Luka 17

Laabi doƴƴere

(Matiye 18:6-7,21-22, Marku 9:42)

1Yeesu batii aahiiɓe mum wi'i: «Ɗum waɗataako ko doƴƴata himɓe waray, amma bone laatanto laatiiɗo daliila majjum. 2Ɗum ɓurananno mo, o haɓɓanee namarde e daane o faɗɗee der maayo, e no o laatorantoo faanɗuɓe ɓee ɗo gooto mum laawol doƴƴere. 3Kakkilanee ko'e mon!

To banniraawo maa e waɗa hakke, wooltan mo. To o waylitake, sawrana mo. 4To o woofanii maa de jeeɗiɗi der nyalaane woore, go de jeeɗiɗi ɗen fu, oo wittaa o wi'e: "Sawranam," sawrana mo.»

Goonɗinki semmentehi

5Lilaaɓe batii Joomiraawo wi'i: «Ɓeydan men goonɗinki.» 6Joomiraawo toontii ɓe wi'i: «To oon goodunoo goonɗinki hande ɓinŋel mutaadihi, on baawan ko wi'i leggal ŋal ɗo: "Ɗoppita, tiggoɗaa der maayo!" Ŋal ɗowtanto on.»

Gollotooɓe ɓe laataaki goɗɗum

7«To goɗɗo mon e woodi gollotooɗo, demoowo, naa bo duroowo, to o yi'ii mo oo warta diga deme, o wi'an mo: "War law nyaamu na?" 8Aawo, amma o wi'an mo: "Waylitin gineeji maa, gaɗanaa am nafa, desaa mi nyaama mi yara. Ɓaawo mum an bo, nyaamaa jaraa." 9O yettan gollotooɗo on to waɗii golle mum na? 10Hande nun onon bo, to on gaɗii ko ɓe bati on gaɗon fu, bi'ee: "Men laati nun gollotooɓe tan, golle kaanuɗe men gaɗa nun men gaɗi."»

Yeesu nyawti sesseɓɓe sappo

11No Yeesu yahata *Urusaliima, o tokki hakkune Samariya e Galili. 12No o naatata ci'el gom, sesseɓɓe sappo wari fottugo e makko, ɓe darii woɗɗi. 13Ɓe janti ɓee kuuɓa, ɓee bi'a: «Yeesu moodibbo, yuruma men!»

14Yeesu yi'i ɓe go wi'i: «Jahee kollee ko'e mon *liimaamiiɓe.» No ɓe jahata ton, ɓe joofii. 15Gooto der maɓɓe no yi'i yoofake, wittoy e maanta Alla e daane towne. 16O jiccii ley koyɗe Yeesu, oo yetta mo. Neɗɗo on laati nun samariyaajo. 17Go Yeesu wi'i: «Ɓe fu sappo bane yoofii na? Toy jeenayo horiiɓe woni? 18Goɗɗo maɓɓe miijaaki wittaa yetta Alla, sey koɗo oo ɗo?» 19Den Yeesu wi'i mo: «Umma yawtu, hoolaare maa hisinii maa.»

Maaneeji Laamaare Alla

(Matiye 24:23-28,37-41)

20*Farisaaɓe ƴami Yeesu dey nun Laamaare Alla warata? O toontii ɓe o wi'i: «Laamaare Alla yi'ataake e gite.» 21Wi'ataake: "Daaree, nani ne ɗo, naa bo ne nani to!" Gam paamee Laamaare Alla e tawaa caka mon.

22Go o bati aahiiɓe o wi'i: «Wakkati waraan de jiɗoton yi'ugo Ɓii neɗɗo baa nyalaane woore, amma on ji'ataa mo bo. 23On bi'oyte: "O nani ɗo, naa bo o nani to!" To on jahee ton, to on doggiree ton bo. 24Hande no maƴƴere maƴƴirta diga weccoore kammu nee ɗo faa nee to, non non nun Ɓii neɗɗo laatoytoo der nyalaane o wittoyta. 25Amma sey o tooroo taw sanne, himɓe jaamanuuru nuu ɗo saloo mo. 26Ko waɗunoo der wakkati Nuuhu, ɗum waɗitinto bo kade der nyalaane Ɓii neɗɗo. 27Himɓe e nyaamannoo e yara, ɓee ɓaŋa, ɓee ɓaŋee faa nyanne Nuuhu naati der laana diyam. Puttiri diyam mawɗam wari halki ɓe ɓe fu. 28Ko laatinoo der wakkati Lootu, ɗum laatoto bo kade. Himɓe e nyaama e yara, ɓee cooda, ɓee cippa, ɓee aawa ɓee maha cuuɗi. 29Amma nyalaane Lootu wurtii diga Sodoma, yiite e bu'e naaŋe toɓii diga dow kammu halki ɓe ɓe fu. 30Non non nun ɗum laatortoo der nyalaane ne Ɓii neɗɗo suppitoytoo.

31Nyalaane mum tawaaɗo dow doomoode suudu, go gineeji mum e tawaa der maggol, to jippa wi'a ettan ɗi. Non non nun bo tawaaɗo deme to wittu kade wuro mum. 32Ciwtoree debbo Lootu. 33Jiɗuɗo hisingo yonki mum dullan ki, amma majjinɗo yonki mum heɓitinto ki. 34Mii bata on, jemmaare majjum, himɓe ɗiɗo tawete dow banni goori, gooto ettee gooto accee. 35Rewɓe ɗiɗo namidan dow namarde woore, gooto ettee gooto accee. 36[Worɓe ɗiɗo wondan der gesa, gooto hoccee, gooto accee.]»

37Go aahiiɓe makko ƴami mo, wi'i: «Toy ɗum waɗoyta Joomiraawo?» O toontii ɓe o wi'i: «To baatuɗum woni, ɗon nun digaareeje hawritinto.»

Iliyochaguliwa sasa

Luka 17: BFB

Kuonyesha

Shirikisha

Nakili