1 Korinto 15
15
Pawulo unaawumbutcheda afwaye zela Muselu Wapama
1Va abalaga, nnafuna duwumbutchedeni Muselu Wapama dulaleyileni miyo. Dagaulaleyileni, muhuwatchela muselu ule eto pakana peno mulive oimelene na muselu mmohive. 2Eto munavulusiwa muwari mwa muselu wenno. Malringana mwahahiye mazu anno dulaleyileni miyo. Tchoira mwahiya mazu daulaleyileni miyo, ku wonga mmuroromenle Yesu vasayi vene.#15:2 mwahiya mazu daulaleyileni miyo, ku wonga mmuroromenle Yesu vasayi vene: Muroromela Yesu wa wenno unahiya nroromelo naye kwaali wa ibaribari mbwenye wali wa mwisezoni. Wenno unawelela mundulri unaoniha ira masiki ora yawenda liye na afwaye omuroromela Yesu, liye mbwenye kamuroromenle Yesu mwa ibaribari. Nione Matewuji 10:22, 13:21, 24:13; 1 Korinto 6:9-11; Eberewu 3:6,14, 6:4-9, 10:26-27; 1 Juwawu 2:19, 3:8-10.
3Miyo nnafuna duwandeleni akoka mazu amohive nnga mwawandeliwe miyo. Yengo ilukulu ya ibaribari iwandeliwe miyo tchoira Kiristu ohokwela jotega jehu nnga mwemo mwalrembele atu mMazuni. 4Yesu agakwile, ohokoyiwa. Agakoyiwe, vagamanle malambo mararu, ohovenya mokwani nnga mwemo mwalrembele atu mMazuni. 5Agavennye mokwani ohomukumelela mulombwana Peduru. Akumaga evo, ohakumelela anamamuharaye kumi na ambinli. 6Nokuma evo, siku nimohi liye ohakumelela abalihu omuroromela Yesu kwaranya atu 500, fendo imohive. Mwa atu anno, oindjiva na vanove kohokalawo. Amohiwa vari na vari kohogona gona wa ukwa. 7Yesu agamanle akumelela abalihu oindjiva, ohomukumelela mulombwana Tiyagu. Nomala evo ohakumelela anamarumiwa atene.
8Mutu ogomiheda kumeleliwa eto ogomiheda muona Yesu gu miyo. Yesu adikumelenle nnga mwana obaliwa tempuwa yagakwaranyile.#15:8 nnga mwana obaliwa tempuwa yagakwaranyile. Owu hehi ora imohiwene. 9Tchoira muwari mwa anamarumiwa atene, miyo dili ogomiheda eto kadili ofwanela itaniwa namarumiwa wa Yesu, mwasiwa miyo doaharaharetcha atu omuroromela Yesu, anno anafwanyeya kagali nikuru na Mulugu.
10Miyo malambwala makalelo anna miyo kazenle muwari mwa sayi da Mulugu. Sayi diwa udivahile Mulugu kadivahiwe vasayi vene mbwenye dihilabana mabasa akwaranya anamarumiwa afwaga atene. Dawongaga eno eto, kannawongela ira miyo mabasa anno dilabile na kopolo daga, mbwenye diwandile laba muwari mwa sayi da Mulugu bahi.
11Akala mulaleyiwe na miyo, akala mulaleyiwe na anamarumiwa afwaga, ilukuluwa tchoira hiyo nnalaleya eto nyo muhuroromela muselu ulaleyiwe nyo.
Atu omuroromela Yesu anoza kavenyihiwe mokwani
12Akala hiyo nnoulaleyani ira: <<Kiristu uvenya mokwani>>, nyo eto munawanda avi wonga ira: <<Mutu akwa, kanavenya mokwani.>>? 13Tchoira akala atu kakwa kinavenya mokwani, era eno, Kiristu na liyene kavennye mokwani. 14Akala Kiristu kavennye mokwani, hiyo nnalaleya vasayi eto nyo munamuroromela Kiristu vasayi. 15Akala na ibaribari atu kakwile kinavenya, Kiristu na liyene kavennye eto hiyo anamarumiwa nihikana mulandu omunukeda Mulugu nilaleyaga niiraga: <<Mulugu unvenyiha Kiristu mokwani.>> 16Tchoira akala atu kinavenya mokwani, Kiristu na liyene kavenyihiwe mokwani. 17Vamohive vevo akala Kiristu kavenyihiwe mokwani, muroromela Kiristu wenyu kunna mabasa eto mulive na jotega jenyu. 18Eto akala Kiristu kavenyihiwe mokwani, ale kakwile kamuroromelaga Kiristu, kohomala tolowa. 19Akala hiyo nnamuroromela Kiristu ira anikamihede tempu ili hiyo ila bahi, akala sogolro kaninna yodediheda, mwa atu atene a ilambo ya vati, tangaranga para hiyo.
