Golle Lilaaɓe 12
12
Toora goonɗinɓe ɓeydake
1Wakkati mum laamiiɗo Eroodu fuɗɗi e toora himɓe woɓɓe caka eklesiya. 2O wari Yaakuuba, mawniraawo Yuhaana e kaafahi. 3No o yi'i ɗum fottanii mawɓe *Yahuduuɓe, o nanŋi Piyer bo. Wakkati on fotti e juulɗe peen ko gattanaaka ƴuufinirɗum#12:3 Juulɗe ɗen e siwtinora Yahuduuɓe no Muusa wurtiniri kookiraaɓe maɓɓe e maccuŋaaku ŋu Misirankooɓe nanŋunoo ɓe. 4No o nanŋi mo, o maɓɓi mo, o waɗi ukke soogeeji naay reena mo. Ukkere baaney fu e woodi soogeeji naay. Oo yesi hiitaago mo yeeso himɓe to juulɗe *Paska ɗen yawtii. 5Piyer e reenaa der kasu ɗon, amma eklesiya accay eelango mo Alla.
Piyer yoofaama
6No Eroodu yiɗi hiitaago mo yeeso himɓe, jemma mum oo ɗaani hakkune soogeeji ɗiɗi, oo haɓɓiraa callalluuji ɗiɗi. Reenuɓe dammugal kasu bo e reeni. 7Ɗon maa ɗon malaykaajo Joomiraawo wari to makko, suudu ŋol fu laaɓi, o fiyi wuttudu makko, o finnini mo, o wi'i: «Umma law!» Go callalluuji ɗin firtii diga e juuɗe makko. 8Malaykaajo on wi'i mo: «Haɓɓu ɓelɓelol maa, faɗa paɗe maa.» Piyer waɗi non. Malaykaajo wi'i mo: «Waana waanaare maa, tokkaa am.»
9Piyer wurtii, tokki mo. O annaa ko malaykaajo waɗata ɗon naa gooŋa nun, e wa'ani mo hande koyɗool nun. 10Ɓe ƴartii ukkere reenooɓe arandeere, e ɗiɗawre, ɓe jottii dammugal janni daaruŋal far siire. Ŋal maɓɓitii e hoore maggal yeeso maɓɓe, ɓe burtii, ɓe nanŋi laawol maɓɓe. Ɗon de woore malaykaajo acci mo.
11Hakkillo Piyer wittoy, o wi'i: «Jooni mi annitii Joomiraawo lili malaykaajo muuɗum, wara faaboo am e juunŋo Eroodu e ko *Yahuduuɓe yiɗunoo waɗanango.»
12No o faami ɗum, o yahi wuro Mariyama, inna Yuhaana innitirteeɗo Marku, to himɓe ɗuuɓɓe hawritii e du'oo.
13No Piyer fiyi dammugal wuro, korɗo bi'eteeɗo Rooda wari maɓɓitingo. 14No o anniti daane Piyer, o maɓɓitay dammugal ŋal kade sabbu no ɓerne makko weliri. O doggi o batoy ɓe Piyer nun darii yaasi e dammugal. 15Ɓe bi'i mo: «A haaŋa nun!» Amma kanko o tabbitini no Piyer nun. Ɓe bi'i kade: «To nun, malaykaajo makko nun.» 16Amma Piyer accay fiyugo dammugal. No ɓe maɓɓiti ɓe ji'i mo, haaynaare waɗi ɓe sanne. 17O ɓantani ɓe juunŋo gam ɓe deƴƴa, o fillanii ɓe no Joomiraawo wurtiniri mo e kasu, go o wi'i: «Batee ka Yaakuuba, kanko e banniraaɓe horiiɓe.» Ɓaawo muuɗum o wurtii, o yawti nokkuure wonne.
18No weeti, soogeeji e ƴamontira: «Toy Piyer yahi?» Ɗum laatanii ɓe jiɓayeere mawne. 19No Eroodu darti mo yiitay, o wiɗitii haala mum caka reenooɓe, den o wi'i ɓe baree. Ɓaawo mum o ummii diga Yahudiya, o yahi Kaysariya, o jooɗoy ton.
No Eroodu maayiri
20Eroodu e jogii mone himɓe Tiri e Sidon. Ɓe kawri, ɓe baddi ɓe gari to makko. Ɓe artiri ɓe beldi e Bilasitusu, doogariijo makko. Den ɓe daarti beldal Eroodu gam nyaamdu maɓɓe ƴiwataa maa e leydi makko.
21Eroodu yesani ɓe nyalaane ne fottata e maɓɓe. No nyalaane nen yottii, o ɓornii kaddule laamiiɗo, den o jooɗii e kittaal laamu, o baddi ɓe. 22Himɓe bati e daane towne, wi'i: «Daane nee ɗo ne Alla nun, daane neɗɗo bane!» 23Ɗon maa ɗon malaykaajo Joomiraawo fiyi mo gam o teddinay Alla. Gilɗi nyaami mo, o maayi.
24Amma haala Alla witti e yaha yeeso, e ɓeydoo sankitaago.
25No Barnabasi e Sol heennyi golle mum der *Urusaliima, ɓe kootidi e Yuhaana innitirteeɗo Marku.
Iliyochaguliwa sasa
Golle Lilaaɓe 12: BFB
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Bible Fulfulde Bénin © SIM International 2015, 2024.
