Fuɗɗoode 27
27
No Yaakuubu jaɓiri barka Isuwa
1Isiyaaku naywii, gite mum tampii faa o waawataa kade yi'ugo. Ɗon nun o noddi ɓiyiiko afo, o wi'i: Ɓiyam! Oo ɗon toontii wi'i: Na'am! 2Isiyaaku wi'i: Nani mi naywii, mi annaa bo nyalaane ne maayanmi. 3Jooni, mi eelete nun, ettu biroogal maa, e ɓaaru maa, jahaa ladde baranaa am tew. 4Den mum jonŋanaa am nafa hande no jiɗirmi, gaddanaa am mi nyaama gam mi barkiɗine go mi maaya, 5Rebeka e nanannoo ka Isiyaaku batannoo ɓiyum Isuwa. No Isuwa yawti ladde gam waranoygo baaba mum tew. 6Rebeka bati Yaakuubu ɓiyum wi'i: Mi nanii baaba maa e bata Isuwa mawniraawo maa e wi'a: 7Yahu ladde baranaa am tew, jonŋiranaa am nafa belka, mi nyaama, den mi barkiɗine yeeso Joomiraawo go mi maaya. 8Jooni, an suka am, hettina nanaa ka batan maa mi. 9Mi eelete nun jahaa hoggo be'i, nanŋanaa am borti be'i ɗiɗi booɗɗi, gaddanaa am, mi jonŋirana ɗi baaba maa nafa belka, hande no o yiɗiri. 10Den jaaranaa mo ka o nyaama, gam o barkiɗine go o maaya. 11Yaakuubu toontii inna mum wi'i: Ɓannu Isuwa mawniraawo am woodu nun leeɓi, nani, min mi walaa leeɓi. 12Waɗoto baaba am meemammi, den mi laatoo pewoowo yeeso makko. Den mum o yaa'oto am, mi dulla barka ka jiɗunoomi heɓugo. 13Inniiko wi'i mo: Suka am, yaa'oore nen yana e hoore am. Anni, nanu ka batan maa mi, yahu gaddanaa am borti ɗin. 14Ɗon nun Yaakuubu yahi nanŋi borti ɗin, waddani ɗi inna mum. Inna on jonŋirani ɗi Isiyaaku nafa ka yiɗi. 15Ɓaawo mum, Rebeka etti kolte Isuwa suka mum afo ɓuruɗe wooɗugo, ɓorni ɗe Yaakuubu suka mum koddaajo. 16O etti guri borti be'i ɗin, o ɓornini e juuɗe Yaakuubu e daane mum gam o walaa leeɓi. 17O etti nafa belka kan e peen, o hokki Yaakuubu ɓiyiiko.
18Yaakuubu yaarani ka baaba mum wi'i: Baaba. Isiyaaku toonti wi'i: Na'am! Ɓiyam a moy nun? 19Yaakuubu toontii wi'i: Min woni Isuwa, suka maa afo. Mi waɗii ko bi'uɗaa am. Umma jooɗa, ƴakkaa tew ɗum gaddan maa mi, den barkiɗinaa am. 20Isiyaaku ƴami mo wi'i: Suka am, noy waɗi go keɓirɗaa barooga ŋan non non law? Yaakuubu toontii wi'i: Alla Joomiraawo maa nun waddanimmi ŋa faa yeeso am. 21Isiyaaku wi'i Yaakuubu: To non nun, ɓatta ɗo suka am, mi meemee, mi yi'a naa e gooŋa a laati nun suka am Isuwa. 22Yaakuubu ɓattii baaba mum Isiyaaku. Isiyaaku meemi mo wi'i: Daane Yaakuubu nun nananmi, amma juuɗe Isuwa nun meemanmi. 23O annitay mo gam juuɗe makko e woodi leeɓi hande juuɗe Isuwa mawniiko. Amma go o barkiɗina mo, 24o ƴami mo taw o wi'i: E gooŋa a laati nun ɓiyam Isuwa? Yaakuubu toontii wi'i: "Ee", min nun. 25Isiyaaku wi'i: Suka am, ɓattinanam tew ɗum baranoyɗaa am mi nyaama, den mi barkiɗine. Yaakuubu ɓattinani mo o nyaami. O hokki mo bo innabojam o yari. 26Ɓaawo mum, Isiyaaku baabiiko wi'i mo: Ɓiyam, ɓatta, buunoɗaa am. 27Yaakuubu ɓattii, wuunii mo. Isiyaaku nani kolte makko e lutta, go o barkiɗini mo o wi'i:
Suka am e lutta
hande gesa ŋa Joomiraawo barkiɗini.
