VAGALATIA 1
1
Ngezya
1Paulo, e ntume -si ntume wa vantu, neri kutumwa ni mntu, esire Yesu Kristo, na Mrungu Vava emvushije kufuma he vefwie,- 2na vandughu vose veho hamwe nami, Ha makanisa a Galatia: 3Mbonea na iikae na unywi na mporere kufuma he Mrungu Vava na he Mfumwa wetu Yesu Kristo; 4eye ekuinkije mwenye vuntu vwa mabanu etu, nesa atukanie he ii si mbivi ya misi ii, sa vuntu Mrungu Vava wetu ekundie. 5Ngazo ni yakwe kae na kae, Amen.
Paulo esononoya vuntu vwa Vagalatia
6Nimaka iti mumshigha fia huvu ula eye emuitange he mbonea yakwe Kristo, na kugharukia mburi yedi ya mbare ingi. 7Neri esi ingi; mira hena vantu vemurisha vwasi, na kuenda kugharusha Mburi Yedi yakwe Kristo. 8Mira na ere uswi kana malaika wa uko wanga, kakicha enemubirikira Mburi Yedi ingi esire iyo twemubirikire, natufwe. 9Sa vuntu nerongeteta kuvoka na iki nirateta wa, mntu na ere ani, ekimubirikira mburi yedi ingi esire iyo mweighuhiie, natufwe!
Mburi Yedi yezie heye kufuma he Kristo si he vantu
10Hamamo, nisembereja vantu, kana ni Mrungu? kana nienda kuvaizihija vantu? Kakicha nekicherizihija vantu sekioka mndima wakwe Kristo. 11Ambu, vandughu vangu, iyo Mburi Yedi nemubirikire, nimumanyisha iti siyo ya kivantu. 12Ambu siighuhiie he mntu, neri sichejijwe ni mntu, esire he kufunukurirwa ni Yesu Kristo. 13Ambu mwesikie mburi yya mitongire yangu aho kae he mitasire ya Kiyuda, iti nerierieshe kanisa la Mrungu kuvecha kiringanyo, nikalikonda. 14Nami nikazikisha kugurisha mitasire ya Kiyuda, kukela vairika vangu he mbari yangu, nikakudindija kugurisha viziomo vya vazima vangu. 15Mira Mrungu eye enisaghure too he ndeni yakwe mcheku, akaniitanga kwa mbonea yakwe, 16ekinavone iti ni chedi kumfunyirija Mwanawe hemi, nesa nivabirikire Vakiisanga mburi yakwe; hala indi siaghane na vantu vena mwiri na sakame; 17neri sikweie kutonga Yerusalemu, he avo verongore hemi kuoka ntume, mira nikatonga Arabia, nekikenja nikahunduka wa Damasko.
18Miaka mitatu ikinasie nikakwea kutonga Yerusalemu nesa nivonane ne Kefa, nikaikaa hakwe misi ikumi na misano. 19Mira sivonie ntume ungi, esire Yakobo mjinawe Mfumwa. 20Na ivyo nemuandikia, rerehani, mozya he Mrungu, siteta mongo. 21Nyuma nikatonga noko mondo wa Sirya na Kilikia. 22Mira sivoneke vusho vwangu he makanisa a Vayuda eho he Kristo; 23esire iti vesikie du iti, ula ekiturieriesha aho kuvoka, iki ebirikira mwitikijo ula eukondie kae. 24Vakamkaza Mrungu he mburi yangu.
Iliyochaguliwa sasa
VAGALATIA 1: CHSUNT67
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Chasu New Testament © Bible Society of Tanzania, 1967.