20Mbwenye Kiristu na ibaribari ohovenya mokwani. Venya waye watonyiheda ira ale anagona anoza kavenye. 21Tchoira sawasawa nnga atu karomile kwa muwari mwa mabasa a mulombwana mmohi, atu anovenya mokwani muwari mwa mabasa a mulombwana mmohi. 22Tchoira sawasawa nnga atu atene anafwanyeya munikuruni mwa Adawu anokwa, atene anafwanyeya munikuruni mwa Kiristu anoza kakayena ingumi.
23Zela venya mokwani, kahi ira atu atene anovenya fendo imohive, nari. Tchoira murandji venya ali Kiristu. Venya waye wanitonyiheda ndila inafuna atwaye hara Yesu aza azaga.
24Liye aza, aavenyihaga atwaye mokwani, ku wonga wewo ku makutulo. Tchoira Yesu agamanle gondjiha utongi watene nari umwene watene nari kopolo datene, tchi tempu inafuna liye tukula umwene waye, anvahede Mulugu. 25Tchoira inafuneya liye atongege fiyeda mwezo oanyingala amwidanaye atene. 26Mwidani ogomiheda unafuna liye mutolotcha ku ukwa.
27Tchoira Mazu anawonga ira: <<Mulugu uhela jatene vati va manyalo aye.>>#Salmu 8:6 Kawongaga keraga: <<jatene jiheliwe vati va manyalo aye>>, ihimala iziweya ira Kiristu unotonga jatene muhiya Mulugu wenno unvahile ira atongege. 28So Mulugu utukula jotonga jile, liye nvaheda mwanaye ira: <<Udowe watonge.>> Mwanaye agamanle tonga jatene, tchi tempu yenno inafuna liye za welela tongiwa na Mulugu wenno anvahile ira atonge jatene ira Mulugu akale mwinnya otonga jatene jinafwanyeya mwatene mwene.#15:28 Mulugu utukula jotonga jile, liye nvaheda mwanaye: Voroma vene, Mulugu ohompandutcha Adawu na Eva ira kakale atu otonga jatene. Vaimwananne atu tonga na matongelo a Mulugu, Mulugu eto ohofiyeda mwezo otamiha utongi watene ira ukale wa Yesu Kiristu waye. Agali Yesu na liyene gu Mulugu, muwari mobaliwa na maningo a mutu, liye owanda hamba mabasa anna Adawu. Vasogolro, Yesu Kiristu unomuweliheda Mulugu utongi wenno unvahile liye. Pa evo vanafuna Mulugu tonga jatene muwari mokala mwinnya otonga jatene jinafwanyeya mwatene mwene.
29Muumbuwele vinera atu anne anabatiziwa vamalroni va ale kakwile kahanabatiziwe.#15:29 atu anne anabatiziwa vamalroni va ale kakwile kahanabatiziwe: Kohokalawo atu a ilambo ya Korinto tempu yenno kaumbuwela ira: <<Hiyo nnafuna nibatiziwe vamalroni va atu kakwile wanle kahanabatiziwe ira kawande vulusiwa.>> Mbwenye kanaaiziwile atuwa, kaya kafwanyeya kagali atu omuroromela Yesu, akala kali aJudewu, akala kali atu ohara vikwamutu josema, kaniiziwile. So iiziwile hiyo tchoira aliwa jatene eji kohononga. Mwasiwa ira mutu awandane na Mulugu, unaroma wandana na Mulugu agaliwo. (Eberewu 9:27-28) Pawulo awonga mazu anne malro okokomeza ira akala atu amohiwa anowanda roromela ira mutu unovenya mokwani, inafwanela eto atu omuroromela Yesu karumelege ira mutu akwa, unovenya mokwani. Aliwa anafuna nni kairagana eno? Ahakale aliwa kaharumela ira mutu unovenya mokwani, tchafunege joira kabatiziwe vamalroni va atu kakwile wanle.