28Alla toɓina yoone diga dow kammu e gesa maa.
O hokke leydi booɗuni ni barke.
O hokke alkamaari ɗuunni, innabooje maa rima sanne.
29Himɓe ɗuuɓɓe gollane,
lenyi ɗuuɗɗi bo jiccane,
laatoɗaa joomiraawo banniraaɓe maa fu,
ɓiɓɓe inna maa fu jiccanee,
laaluɗo maa fu laatoo laalaaɗo,
barkiɗinɗo maa fu bo laatoo barkiɗinaaɗo.
30No Isiyaaku heennyi barkiɗingo Yaakuubu, oo yawta sikan diga to baabiiko, Isuwa mawniiko e warta diga looŋal. 31Kanko bo o jonŋi nafa belka o yaarani baabiiko. O wi'i mo: Baaba, umma ƴakkaa tew barooga ŋa baranoymaa mi, den barkiɗinaa am. 32Isiyaaku baabiiko ƴami mo wi'i: A moy nun? O toontii, o wi'i: Min woni Isuwa suka maa afo. 33No Isiyaaku nani ka, ɓannu mum fu diwni e semme. O wi'i: Den mum moy nun waranoy am tew waddanimmi, faa mi nyaamidii diga a waray? Mi barkiɗinii mo bo. O heɓan bo barka kan. 34No Isuwa nani ka baaba mum bati, o wulli bojji kaaɗuɗi, o wi'i baabiiko: Baaba am, min bo barkiɗinam. 35Isiyaaku wi'i: Miiraawo maa warii, teetii barke maa e ƴoyre. 36Isuwa wi'i: Hinaa gam o noddaa Yaakuubu nun waɗi o jammii am faa de ɗiɗi? O teetiino manŋaaku am, hanne bo o teeti barke am. A hororaaki kade barke, barkiɗinaa am? 37Isiyaaku toontii mo wi'i: Mi laatinii mo koo joomiraawo maa. Ɓiɓɓe inniiko fu bo, mi laatinii ɓe maccuɓe makko. Mi barkiɗinii alkamaari e innabojam makko. Den mum, ume baawanmi waɗango maa kade suka am? 38Isuwa wi'i baaba mum: Barke goote ɗee tan nun hinaa gooduɗaa baaba? Barkiɗinam min bo. Ɗon nun o jogii hoore o wulli. 39Baabiiko wi'i mo:
Leydi ni jooɗotoɗaa waɗataa barke,
yoone bo toɓantaa ni.
40E kaafahi maa nun marortoɗaa,
a laatoto bo maccuɗo miiraawo maa,
amma taa salorake hoore maa,
a waawan suttugo ɓoggol maccuŋaaku makko diga e daane maa.
Yaakuubu doggii, yahi to Labani
41Isuwa wanyii Yaakuubu gam sabbu barke ɗe baabiiko barkiɗini mo. Isuwa wi'i der ɓerne mum: Baaba am ɓattake maayugo, den mum to o maayii, mi waran miiraawo am Yaakuubu. 42Rebeka bataama ka Isuwa suka mum afo bati. Ɗon nun o noddi Yaakuubu suka makko koddaajo, o bati mo o wi'i: Isuwa, mawniraawo maa e yiɗi warugo maa, gam wattoo mone mum. 43Jooni, nanu ka batan maa mi suka am. Umma, doggu, jahaa faa Harani to sakiike am Labani. 44Jooɗoɗaa to makko, ɓooyaa seɗɗa, faa to hakkillo mawniraawo maa fukkake. 45To mone mawniraawo maa heennyii e maa, to o yeggitii ko gaɗanɗaa mo, den mum mi wartirte. Gam mi yiɗaa mi dulla on on fu ɗiɗo der nyalaane woore.
46Rebeka wi'i Isiyaaku: Mi somii goonki am gam sabbu rewɓe Isuwa, Hetiyankeeɓe ɓee. To Yaakuubu ɓaŋii debbo Hetiyankeejo, ɓii leydi nii, hande ɓee ɗo, ume goonki am nafatammi kade?
Iliyochaguliwa sasa
Fuɗɗoode 27: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.