyo.#8:24 kakayena ibaribari zela mwasa unautitimihanani hiyo: Ku wonga Pawulo eretcha wonga mazu apama zela afwaye omuroromela Yesu a Korinto. Liye afuna aKorinto kaawatchele alendo kafuna za na manda menli ira upama wawongetcha liye uoneye pama.
Iliyochaguliwa sasa
2 Korinto 8: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral