Yuhaana 18

Nanŋoore Yeesu

1Ɓaawo haalaaji ɗin, Yeesu yawtidi e aahiiɓe mum fonŋo gooruwol bi'eteeŋol Sedironi. Gesa leɗɗe e wonnoo ton, o naatidi e aahiiɓe makko der majje. 2Yahuuda jammotooɗo mo e anni nokkuure nen, gam Yeesu e aahiiɓe mum e hawritannoo ton de ɗuuɗɗum. 3Yahuuda ardii soogeeji, e reenooɓe ɓe *Liimaamiiɓe e *Farisaaɓe lili. Ɓe jottii ɗon, ɓee jogii jonnorɗi, e fitillaaji e konirɗum. 4Tawi Yeesu e anni ko fonnoy heɓugo mo, taɓɓitii ɓe, wi'i: «Moy daartoton?» 5Ɓe toontii mo: «Yeesu mo Nasaratu nun.» O wi'i ɓe: «Mi nani!»

Yahuuda jammotooɗo mo e darodii e maɓɓe. 6No Yeesu wi'i: «Mi nani!» Ɓe bittiri ɓawɓawre ɓe jani. 7Yeesu ƴami ɓe kade: «Moy daartoton?» Ɓe toontii: «Yeesu mo Nasaratu nun!» 8Yeesu toontii ɓe: «Mi nani. To min nun daartoton, joofee aahiiɓe am ɓen ɓe dilla.»

9O batu nun kaa ɗon gam ka o batunoo goonɗa: «Mi majjinay ɓe kalfinɗaa am baa gooto mum.» 10Den Simon Piyer e woodunoo kaafahi, o saaɓii ki, o feƴƴi maccuɗo hooreejo *Liimaamiiɓe, o setti nowru mum nyaamowol. Maccuɗo on e wi'ee Malkusu. 11Yeesu wi'i Piyer: «Wattita kaafahi maa kii e holgo mum. Aa miiji mi yarirtaa jarirgel bone ŋel Baaba hokkimmi na?»

Yeesu yaaraama yeeso Annasi

12Ukkere soogeeji e mawɗo mum, e maccuɓe hooreeɓe *Yahuduuɓe nanŋi Yeesu, haɓɓi mo. 13Ɓe artii ɓe jaari mo to Annasi. Annasi laati nun esiraawo Kayafasi. Der duuɓol ŋol ɗon, kanko nun woni hooreejo *Liimaamiiɓe. 14Kayafasi on nun batunoo hooreeɓe *Yahuduuɓe ko ɓuri wooɗugo, kan woni neɗɗo gooto maayana leydi fu.

Piyer yeddii wi'i laataaki aahiijo Yeesu

(Matiye 26:69-70, Marku 14:66-68, Luka 22:55-57)

15Simon Piyer e aahiijo goɗɗo tokki Yeesu. Aahiijo oo ɗon e annirnoo e hooreejo *Liimaamiiɓe go o naatidi e Yeesu fageere hooreejo *Liimaamiiɓe on. 16Go Piyer e darii yaasi takkol dammugal. Aahiijo annirɗo e hooreejo *Liimaamiiɓe on, wurtii baddi e debbo deenoowo dammugal ŋal, o naanni Piyer. 17Debbo deenoowo dammugal on wi'i Piyer: «An bo a laataaki gooto e aahiiɓe gorko oo na?» Piyer toontii mo: «Aawo, mi laataaki aahiijo makko.»

18Maccuɓe e reenooɓe suudu Joomiraawo huɓɓiino yiite e aytinii, gam jaaŋol na'on. Piyer bo e darodii e maɓɓe e aytinii.

Hooreejo *Liimaamiiɓe e ƴama Yeesu ƴanɗe

(Matiye 26:59-66, Marku 14:55-64, Luka 22:66-71)

19Hooreejo *Liimaamiiɓe on ƴami Yeesu haala aahiiɓe mum, e ko o janŋinta. 20Yeesu toontii mo: «Mi laaɓinanii duuniyaaru haala am. Nyalaane fu mi janŋinii der baajorɗe, der suudu Alla to *Yahuduuɓe hawritinta nyalaane fu. Walaa fu ko batumi e cuuccukka. 21Ume ƴamantaa am? Ƴamu hettinaniiɓe am ko batumi. Ɓee anni ko batumi mam mam.»

22Der haala kan, reenooɓe suudu Joomiraawo gooto mum fiyi Yeesu meenyo, wi'i: «Non nun toontortoɗaa hooreejo *Liimaamiiɓe na?» 23Yeesu toontii mo: «To ko boni nun batumi, haala kaye nun boni e makka? To tawii ko wooɗi nun batumi, gam ume piyanɗaa am?»

24Annasi lildi mo to Kayafasi hooreejo *Liimaamiiɓe, oo haɓɓaa.

Piyer yedditake wi'i laataaki aahiijo Yeesu

(Matiye 26:71-75, Marku 14:69-72, Luka 22:58-62)

25Simon Piyer e aytinii ɗon. Ɓe bi'i mo: «An bo, a laataaki gooto e aahiiɓe makko na?» Piyer yeddi, wi'i: «Mi laataaki!»

26Maccuɓe hooreejo *Liimaamiiɓe gooto mum, bannirɗo e mo Piyer settunoo nowru muuɗum, wi'i mo: «Mi yi'idayno maa e makko der gesa too na?»

27Piyer yeddi kade. Ɗon maa ɗon jakaraari joggi.

Yeesu yaaraama yeeso Pilaatu

(Matiye 27:1-2,11-14, Marku 15:1-5, Luka 23:1-5)

28Ɓe burtini Yeesu diga to Kayafasi, diga subaka kecco, ɓe jaari mo laamorde Roma. Yaaruɓe mo ɓen naatay faadaare, gam to ɓe coɓu, gam ɓe keɓa nyaamugo nyaamdu juulɗe *Paska. 29Pilaatu yahi tawoy ɓe yaasi ton, wi'i: «Ume nun gaccoriɗon gorko on?» 30Ɓe toonti mo: «To o waɗataano ko boni, men gaddataano mo to maa.» 31Den Pilaatu wi'i ɓe: «Ettee mo, kiitoroɗon mo e ooda mooɗon.» *Yahuduuɓe wi'i mo: «Men goodaa laawol warugo goɗɗo.»

32Non nun haala kan laatorii gam goonɗingo ka Yeesu batunoo dow no o maayirta. 33Pilaatu naati der laamorde mum, noddi Yeesu, wi'i mo: «A laamiiɗo *Yahuduuɓe nun na?» 34Yeesu toontii mo: «An wi'ii ka e hoore maa, naa to woɓɓe nanuɗaa ka?» 35Pilaatu toontii mo: «Min mi *Yahuduujo nun na? Himɓe lenyol maa e hooreeɓe *Liimaamiiɓe waddu maa to am. Ume gaɗuɗaa?» 36Yeesu toontii: «Laamaare am, laamaare duuniyaaru bane. To ne laatino nun ne duuniyaaru, maccuɓe am haɓanno gam to mi naatu der juuɗe *Yahuduuɓe. Amma laamaare am ne ɗo bane.» 37Den Pilaatu wi'i mo: «To non non a laamiiɗo nun?» Yeesu wi'i mo: «Hande no bi'uɗaa, mi laamiiɗo nun. Mi rimaama, mi warii bo e duuniyaaru gam mi seedanoo gooŋa. Jiɗuɗo gooŋa fu, nanan haala am.» 38Pilaatu ƴami mo: «Ume woni gooŋa?»

Yeesu hiitaamaa waree

(Matiye 27:15-31, Marku 15:6-20, Luka 23:13-25)

Ɓaawo o bati ka, o wurti kade, o tawoy *Yahuduuɓe yaasi, o wi'i ɓe: «Mi heɓay gacce baa goote ɗe nanŋiranmi gorko on. 39Oon boowi juulɗe *Paska fu mi yoofana on neɗɗo gooto. Oon jiɗi mi yoofitana on laamiiɗo *Yahuduuɓe na?» 40Ɓe toonti dow dow: «Kanko bane men jiɗi joofanaa men, Barabbasi nun.» Nani Barabbasi laati nun pasotooɗo.

Iliyochaguliwa sasa

Yuhaana 18: BFB

Kuonyesha

Shirikisha

Nakili