Yuhaana 14

Yeesu woni laawol jaaroowol to Baaba

1Yeesu wi'i aahiiɓe mum: «Pukkinee ɓerɗe mooɗon, goonɗinee Alla, goonɗinon am min bo. 2Cuuɗi ɗuuɗɗi na'on der wuro Baaba am. To ɗum laataakino gooŋa, mi batataano on mi yahan, mi moƴƴinanaa on joonne. 3To mi moƴƴinanii on to gonoyton, mi wittaan mi hocca on, mi yaara on to am gam gonon to gonmi. 4Oon anni laawol jahoowol to jahanmi.»

5Toma wi'i mo: «Moodibbo, men annaa to jahataa, noy men annirta laawol mum?» 6Yeesu toontii mo: «Min woni laawol, min woni gooŋa, min woni yonki. Goɗɗo waawataa yahugo to Baaba to ƴiwiray to am. 7To oon annunoo am, on annanno Baaba am bo. Diga jooni oon anni mo, on ji'ii mo.»

8Filippu wi'i mo: «Moodibbo, hollu men Baaba, ɗum ɗon heƴan men.» 9Yeesu wi'i mo: «No ɓooyirmi nii e mooɗon fu, Filippu a annaa am? A annaa ji'uɗo am fu, yi'ii Baaba? Noy bi'irtaa: "Hollu men Baaba"? 10A goonɗinay mii hawti e Baaba, Baaba bo e hawti e am na? Haalaaji ɗii batumi on ɗii fu, ɗi ƴiway to am. Baaba mo kawtumi e mum waɗata golle mum. 11Goonɗinee no mii hawti e Baaba, Baaba bo e hawti e am. Baa to on goonɗinay am, goonɗinee gam golle am. 12Mii bata on e gooŋa, neɗɗo fu goonɗinimmi, waɗan kanun bo golle ɗe gaɗanmi. O waɗan du ko ɓuri ɗe, gam mii yaha to Baaba. 13Mi waɗanan on huune fu ko eelirɗon e inne am. Mi waɗan ɗum gam Ɓiɗɗo hollita tedduŋal Baaba. 14Ko eelirɗon e inne am, mi waɗan ɗum.»

Yeesu wi'i lildaan Ruuhu Ceniiɗo

15«To oon jiɗi am, on tokkan ooda am. 16Mi eelan Baaba hokka on balloowo goɗɗo. O wondan e mooɗon faa abada. 17Oo ɗon woni Ruuhu gooŋa. Duuniyaaru nuu waawataa ko jaɓi mo, gam nu yi'ataa mo, nu annaa mo. Amma onon, oon anni mo gam oo wondi e mooɗon, oo tawaa bo der mooɗon.

18Mi accataa on hande gonɗaaɓe, mi wittaan to mooɗon. 19E horii seɗɗa, duuniyaaru nuu yi'ataa am kade. Amma onon, on ji'an am, gam mi buuruɗo, onon bo on buuran. 20Nyanne muuɗum on paamaan mii hawti e Baaba, onon bo oon kawti e am, go mii woni e mooɗon.

21Jogiiɗo oodaaji am go e tokki ɗi, kanko nun woni jiɗuɗo am. Baaba am yiɗan jiɗuɗo am. Min bo, mi yiɗan mo, mi anninan mo hoore am.»

22Yahuuda, banda Yahuuda Isikariyotu, wi'i Yeesu: «Joomam, noy ɗum laatortoo kollitaa men hoore maa, tawee a hollitay duuniyaaru hoore maa?» 23Yeesu toontii mo: «To goɗɗo e yiɗi am, o golliran haala am, Baaba am yiɗan mo. Min e Baaba men garan to makko, men jooɗodo e makko. 24Neɗɗo fu mo yiɗaa am, gollirtaa haala am. Haala ka nanoton kan, ka am bane, haala Baaba am liloyɗo am nun.

25Mi batii on ɗum diga mii wondi e mooɗon. 26Ruuhu Ceniiɗo, balloowo on, mo Baaba liloyta e inne am, kanko nun anninta on kujje fu. O siwtoran on ko batunoomi on fu.

27Mii accana on jam, mii hokka on jam am. No duuniyaaru hokkirta bane kokkiranmi on. To on accee ɓerɗe mooɗon biisoo, to on kulee. 28On nanii ko bi'umi on: "Mi yahan, amma mi wittaan to mon." To oon jiɗunoo am, ɓerɗe mon welanno gam mii yaha to Baaba, gam kanko ɓurimmi manŋu. 29Mii bata on ɗum, diga ɗum waray taw, gam to ɗum warii, goonɗinon. 30Mi batataa on kade haalaaji ɗuuɗɗi, gam laamiiɗo duuniyaaru nuu e wara. O waawataa waɗugo goɗɗum, 31Amma sey duuniyaaru annita no mii yiɗi Baaba, nu annita bo no mii waɗa ko Baaba wi'i am mi waɗa. Ummee, jawten diga ɗo.»

Iliyochaguliwa sasa

Yuhaana 14: BFB

Kuonyesha

Shirikisha

Nakili