Fuɗɗoode 32
32
1No weeti, diga subaka, Labani waynii sukaaɓe mum e taaniraaɓe mum, o wuunii ɓe, o barkiɗini gooto gooto maɓɓe. Ɓaawo mum o hooti wuro makko.
2Yaakuubu yanti laawol mum e yaha. Ɗon nun malaykaaɓe Alla hewtii mo. 3No o yi'i ɓe, o wi'i: Haɓanooɓe Alla nun ɗoo. O noddi nokkuure nen Mahanayimu. Ko inne nen filliti nun, koɗorɗe ɗiɗi.
No Yaakuubu siriyorii fottugo e Isuwa
4Yaakuubu waɗi lilaaɓe yaha to mawniiko Isuwa faa Seyri der ladde Edomu. 5O bati ɓe o wi'i: Kaa ɗoo nun batoyton mawɗo am Isuwa bi'on: Min maccuɗo makko Yaakuubu, mi yahii to Labani, diga ɓooyii nun jooɗiimi ton faa warugo hanne. 6Mii woodi na'i, e babbi, e baali, e maccuɓe, e horɓe, kanka nun jiɗumi batugo mo, kanko mawɗo am, gam o waɗanammi moƴƴere.
7Lilaaɓe ɓen wittoy to Yaakuubu wi'i mo: Men jahii to mawniraawo maa Isuwa. Oo wara bo fottugo e maa e himɓe keme nayo (400). 8Ɓerne Yaakuubu taƴi, o huli sanne. O seenni himɓe makko, e baali makko, e na'i makko, e jeeloobi makko geɓe ɗiɗi. 9O wi'i: Baa to Isuwa warii haɓii e hoɗorde woore, jaalii ne, den mum kan horiine heɓan daɗa.
10Yaakuubu eeli Alla wi'i: Alla maama am Iburaahiima, e Alla baaba am Isiyaaku, an Joomiraawo am nun wi'i mi hoota leydi am, to lenyol am, a waɗanan am ko wooɗi. 11Mi fotay waɗaneego moƴƴere e gooŋaaku ko gaɗanɗaa am, min maccuɗo maa. Gam e sawru am tan nun jolirnoomi gooruwol Urudun ŋol ɗoo. Amma jooni, wuro am waɗii koɗorɗe ɗiɗi. 12Mi eelete nun, teetaa am diga juuɗe mawɗo am Isuwa, gam mii hula, o wara o yantammi, o warammi min e rewɓe am e sukaaɓe am. 13An nun wi'i a waɗanan am ko wooɗi, a ɗuuɗinan lenyol am hande jaaneeri maayo ni goɗɗo waawataa limugo.
14Ɗon nun Yaakuubu waali. O nokki jawdi makko gam o hokkora mawniiko Isuwa. 15O nokki be'i keme ɗiɗi (200), e ginniiji laso (20), e baali keme ɗiɗi (200), e jawdiiji laso (20), 16e jeeloobi debbi laso e sappo (30), e ɓikkon majji, e na'i lasoy ɗiɗi (40), e ga'i sappo, e babbi debbi laso (20), e babbi gori sappo. 17O seenni ɗiye fu e hoggo mum, o hokki ɗi maccuɓe makko o wi'i ɓe: Ardee yeeso am, accee kogge ɗen e tokkontiri, e hokkontiri jayri hakkune majje. 18O bati ardiiɗo o wi'i: To a fottii e mawniraawo am Isuwa, to o ƴamii maa diga wuro moy nun ƴiwoyɗaa, toy jahataa, mareefuuji moy nun tokkuɗaa? 19Toontoɗaa mo bi'aa: Mareefuuji maccuɗo maa Yaakuubu nun. Ɗi laati nun kokkoral ŋal o lildoy maa an Isuwa joomiraawo am. Kanko e hoore makko, oo waraa ɓaawo. 20Haala goota kan nun o bati ɗiɗaɓo e tataɓo, non non bo e tokkuɓe mareefuuji ɗin fu. 21O wi'i kade: Baton mo bi'on, min maccuɗo makko, mii waraa ɓaawo. Gam o miilii e ɓerne makko o wi'i: To Isuwa yi'ii kokkoral ŋal ardinmi, mone makko deƴƴan. Den mum to mi fottii e makko, o jaɓan am e ɓerne welune. 22Ɓe o lildi kokkoral ŋal ardii, amma kanko kan o waali e hoɗorde ɗon jemma mum.
No Yaakuubu waylitiranaa inne
23Yaakuubu ummii jemma mum, etti rewɓe mum ɗiɗo, e horɓe mum ɗiɗo, e sukaaɓe mum sappo e go'o, o jolini ɓe gooruwol noddeteeŋol Yabboku. 24No o jolini ɓe o heennyi, o jolini bo ko o woodi fu. 25Yaakuubu horii kan tan. Ɗon nun gorko gom wari duruwi e makko faa weeti. 26No gorko on tawi waawataa doƴƴugo Yaakuubu, fiyi mo e gaaruure. Gaaruure Yaakuubu siliɓii wakkati ɓe duruwata. 27O wi'i Yaakuubu: Yoofam mi yawta, gam fajiri waɗii. Yaakuubu toontii mo: Mi yoofataa maa jawtaa, sey taa barkiɗinii am. 28Gorko on ƴami: Noy inne maa? O toontii: "Yaakuubu nun". 29Gorko on wi'i kade: A noddataake kade Yaakuubu, Isira'iila nun noddeteɗaa, gam a duruwii e Alla, duruwuɗaa bo e himɓe go jaaliɗaa. 30Yaakuubu wi'i mo: Sawra, batan inne maa. O toontii o wi'i: Gam ume ƴamataa inne am? O barkiɗini mo. 31Yaakuubu noddi nokkuure nen Peniyeli. Inne nen filliti nun, yeeso Alla. O wi'i: Mi yi'ii Alla e gite, go yonki am daɗi. 32Wakkati naaŋe fuɗata nun Yaakuubu joli gooruwol Peniyeli. Diga nyanne mum nun o fuɗɗi fooɗugo gaaruure. 33Kan acci, diga nyanne mum faa warugo hanne, himɓe Isira'iila nyaamataa siniyawol gaaruure, gam e siniyawol gaaruure nun Alla fiyi Yaakuubu go o siliɓii.
Iliyochaguliwa sasa
Fuɗɗoode 32: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.