Fuɗɗoode 30
30
1No Rahiilu yi'i rimday e Yaakuubu, waɗidi mawniraawo mum nawniraagu. O wi'i Yaakuubu: Hokkam sukaaɓe, baka mum mi maayan. 2Mone Rahiilu waɗi Yaakuubu. O wi'i: Min woni Alla kaɗuɗo maa dingol na? 3Rahiilu wi'i: A yi'ii ɗo korɗo am Biliha, ɓaŋu mo, den mum diga e makko, min bo mi heɓa sukaaɓe mi jogoo. 4O hokki mo korɗo makko Biliha o ɓaŋi. Yaakuubu hawti e makko. 5O saawi, o rimani Yaakuubu suka gorko. 6Rahiilu wi'i: Alla Joomiraawo hiitanake am, o nani du'aare am, o hokkimmi suka gorko. Kan waɗi o hokki mo inne Dan. 7Biliha korɗo Rahiilu saawi kade, o rimani Yaakuubu suka gorko ɗiɗaɓo. 8Rahiilu wi'i: Mi duruwii duruwo manŋo e mawniraawo am, mi jaalake bo. Go o hokki mo inne Nefutali.
9No Leya yi'i ɓooyii rimay kade, etti korɗo mum Jilipa hokki Yaakuubu ɓaŋi. 10Jilipa korɗo Leya rimani Yaakuubu suka gorko. 11Leya wi'i: Mi waɗii saa'a. O hokki mo inne Gada. 12Jilipa, korɗo Leya rimani kade Yaakuubu suka gorko ɗiɗaɓo. 13Leya wi'i: Mi nanii belɗum, gam rewɓe fu noddan am nanuɗo belɗum. Go o noddi mo Asee.
14Nyalaane gom, wakkati alkamaari ruggetee, Rubeni yahi ladde, o heɓoy ɓikkon mandaragoore#30:14 mandaragoore: Himɓe e miili ɓikkon leggal ŋal hokkan nun sukaaɓe, o wartirani inniiko Leya. Ɗon nun Rahiilu wi'i Leya: Sawra, hokkoram ɓikkon leggal kon suka maa wartirani maa kon. 15Leya toontii mo wi'i: A teetii gorko am, ɗum heƴay maa, kade bo aa yiɗi teetaa ɓikkon leggal kon suka am wartiranimmi? Rahiilu wi'i: Sawra, mi accan gorko men waala suudu maa kiikiiɗe, gam sabbu ɓikkon leggal kon suka maa wartirani maa kon. 16Kiikiiɗe no Yaakuubu wartata diga e gesa, Leya ummii taɓɓitii mo wi'i: Hanne, suudu am nun baalataa, gam mi soodii maa, mi yoɓanii waalande maa e ɓikkon mandaragoore kon ɓiyam wartiranimmi. Jemma mum, Yaakuubu waali e makko. 17Alla nani du'aare Leya, o saawi, o rimani Yaakuubu suka gorko joyaɓo. 18Leya wi'i: Alla yoɓii am joddi am, gam mi ɓaŋanii gorko am, korɗo am. O hokki mo inne Isakaa. 19Leya saawi kade, rimani Yaakuubu suka gorko, jeego'aɓo. 20Leya wi'i: Alla hokkorii am kokkoral booɗuŋal. Jooni, gorko am takkoto am, o teddinammi, gam mi rimanii mo sukaaɓe worɓe jeego'o. O hokki mo inne Jabulon. 21Ɓaawo mum o rimi suka debbo, o noddi mo inne Dina.
22Alla siwtori Rahiilu, nani du'aare makko, hokki mo ɓeyŋu. 23O saawi, o rimi suka gorko, o wi'i: Alla wurtinii am senteene. 24O hokki mo inne Yusufu. O wi'i: Joomiraawo ɓeydanammi kade suka gorko.
No Yaakuubu waɗiri jawdi
25Ɓaawo no Rahiilu rimi Yusufu, Yaakuubu wi'i Labani: Accan mi yawta, mi hoota faa leydi am. 26Hokkam rewɓe am e sukaaɓe am ɓe gam sabbu mum gollan maa mi, mi hoota. Gam aa anni no gollal manŋal nun gollan maa mi. 27Labani toontii mo wi'i: Sawra, waɗanam moƴƴere, gam mi faamii, gam sabbu maa nun Alla barkiɗinimmi. 28Batam ko joɓan maa mi, den mi yoɓee. 29Yaakuubu wi'i mo: A yi'ii no gollorani maa mi. A yi'ii bo jaka no kogge baali maa foti ɗuuɗugo gam sabbu am. 30Gam baali seɗɗa nun goodunoɗaa go mi wara to maa. Amma no jottiimi to maa, Alla barkiɗinii maa go ɗi ɗuuɗi. Jooni, wakkati kiye nun keɓanmi gam mi gollanoo wuro am. 31Labani ƴami mo wi'i: Ume nun kokkan maa mi? Yaakuubu toontii wi'i: Mi yiɗaa kokkaa am fu goɗɗum. To a jaɓii, mi durante kade hoggo baali maa. 32Accu mi naata caka kogge baali maa hanne, mi sutta baali malleeji e ɓaleeji feere, non non bo be'i malleeji e ɓaleeji mi sutta ɗum feere. Kanji nun laatotoo joddi am: 33Jaaŋo, taa warii daarugo joddi am, ɗon nun gooŋaaku am hollitintoo. To a yi'ii be'i ɗi laataaki malleeji, naa bo baali ɗi laataaki ɓaleeji der hoggo am, den mum mi laati nun gujjo. 34Labani wi'i: Wooɗii, en gaɗu hande no bi'uɗaa. 35Nyanne mum, Labani sutti feere, ginniiji be'i norɗi, e malleeji, e be'i malleeji, e baali ɓaleeji e malleeji o hokki ɗi sukaaɓe makko. 36Ɓaawo mum o waɗi ɗi dilliraa woɗɗi, jaka jahaaŋal balɗe tati diga to Yaakuubu woni. Yaakuubu bo e dura baali Labani koriiɗi.
37Yaakuubu heɓi cabbi leɗɗe tati feere feere kecci, o ɓolti ɗi ɗi gaɗi malleeji. 38Ɗon nun o watti cabbi ɗin der to ɗi jarata diyam, gam to ɗi garii yarugo diyam nun ɗi teddata. 39Gam to ɗi teddii wakkati ɗi jarata diyam, to cabbi ɗin wattaa, ɗi diman nun ɓikkon mallehon. 40Yaakuubu e sutta ɓikkon baali ɓalehon e mallehon diga hoggo baali Labani e yesa feere gam ɗi laatanoo mo. 41Wakkati baali janɗuɗi teddata fu, oo yesa cabbi ɗin e yeeso majji. 42Amma to baali ɗi walaa semme nun teddata, o yesataa cabbi ɗin yeeso majji. Non non ɗum waɗi go baali ɗi walaa semme ɗin laatii ɗi Labani, gooduɗi semme bo laatii ɗi Yaakuubu.
No Yaakuubu doggiri diga to Labani
43Non non Yaakuubu waɗi o heɓiri jawdi ɗuunni. O heɓi baali e be'i, e jeeloobi, e babbi, e maccuɓe, e horɓe.
Iliyochaguliwa sasa
Fuɗɗoode 30: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.