Matiye 14

Maayde Yuhaana gaɗoowo *batisi

(Marku 6:14-29, Luka 3:19-20, 9:7-9)

1Wakkati majjum, Eroodu hooreejo leydi Galili nani Yeesu e batanee. 2O wi'i jaggiiɓe makko: «Yuhaana gaɗoowo *batisi nun ɗon! O fintii. Kanjum acci oo woodi baawɗe waɗugo haaynaareeji.»

3Tawi Eroodu hokkiino laawol Yuhaana nanŋee, haɓɓee, wattee der kasu. O waɗii ɗum sabbu Erodiya, debbo mawniiko, Filippu. 4Gam Yuhaana wi'iino Eroodu: «Laawol hokkay maa koowaa mo.» 5Eroodu e yiɗuno warugo Yuhaana, amma oo hula himɓe, gam himɓe fu e goonɗini no Yuhaana laati nun *annabiijo.

6No nyalaane juulɗe dingol Eroodu yottii, ɓii Erodiya debbo naati e fija yeeso noddinaaɓe. Ɗum weli Eroodu sanne. 7O hunanii suka on, o wi'i o hokkan mo huune ko o ƴami fu. 8Suka debbo on gollori ka inna makko tintini mo, wi'i Eroodu: «Wattanam der heeɗo ŋoo ɗo hoore Yuhaana gaɗoowo *batisi!»

9Ɓerne Eroodu biisii amma, gam sabbu o hunake yeeso noddinaaɓe makko, o hokki hunnuko suka debbo on hokkee hoore Yuhaana nen. 10O lili goɗɗo yaha wudditaa hoore Yuhaana der kasu. 11Hoore nen waddaa der heeɗo, suka debbo on hokkaa. Kanko bo, o hokkoy inniiko. 12Aahiiɓe Yuhaana wari etti ɓannu makko, uwoy. Ɓaawo majjum, ɓe jahi ɓe batoy Yeesu ko waɗi.

Yeesu nyaamnii himɓe ujune joyo

(Marku 6:30-44, Luka 9:10-17, Yuhaana 6:1-14)

13No Yeesu nani habaru on, o soltii kanko tan, o naati laana diyam, o yahi nokkuure deƴƴune. Himɓe nani ka, wurtoy diga ci'e mum, tokki mo e koyɗe. 14No o wurtii e laana diyam, o yi'i jama'aare ɗuunne, yurumeene maɓɓe waɗi mo, den o nyawti nyawɓe tawaaɓe ɗon.

15No kiikiiɗe waɗi, aahiiɓe makko ɓattii mo, wi'i: «Kiikiiɗe waɗii, kade bo, e ladde nun gonuɗen ɗo. Accu himɓe ɓen yawta, yaha der ci'e, soodaa ko nyaamata.» 16Yeesu toontii ɓe, wi'i: «Doole bane ɓe jawta. Onon e ko'e mooɗon, kokkee ɓe ko ɓe nyaamata!» 17Ɓe toontii mo, ɓe bi'i: «Peen joyo, e liƴƴi ɗiɗi tan men goodi ɗo.» 18O wi'i ɓe: «Gaddanee am ɗum ɗo.»

19O hokki hunnuko himɓe jooɗinee dow fuɗo. Den o etti peen joyo kon, e liƴƴi ɗiɗi ɗin, o tiggitii, o yetti Alla. O ŋappiti peen kon, o hokki aahiiɓe makko seennana jama'aare. 20Ɓe fu ɓe nyaami ɓe kaari. Aahiiɓe hawriti ko horii, ɗum hebbi killaaje sappo e ɗiɗi (12). 21Nyaamuɓe ɗum waɗii worɓe ujune joyo (5 000), rewɓe e sukaaɓe limaaka.

Yeesu yahii dow diyam

(Marku 6:45-52, Yuhaana 6:15-21)

22Ɗon maa ɗon, Yeesu dooli aahiiɓe mum naata laana diyam, ardoo, jola fonŋo maayo. Wakkati mum, oo waynoo jama'aare. 23Ɓaawo no o waynodii ɓe, o eenci dow waanne gam o waɗaa du'aare kanko tan. Foti kiikiiɗe waɗii, kanko tan bo woni ton. 24Tawi laana diyam ŋan woɗɗake diga e fonŋo, go galmaaji diyam e fiya ŋa, gam ŋa jaɓɓitinto nun hennu. 25No faanii weetugo, Yeesu yottii to maɓɓe, e yaha dow maayo e koyɗe. 26No aahiiɓe makko yi'i mo oo yaha dow diyam e koyɗe, kulol manŋol nanŋi ɓe, ɓe bi'i: «Ginnaaru non ɗon!» Ɓe darii ɓee kalɓa sabbu kulol. 27Ɗon maa ɗon Yeesu wi'i ɓe: «Deƴƴitee! Min nun, to on kulee!»

28Piyer toontii mo, wi'i: «Joomiraawo, to an nun e gooŋa, accu mi yaha dow diyam, mi wara to maa.» 29O toontii mo, o wi'i: «War!» Piyer wurtii laana diyam, e yaha dow diyam, e fonnii to Yeesu. 30Amma no o yi'i hennu e satti, o huli, o fuɗɗi mutugo, den o halɓi, o wi'i: «Joomiraawo, faabam!» 31Ɗon maa ɗon, Yeesu forti juunŋo mum, jogii mo, wi'i: «An mo goonɗinki paanɗuki, gam ume ko gaɗuɗaa seko?» 32Ɓe fu ɗiɗo, ɓe naati laana diyam, den hennu deƴƴi. 33Tawaaɓe der laana diyam ŋan fu, sujidani Yeesu, wi'i: «E gooŋa, a laati nun Ɓiɗɗo Alla!»

Yeesu nyawtii nyawɓe der leydi Genesareti

(Marku 6:53-56)

34Ɓaawo no ɓe joli maayo, ɓe jottii leydi Genesareti. 35Himɓe tawaaɓe nokkuure nen anniti mo. Ɓe lildi habaru der leydi nin fu no o warii, ɓe gaddani mo nyawɓe fu. 36Ɓee eela mo o acca nyawɓe ɓen meema baa kommulol toggoore makko tan. Meemuɓe ŋol fu bo e yoofoo.

Iliyochaguliwa sasa

Matiye 14: BFB

Kuonyesha

Shirikisha

Nakili