Mika 7
7
Poonnitiiɗo walaa kade
1Mi yi'ii bone.
Mi laatake hande neɗɗo dafiiɗo,
go yahi saatinaago innabooje go tawi ɗe kororaaki ɓikkon,
doggani ibbe tawi baa ɓikkon arandehon kon ɓuri yiɗugo ɓennay.
2Walaa kade kuloowo Alla der leydi nin.
Gooŋaajo horaaki kade caka himɓe.
Ɓee cuuɗoo gam ɓe bara himɓe.
Moy fu e tunnana banniraawo mum pittol.
3Ɓee baawi waɗugo ko halli.
Laamiiɓe e hiitotooɓe e jaɓa ceede go hiitanoo himɓe.
Mawɓe maɓɓe e holla ko ɓerɗe mum suunaa.
Ɓe fu, non ɓe lelirta haala.
4Laatiiɗo booɗɗo caka maɓɓe nun nandi e huuraare gi'e.
Poonnitiiɗo caka maɓɓe e ɓuri janjayɗe hallugo.
Nyalaane ne Joomiraawo hiitotoo ɓe yottake.
Kayre *annabiiɓe batanannoo ɓe.
Jooni kan, ɓe jiɓoto.
5Taa hoola igo maa,
taa hoola beldiijo maa.
Taa batu baa debbo maa ko woni der ɓerne maa.
6Gam suka gorko e yenna baaba mum.
Suka debbo e ummanoo inna mum.
Debbo e ummanoo esiraawo mum debbo.
Himɓe wuro neɗɗo nun laatotoo wayɓe mum.
7Amma min kan, Joomiraawo nun daarumi,
Alla paabotooɗo am nun keɗiimi.
Kanko Alla am, o nananan am.
Himɓe Isira'iila e hoolii Alla
8Ganyo am, taa jalam,
gam baa to mi yanii, mi ummoto.
Baa to mii jooɗii der niwre,
Joomiraawo laatanto am jayŋol.
9Mi woofanii Joomiraawo.
Gam mum, sey mi munyana mone makko,
faa nyanne o teetimmi o hokkimmi gooŋa.
O yaaran am e jayŋol,
o hollammi gooŋaaku makko.
10Ganyo am yi'an ɗum senta.
Kanko ƴamannooɗo am toy Alla Joomiraawo am woni.
O yanan o yaaɓee hande loope laawol mii daara e gite am.
11Himɓe *Urusaliima, wakkati e wara ki biriniwol wanŋarde mon mahitinte.
Wakkati mum, leydi mon ɓeydete yaajugo.
12Den mum, banniraaɓe mon wartan.
Ɓe ummoo diga Asuura e wanŋarɗe Misira,
diga takkol Nili faa gooruwol Efurata,
diga takkol maayooji e baalle,
ɓe garta ɓe tawa on.
13Leydi nin laatoto bille,
gam sabbu baadi himɓe mayri halluni.
14Joomiraawo, ettu sawru maa duraa himɓe maa.
Duru baali maa laataniiɗi maa
gam ɗi gonu nun kanji tan der jiddere caka leɗɗe dimooje.
Duru ɗi der durirɗe Basani e Galaadi
hande no durirnoɗaa ɗi.
15Joomiraawo, waɗu haaynaareeji
hande ɗi gaɗunoɗaa
wakkati burtinoyɗaa men diga leydi Misira.
16Himɓe lenyi janani yi'a ɗum, senta baa gam e woodi baawɗe.
Ɓe jogoo kunnuɗe, noppi maɓɓe sukka.
17Ɓe nyaama sollaare hande bolle e ko ladata fu.
Ɓe burtoo diga cuuɗi maɓɓe cemmiɗinɗi,
ɓe gara yeeso maa, an Alla Joomiraawo amen,
ɓee diwna gam sabbu ɓee kule.
18Alla gom na'on nanduɗo e maa?
Aa moyta boofi,
aa yaafanoo himɓe maa horiiɓe hakkeeji mum.
A jogataako mone himɓe maa faa e baadey,
gam aa yiɗi waɗango himɓe maa moƴƴere.
19A yurumoto men kade menen himɓe maa,
moytaa boofi amen fu,
cuttaa hakkeeji amen boppaa caka maayo.
20A hollan himɓe Yaakuubu gooŋaaku maa,
a hollan himɓe lenyol Iburaahiima yidde maa ne heennyataa,
hande no kunoraninoɗaa ka kookiraaɓe amen diga ko ɓooyi.
Iliyochaguliwa sasa
Mika 7: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.