Matiye 9

Yeesu nyawtii moofo

(Marku 2:1-12, Luka 5:17-26)

1Yeesu naati laana diyam, joli, witti der siire mum. 2Himɓe waddani mo moofo, pukkinaaɗo dow daago. No Yeesu yi'i goonɗinki maɓɓe, wi'i moofo on: «Suka am, tiiɗin ɓerne maa! Hakkeeji maa yaafaama!»

3Den, moodiɓɓe tawreeta woɓɓe yanti e miila der ɓerɗe mum, e wi'a: «Gorko oo ɗo e bata kalluka dow Alla!» 4Yeesu e anni miilooji maɓɓe, o wi'i ɓe:

«Gam ume go oon miila miilooji kalluɗi ɗii ɗon der ɓerɗe mooɗon? 5Ume ɓuri hoyugo? Wi'ugo: "Hakkeeji maa yaafaama" nun naa wi'ugo: "Umma yahu?" 6Amma, mii yiɗi paamon, no Ɓii neɗɗo e woodi baawɗe yaafaago hakke der duuniyaaru ɗo.» Den, o wi'i moofo on: «Umma, ettu daago maa, hootu wuro maa!»

7O ummii, o hooti wuro makko. 8No jama'aare yi'i ɗum, huli, darii e teddina Alla gam o hokki himɓe baawɗe hande ɗee ɗon.

Yeesu noddii Matiye

(Marku 2:13-17, Luka 5:27-32)

9Yeesu e yawta, diga e laawol o yi'i gorko bi'eteeɗo Matiye e jooɗii to ceede faada yoɓetee, o wi'i mo: «Tokkam.» Matiye ummii, tokki mo.

10Ɓaawo mum, Yeesu yahi e nyaama der wuro Matiye. Jaɓooɓe ceede faada ɗuuɓɓe, e waɗooɓe hakke wari jooɗii e nyaamida e Yeesu e aahiiɓe mum. 11No *Farisaaɓe yi'i ɗum, ɓe bi'i aahiiɓe makko: «Gam ume moodibbo mooɗon nyaamidinta e jaɓooɓe ceede faada, e waɗooɓe hakke?»

12Yeesu nani ka, wi'i ɓe: «Yanɗuɓe haajaaka nyawtoowo, sey nyawɓe. 13Jahee ekkitee ko haala kaa ɗo yiɗi wi'ugo: "Yurumeene nun jiɗumi, sadakaaji bane#9:13 Hose'a 6:6."» Gam mi waray noddugo foonnitiiɓe, amma hakkeeɓe.

Ƴanɗe dow suumaye

(Marku 2:18-22, Luka 5:33-39)

14Den, aahiiɓe Yuhaana gaɗoowo *batisi ɓattii Yeesu, ƴami mo, wi'i: «Ume waɗi, menen e *Farisaaɓe emen cuumoo, go aahiiɓe maa suumataako?»

15O toontii ɓe, o wi'i: «Noddinaaɓe ɓangal waawan ko woni der biisere ɓerne to jommanjo gorko e wondi e maɓɓe na? Nyalaane waraan de jommanjo gorko on ettetee yawtinee diga caka maɓɓe. Den ɓe cuumoyto.

16Walaa takkoowo lefol kesol e wudere hiinne, gam lefol kesol fooɗan wudere hiinne, den cerkol mayre yaajan sanne. 17Kade bo innabojam kesam loowataake der jollooji guri kiiɗɗi. To hinaa non, jollooji ɗin pusan, innabojam reƴƴitoo, jollooji ɗin bo halka. Amma innabojam kesam, sey loowee der jollooji guri kesi, gam ɗum fu ɗum daɗa.»

Suka debbo gom e debbo meemuɗo toggoore Yeesu

(Marku 5:21-43, Luka 8:40-56)

18Wakkati Yeesu woni e bata ɓe ka, ɗon hooreejo suudu waajorde gom yottii, jiccii yeeso makko, wi'i: «Ɓiyam debbo maayii, ɗum waɗii tifere. Amma war yowu juunŋo maa dow makko, heɓa o wuura.»

19Yeesu ummii e aahiiɓe mum, tokki mo.

20Den debbo gom, mo lefol mum salii ko haggii diga duuɓi sappo e ɗiɗi (12), ƴiwi ɓawɓawre Yeesu, meemi kommulol toggoore makko. 21Gam o miilii der ɓerne makko, o wi'i: «To mi heɓii meemumi baa kommulol toggoore makko, mi yoofoto.» 22Yeesu yeeƴitii, yi'i mo, wi'i: «Suka am, tiiɗin ɓerne maa! Goonɗinki maa nyawtii maa.» Wakkatiire nen, debbo on yoofii.

23Yeesu yottii wuro hooreejo suudu waajorde on. O yi'i fuurooɓe puuraaɗi maayde e himɓe wullooɓe. 24O wi'i ɓe: «Burtee diga ɗo. Suka on maayay, o ɗaani nun.» Ɓe darii ɓee jala mo. 25No himɓe wurtinaa yaasi, o naati der suudu, o nanŋi juunŋo suka debbo on, go o ummii. 26Habaru majjum sankitii toy fu der leydi nin.

Yeesu wumtinii wumuɓe ɗiɗo

27No Yeesu yawtata, wumuɓe ɗiɗo tokki mo, e bata e daane towne, e wi'a: «Ɓii Dawda, yuruma men!»

28No o naati suudu, wumuɓe ɓen ɓattii mo, o wi'i ɓe: «Oon goonɗini mi waawan ko waɗi ɗum na?» Ɓe toontii mo, ɓe bi'i: «Oo, Joomiraawo, emen goonɗini.» 29Den, o meemi gite maɓɓe, o wi'i: «Ɗum laatanoo on hande no goonɗinirɗon.» 30Den ɓe bumti. O waggini ɓe, o wi'i: «To on batee ka baa goɗɗo.» 31Amma no ɓe burtii, ɓe jahi ɓee cankita habaru makko der leydi nin fu.

Yeesu nyawtii muumo

32No wumtinaaɓe ɓen wurtotoo, Yeesu waddanaa gorko mo ginnawol muumiɗini. 33O riiwi ginnawol ŋol, muumo on yanti e bata. Jama'aare fu haayɗinii, e wi'a: «Iri ɗum ɗo meeɗay yi'eego der Isira'iila!» 34Amma *Farisaaɓe wi'i: «E baawɗe hooreejo ginnaaji nun o riiwirta ginnaaji!»

Yeesu yurumake jama'aare

35Yeesu e woositoo der genneele mawɗe, e ci'on petton fu. Oo janŋina der cuuɗi baajorɗi, oo fiina *linjiila Laamaare Alla, oo nyawta nyawɓe nyawneeji feere feere fu. 36No o yi'i jama'aare, ɓe juruminii mo, gam ɓe comii, ɓe tampi, ɓee laatii hande baali ɗi galaa duroowo. 37Den, o wi'i aahiiɓe makko: «Ko ruggetee e ɗuuɗi, amma ruggooɓe ɗuuɗaa. 38Eelee Joomiraawo gese lildaa ruggooɓe der to ruggantee.»

Iliyochaguliwa sasa

Matiye 9: BFB

Kuonyesha

Shirikisha

Nakili