Nahum 3
3
Niniwe halkii
1Kayto, bone tawii Niniwe, wanŋarde waroore himɓe,
nee hebbi fewre, nee holla himɓe semme!
Daɗey ne teetanno nun jawdi himɓe.
2Jooni, looci nun woni e falma der wanŋarde nen,
rimmo koyɗe laanaaji e nanee der mayre,
pucci e jargoo, laanaaji pucci konu e fitta der mayre.
3Waɗɗotooɓe pucci e wara,
e jogii labbe e sakaaje jalbooje.
Nawnaaɓe ɗuuɗii!
Maayɓe e fukkii nokku fu, ɓe limidintaako!
To himɓe e yaha sey e yaaɓa dow maɓɓe.
Wanŋarde Niniwe sentinaama
4Ɗum ɗoo fu tawii wanŋarde Niniwe gam sabbu ne ɗuuɗinii jeenu,
nee wooɗi, nee weli ɗenŋal bo.
Ne laatii ardiine dow laawol masaaku,
ne jammorake himɓe ɗuuɓɓe e jeenu,
ne jammorake lenyi ɗuuɗɗi e masaaku.
5Gam majjum Joomiraawo Joom huune fu wi'i:
Mi ummanto wanŋarde Niniwe,
mi ɓantan kolte mayre diga ley, mi ommira yeeso mayre.
Mi hollan himɓe fu funtu mayre,
mi sentinan ne yeeso laamuuji.
6Mi woppan buuri dow mayre,
mi teetan tedduŋal mayre,
himɓe fu daaran ne.
7Den mum ji'uɗo ne fu doggan, den wi'a:
Wanŋarde Niniwe halkii.
Moy nun yurumotoo ne?
Toy keɓananmi ne deƴƴitinoowo ne?
Niniwe laatoto hande Tebesi
8An wanŋarde Niniwe, aa ɓuri Tebesi geetaaku naa?
Wanŋarde nen jooɗino nun hakkune ilaaɗi,
ilaaɗi diyam nun tummunoone.
Maayo nun laatinoo hande biriniwol mayre.
9Himɓe Kusi e Misira nun laatinoo semme mayre,
gam semme maɓɓe e mawni.
Himɓe Putu e Libiya nun wallannoo ne.
10Amma enon fu wanŋarde nen egginaama,
himɓe mayre happaama maccuŋaaku.
Ko'e sukaaɓe mayre pusaama der ate cele fu.
Wayɓe maɓɓe fiɗii tete,
gam seennirgo ardiiɓe mayre,
mawɓe mayre happaama, haɓɓaa callalluuji.
11An bo wanŋarde Niniwe, a yaran bone,
faa nandaa hande mo bagi buusini,
a suuɗoto gam sabbu senteene.
A dartan to cuuɗotoɗaa gam sabbu wayɓe maa.
Semme Niniwe heennyii
12Biriniiji maa fu e nandi hande ɓiɓɓe ibbe artuɗe ɓenni.
To ibbi dimmaama, ɗe jana ɗe janta der hunnuko nyaamoowo ɗe.
13Haɓooɓe konu maa fu laatake hande rewɓe,
ɓe galaa semme.
Dammuɗe leydi maa fu maɓɓitaama yeeso wayɓe maa,
leɗɗe paleteeɗe e dammuɗe ɗen jaɓii yiite.
14Onon himɓe Niniwe, ƴooge diyam deson,
mahitee biriniiji mon ɗi cemmiɗa.
Basee leydi sonnuuri laawon ni,
tannyee birikiiji
Gam wayɓe waran yantugo on.
15Ɓe cunnyan wanŋarde mon,
ɓe bara on e yiite,
konu nyaaman on, ɓe keennya on hande no baɓatti heennyirta haako hecco,
baa to himɓe mon e ɗuuɗi hande baɓatti,
ɓe keennyan on.
Wanŋarde Niniwe laatoto bille
16A ɗuuɗinii tenkuuɓe maa,
faa ɓe ɓuri koode dow kammu ɗuuɗugo.
Amma ɓe dillii hande baɓatti piiruɗi yawti.
17Reenooɓe maa e ɗuuɗi hande gilɗi.
Gollantooɓe maa bo e ɗuuɗi hande baɓatti,
koɗuɗi e biriniwol subaka, wakkati peewol,
amma to naaŋe fuɗii ɗi piira ɗi dilla,
goɗɗo annaa to ɗi dilliri.
18An laamiiɗo Asuura, ardiiɓe maa ɗaanake,
mawɓe maa maayii,
himɓe maa fu sankitake dow baalle,
goɗɗo walaa kawritoowo ɓe.
19Nyawtoowo nawnande maa walaa,
sey ɓuuwe mayre ware.
Nanuɗo ko heɓi maa fu sey hella.
Gam walaa mo a hollayno bone wakkati fu.
Iliyochaguliwa sasa
Nahum 3: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.