Yuhaana 21
21
1Ɓaawo majjum, Yeesu wirnitanake aahiiɓe mum kade takkol maayo Tiberiya. Nani no o wirnitoranii ɓe: 2Simon Piyer, e Toma bi'eteeɗo Ciwto, e Natanayel mo Kana der leydi Galili, e ɓiɓɓe Jebede worɓe, e aahiiɓe makko ɗiɗo woɓɓe, e wondi nokkuure woore. 3Simon Piyer wi'i ɓe: «Mi yahan mi suuɓoo liƴƴi.» Ɓe bi'i: «Menen bo, men jaadan e maa.»
Ɓe jahi, ɓe naatoy laana diyam, der jemmaare nee ɗon, ɓe keɓay baa goɗɗum. 4No beegol ummoy, Yeesu wari takkol maayo ŋon, amma aahiiɓe annitay mo. 5Yeesu wi'i ɓe: «Sukaaɓe, on keɓii liƴƴi na?» Ɓe toontii mo: «Men keɓay!» 6O wi'i ɓe: «Paɗɗee taaruwol ŋol wecco laana diyam nyaamo, on keɓan.» Ɓe paɗɗi ŋol. Ɓe keɓi liƴƴi faa ɓe tampi wattugo ŋol der laana diyam gam sabbu no liƴƴi ɗuuɗiri. 7Aahiijo Yeesu mo o ɓuri yiɗugo wi'i Simon Piyer: «Joomiraawo nun!»
No Simon Piyer nani: «Joomiraawo nun ɗon», o etti toggoore makko, o ɓornii gam funtu o wonunoo, o yanti e diyam. 8Aahiiɓe horiiɓe wardi e laana diyam, e daasa taaruwol kebbuŋol liƴƴi. Ɓe boɗɗoraaki fonŋo ko ɓurata kuule keme ɗiɗi (200). 9No ɓe ŋabbi fonŋo, ɓe ji'i ƴulɓe yiite, liƴƴi e peen e yowii dow mum. 10Yeesu wi'i ɓe: «Gaddee liƴƴi ɗi nanŋuɗon ɗin, seɗɗa mum.»
11Simon Piyer naati laana diyam ŋan, fooɗi taaruwol kebbuŋol liƴƴi mawɗi, hewre e lasoy ɗiɗi e sappo e tati (153). Baa no ɗi ɗuuɗiri non non fu taaruwol ŋol serkitaaki. 12Yeesu wi'i ɓe: «Garee nyaamee!» Aahiiɓe ɓen baa gooto maɓɓe suusay ƴamugo: «An moy nun?
Gam ɓee anni Joomiraawo nun.» 13Den Yeesu wari, etti peen e liƴƴi, hokki ɓe.
14De tatawre nun ɗon no Yeesu wirnitoranii aahiiɓe mum ɓaawo no o finti.
Yeesu e ƴama Piyer haala
15No ɓe nyaamdi, Yeesu ƴami Simon Piyer: «Simon ɓii Yuhaana, aa ɓuri ɓee ɗo yiɗugo am?» O toontii: «Ee! Joomam, aa anni mii yiɗu maa.» Den Yeesu wi'i mo: «Duru baali am!» 16Yeesu wi'i mo kade: «Simon, ɓii Yuhaana, aa yiɗimmi?» O toontii: «Ee! Joomam aa anni mii yiɗu maa!» Den Yeesu wi'i mo: «Duru baali am!» 17O wi'i mo kade: «Simon, ɓii Yuhaana, aa yiɗimmi na?» Piyer ɓerne mum biisii, gam o wi'i mo de tatawre: «Aa yiɗimmi na?» Piyer wi'i mo: «Joomiraawo aa anni huune fu, aa anni bo mii yiɗu maa.» Yeesu wi'i mo: «Duru baali am. 18Mii bate e gooŋa, e sukaanaaku maa, aa haɓɓonoo ɓelɓelol, jahaano to jiɗuɗaa, to a naywii, a fortan juuɗe maa, kaɓɓaneɗaa ɓelɓelol, jaareɗaa to a yiɗaa.» 19Batuuji ɗin hollan nun no Piyer maayirta, gam teddingo Alla. Ɓaawo majjum, o wi'i mo: «Tokkam.»
Yeesu e aahiijo mum mo o ɓuri yiɗugo
20Piyer yeeƴitii, yi'i aahiijo Yeesu mo o ɓuri yiɗugo e tokki ɓe. Kanko jooɗinoo takkol Yeesu wakkati ɓe kirtotoo. Kanko nun wi'unoo: «Moodibbo, moy woni jammotooɗo maa?» 21No Piyer yi'i mo, ƴami Yeesu: «Joomiraawo, ume nun tawoyta oo ɗo bo?» 22Yeesu toontii mo: «To mii yiɗi o wuura faa mi wittiraa kade, ko faalii maa? An ni tokkam.»
23Haala kan sankitii caka goonɗinɓe Yeesu no aahiijo on maayataa. Amma Yeesu wi'ay: «O maayataa.» O wi'u nun: «To mii yiɗi o wuura faa mi wittiraa, ko faalii maa?»
24Aahiijo oo ɗon nun seedii kujje ɗen, winni ɗe, een anni bo no seedaaku makko laati nun gooŋa.
Heennyitoode
25Yeesu waɗii kujje goɗɗe ɗuuɗɗe kade. To ɗe binnaanoma gootel gootel, mii miila duuniyaaru nuu waawataano jaɓidingo dewte binnoytenooɗe.
Iliyochaguliwa sasa
Yuhaana 21: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.
