Jekariya 10
10
Joomiraawo tan nun toɓinta yoone
1Eelee Joomiraawo toɓinana on yoone settoore.
Kanko nun accata hennu ŋol duydi e waɗa.
O accan yoone ɗuunne toɓana on.
O accan gese gooto gooto mon fu fuɗa.
2Tooruuje mon bi'eteeɗe terafimu fewanan on nun.
Masotooɓe mon yi'an nun jiiki fewrekuhi.
Koyɗaaji ɗi ɓe batata himɓe laati nun fewre.
Deƴƴitinol ŋol ɓe deƴƴitinirta himɓe laati nun hennu tan.
Gam mum acci oon boosoo,
oon juruminii hande baali ɗi walaa duroowo.
Joomiraawo wartiran himɓe mum den laatina ɓe semmenteeɓe
3Mone durooɓe waɗii am.
Mi hiitoto ɓe kamɓe laatiiɓe hande ginniiji be'i,
gam min Joomiraawo Joom huune fu,
mi haɓanan himɓe Yahuuda laatiiɓe baali am.
Mi laatinan ɓe hande puccu konu gooduŋol tedduŋal.
4Ardiiɓe feere feere wurtoto diga der maɓɓe.
Ɓe gaɗan semme hande hayre jogiine maadi.
Ɓe gaɗan semme hande tiggere bukaaru.
Ɓe gaɗan semme hande biroogal kaɓirgal konu.
5Ɓe laatoto hande soogeeji cuusuɗi.
Ɓe jaaɓan haɓooɓe e maɓɓe hande yaaɓooɓe loope e laawol.
Ɓe kaɓan e wayɓe maɓɓe gam min Joomiraawo, mii wondi e maɓɓe.
Senteene tawan wayɓe maɓɓe waɗɗiiɓe pucci.
6Mi semmiɗinan himɓe Yahuuda.
Mi hisinan himɓe Yusufu.
Mi wartiran ɓe der leydi maɓɓe,
gam mii woodi yurumeene maɓɓe.
Ɓe laatoto hande ɓe mi woppayno daɗey.
Mi toontoto du'aaje maɓɓe min Alla Joomiraawo maɓɓe.
7Himɓe Efurayimu laatoto hande soogeeji semmenteeji.
Ɓe goodan belɗum ɓerne hande yaruɓe innabojam.
Sukaaɓe maɓɓe yi'an ɗum den yanta e seyoo.
Ɓerɗe maɓɓe welan sanne gam sabbu am min Joomiraawo.
8Mi noddan himɓe am, mi hawrita ɓe,
gam mi yesii wurtingo ɓe diga maccuŋaaku.
Ɓe ɗuuɗan hande no ɓe ɗuuɗirnoo arande.
9Mi sankitii ɓe caka lenyi janani hande no aawdiiri aawirtee.
Amma enon fu, baa der leyɗe boɗɗiiɗe to ɓe goni ton, ɓe ciwtoran am.
Ɓe jooɗoto ton kamɓe e sukaaɓe maɓɓe.
Amma ɓaawo mum, ɓe ummoyto ɓe garta.
10Mi wartiran ɓe diga leydi Misira.
Mi hawritan ɓe diga leydi Asuura.
Mi wartiran ɓe der leydi Galaadi, e der leydi Libanon.
Amma enon fu jayri heƴataa ɓe.
11Ɓe jolan maayo toora.
Min Joomiraawo, mi fiyan galmaaji diyam maayo.
Diyam gooruwol Nili ɓettan.
Manŋu hoore himɓe Asuura heennyan.
Laamu leydi Misira yanan.
12Mi semmiɗinan himɓe am.
Ɓe gaɗan ko fottantammi.
Min Joomiraawo nun bati ka.
Iliyochaguliwa sasa
Jekariya 10: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.