30Nnga mwasiwa gwa nni miyo rumelaga piwa ora ili yatene?#15:30 Pawulo muwari molaleya Muselu Wapama, ohorumela piwa ora ili yatene mwasiwa liye ohokana ibaribari ira: <<Dakwa muwari molaleya Muselu Wapama, kavali makani, mwasiwa miyo nnoza divenyihiwe mokwani.>> 31Miyo abalaga, akala nyo muhuiziwa ira dihikana hagalala zela nyo mwasiwa hiyo atene nili muUmweneni mwa Yesu Kiristu Nabwiya wehu, inafwanela eto muiziwe ira malambo matene dawendaga nnahala vang'ono ira dipiwe.#15:31 malambo matene dawendaga nnahala vang'ono ira dipiwe owu hehi miyo nnokwa malambo matene.
32Dagali ilambo ya Efezo miyo dihiwana na vinyama da mukokolani.#15:32 miyo dihiwana na vinyama da mukokolani: Kaniiziwile pama zela jowana na anavinyama jinawongiwa eva. Afwase Pawulo unawonga zela ale kamuharahara na mwasa wa jolaleya jaye. Kalaga nnga Davi mwasiwa Davi aaitana ale kamuharahara anambwa. (Salmu 22:16, 59:6) Kodi muwari mowana dafuna diganyalri ja ilambo ya vati? Akala mutu kanavenya mokwani, valepena nidjege, ning'wege, mwasiwa metchelo ihanle ku kwa bahi.
33Nyo kamunyengiwe. Wandana wabure unononga mawendelo apama.#15:33 wandana wabure unononga mawendelo apama: Ku wonga mutu unawenda na upama, aroma wenda na atu anairana jabure, unohiya ipamaye ira aaharege ale anera jabure. 34Murome umbuwela japama jinafwanela para nyo. Eto muhiye makalelo otega munna nyo. Tchoira miyo nnoona ira muwari mwa nyo, kohokalamo atu ohomuiziwa Mulugu. Dawongaga eno, ba manyazo para nyo.
Atu omuroromela Yesu anoza kakayena maningo maxa
35Na vanove kohokalawo atu anawanganyeda ira: <<Nnga atu kakwile anafuna kavenye avi? Anafuna kavenye na maningo bavi?>> 36Unawonga eno gu zimora. Mwasiwa mutu azala mbewu, yahavunde, we podi vuhula, unofwanyave mbewu ile yahanamele. Mbwenye yavunda, inomela. 37Eto inazala we kahi mutati unafuna zavo. So unazala kongolo, kaya tirigu, kaya tchi nni, 38mbwenye Mulugu ukana maningo asakunlre liye ira kada mbewu yamela, ikayena maningo anno. Kada mbewu ikana maningo Mulugu asakunlre liye ira yamela, ikayena.
39Tchoira kahi ira jatene ja ingumi jinna maningo mamohive. Atu kanna maningo ewene, anavinyama kanna maningo ewene, mbalrame dinna maningo ewene eto somba dinna maningo ewene. 40Kohokalawo maningo okalana ilambo ya zulu, kohokalawo maningo okalana mwilamboni ya vati. Eto undimuwa unna maningo okalana ilambo ya zulu unohiyana na undimuwa unna maningo okalana mwilamboni ya vati.
41Undimuwa unna nzuwa, kahi umohive unna mwedi. Eto undimuwa unna mwedi kahi umohive unna nyenyedi. Eto undimuwa unna kada nyenyedi unohiyana na undimuwa unna nyenyedi nfwaye.
42Mavenyelo a atu kakwile anakala eno. Inafuna zaliwa ba maningo ovunda. Inafuna venya inokala yengo yohowanda vunda. 43Maningo anakoyiwa tchi yengo yohokana mabasa. Eto inafuna venyihiwa anakala maningo otitimihiwa. Maningo anakoyiwa tchi yengo yovuta. Eto inafuna venyihiwa inakala yengo ya kopolo. 44Maningo anakoyiwa ba maningo okalana ilambo ya vati. Eto inafuna venyihiwa ba maningo okalana ilambo ya zulu. Sawasawa nnga kohokalawo maningo a ilambo ya vati, kohokalawo eto maningo okalana ilambo ya zulu.
45MMazuni mulrembiwa ira: <<Adawu ali mutu aromile vuma ilambo ya vati, ali wenno aromile kana ingumi.>> Mbwenye zela ingumi ya ilambo ya zulu, ukala Adawu mmohiwa ogomiheda wenno unaavaha atu ingumi ya ilambo ya zulu.#15:45 Adawu mmohiwa ogomiheda unawongiwa gu Yesu Kiristu. Liye unaavaha atu ingumi ya ilambo ya zulu: Ku wonga Yesu agakwile, agavenyihiwe mokwani, Mulugu anvahile mabasa oavaha atu ingumi ixa. Nione Joira ja Anamarumiwa 4:10-12, 5:30-31.
46Mbwenye kavali mutu unakana maningo a ilambo ya zulu ahanakayena maningo a ilambo ya vati. Mutu unaroma kana maningo a ilambo ya vati, amala liye kana maningo a ilambo ya zulu. 47Mulombwana oroma wenno awombiwe na teya, gwa ilambo ya vati. Mbwenye mulombwana wanembinli ukumenle zulu. 48Atu a teya anakala nnga mulombwana wenno ukumile teyani. Atu a zulu anakala nnga mulombwana wenno ukumile zulu. 49Sawasawa nnga nihikana maningo olingana na maningo a mutu wenno ukumenle teyani, nnoza nikayena maningo olingana na maningo a mutu wenno ukumenle zulu.
Ukwa kunna mabasa zela atu omuroromela Yesu
50Abalaga nnafuna duwandeleni ibaribari. Maningo anna hiyo a nyama na sangiri bahi kinawanda volowa Umwene wa Mulugu. Kavali wandeya yengo yovunda ivolowe Umwene wa Mulugu ohowanda vunda.
51Kavwani pama! Nnafuna duwandeleni yengo yokoyeya. Kahi hiyo atene muwari mwa Kiristu nnafuna gona gona wa ukwa, mbwenye hiyo atene nnoza nisandutchiwe. 52Jatene ejo jinaireya palraza yogomiheda yaza inla, na tempu ya vang'ono nnga kwapira wa meso. Tchoira palraza inoza ivweye, ale kakwile muwari mwa Kiristu anoza kavenye ira kavahiwe maningo ohowanda kwa. Eto hiyo niliwo mwilamboni, nnosanduwa ira nikayena maningo a makalelo mamohive.
53Tchoira inafuneya ira maningwala ovunda katukule makalelo ohowanda vunda eto maningwala okwene katukule makalelo ohowanda kwa. 54Maningo ovunda okwa ala katukula makalelo ohowanda vunda, katukula makalelo ohowanda kwa tchi tempu yenno inafuna kwakwanela mazu oteya ukwa kalrembiwe mMazuni oira:
<<We Ukwa, peno kunna mabasa, ingumi ihimala ugondjiha. 55We Ukwa, kodi gondjiha wawo uli waani? We Ukwa, kodi luma wawo ugomele vavi?>>#Izaiya 25:8; Ozeya 13:14
56Ukwa mbwenye unawanda muluma mutu wenne unafwanyeya na jotega. Tega ule kopolo daye nnazela muwari mwa malamulo. 57Mulugu mbwenye atamaleliwe mwasiwa uwanda muruma Nabwiya wehu Yesu Kiristu ira anivahe kopolo dowanda gondjiha ukwa.
58Nona nyo abalaga anauziveliwani miyo, mukale olimbene eto mukale oimelene pama. Inafwanela musimbwege irana mabasa a Nabwiya muwari moiziwa ira mabasa analaba hiyo muwari mwa Nabwiya kannalabela vasayi.
Iliyochaguliwa sasa
1 Korinto 15: iLolo
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2018 Visão Integral