Romanos 2
2
Ja Dyosi, jel toj
1Ta ay k'a junuk ja we'nlex waxa le'awex yi smul ja wa mojexi, we'n itani waxa loko a b'ajex ab'ala, yuj jach'ni ja ye'nle'i wanix cho sk'u'lane ja b'a mi lekuki. Ja'yuj mini t'un sb'ejuk oj sle'yi smul sok oj yocheluk ja smoji, 2Jpetsaniltik wax na'atik yajni wax ya' stup ja Dyos ja ma' wa sk'u'lan b'a mi lekuki, yujni sb'eja.
3Ja'yuj ja we'nlexi ta wan k'axa wa'a wochelex ja ma wa sk'u'lan b'a mi lekuki, ta wan k'ax cho a k'u'lanex ja we'nlex ja jas wa sk'u'lane'i, jelni ch'ayelexa, wa'n a maxa walawex mi ojni ya' a tup'ex ja Dyosi. 4Ja Dyosi, jel lek, jel ja spasensia, ti wa skuchu spetsanil ja jas mi lekuk waxa k'u'lanexi. Mok a wal'ex ta yuj mi wax yila ja jas waxa k'u'lanexi. Ja Dyosi jel ni yaj sk'ujolex a sutxuk wa k'ujolex sok ja jas mi lekuk waxa k'u'lanexi. 5Ta yuj k'a mixa k'u'anex, sok mi k'ax sutxi ja wa k'ujolex sok ja Dyosi, jel tsats oj ya' a tup'exa. Oj k'otuk ja k'ak'u oj ya'kitik ja wokol b'a jpetsaniltik ja Dyosi, sok tsats lek oj ya' a tup'ex ja we'nlexi. 6Ja Dyosi kada jujune oj yaj jtuptik ja jastal ni sb'ej oj ya'ki'tika. 7Ja ma'tik sk'u'lane b'a leki, ay sniwanil sk'ujole b'a oj a'juk yi'e yuj ja Dyos jun sak'anil b'a mini nunka oj ch'akuk, sok ti oj ajyuke spetsanil k'ak'u sok ja Dyosi. 8Ja ma mi sk'u'ani, sok ja ma mi tojuk ja jas wa sk'ulani, ta mi sk'ana oj sk'u'luk ja b'a leki, jel tsats oj a'juk yi ja wokoli. 9Spetsanil ja ma toj mi lekuk ja jas wa sk'u'lani, jelni oj yi'e ja wokola, sok mi tajneluk ja wokol jawi; A'nima judio ma mi judio'uk. 10Ja'xa ma sk'u'lunej ja b'a leki, oj a'juk yi jun slugar b'a jel tsamal yuj ja Dyosi, oj cho toyjuke sok laman oj ajyuke; A'nima judio ma mi judio'uk. 11—Yuj ja Dyosi junxta kab'altik wax yilawotik.
12-13Ja Dyosi jel lek wax yila ja ma wa sk'u'an ja mandar it a'ji yi ja Moisesi, ja ma kechan wa smakla mi sk'u'ani, mini oj iljuk leka. Ja ma wa sna'a ja jas wax yala ja mandar it a'ji yi ja Moisesi, sok wa sle'a ja smuli, ojni a'ji stup jastal wax yala ja mandar jawi. Jaxa ma mi sna'a sok wa sle'a ja smuli, ojni cho a'ji stupa a'nima mi sna'awe ja jas wax yala ja mandari. 14Yuj ja ma'tik mi judio'uki, wa sk'u'ane ja yab'al ja Dyosi, a'nima mi sna'awe ja mandar it a'ji yi ja Moisesi, ye'nle wa sna'awe b'a'ya leki, sok b'aya mi lekuki. 15-16Lajan sok ti ts'ijb'anub'al b'a s'olome. Ja mandar jawi, jach' wax ilxi ja jastale'i, ta ay k'a jas wane sk'ulajeli wa sna'awe ta lek ma mi lekuk.
Ja b'a tsamal it wa sje'a ja Dyosi, ye'n ja Kajwaltik Jesús oj yil spetsanil ja jas wa sk'u'lan ja kristyano jumasa. Ja k'ak'u jaw ja Dyosi, oj ya chiknajuk ja jas nak'ul ab'al ay b'a jas wa sk'ulan ja kristyano jumasa.
Ja judio jumasa sok ja smandar ja Moisesi
17Ja we'nlexi, ay ma wa stoyo sb'aj ke judio'ex. Jach' waxa walawex. Yuj ja ti a wi'ojex ja mandar it a'ji yi ja Moisesi, sok jel waxa toyo a b'ajex waxa k'u'anex ja Dyosi. 18Na'awik jasun wa sk'ana ja Dyosi, cho jach'ni ja yajni waxa k'elawex ja b'a ts'ijb'anub'al ja yab'ali, neb'awik sok na'awik b'a'ya leki. 19Waxa na'awex lek ja jas waxa walawex yab' jas oj sk'u'luk ja ma wa sta'a smul b'a oj sta' ja skoltajel tak. 20Yuj ja tey b'a a k'ab'ex ja yab'al ja Dyosi, ja'yuj waxa je'a a b'ajex yi ja ma mi ja sna'a ke jel waxa na'awex, lajan sok kechan we'n a b'ajex ja smeranili.
21¿Jastal oj b'ob' a je'ex yi ja tuk jumasa, ta mik'axa na'awex ja we'nlex b'a? ¿Jastal oj b'ob' a je'ex mi lekuk ja elk'aneli, wala elk'aniyex ja we'nlex tak? 22A petsanilex waxa walawex toj oj ajyanik sok wa che'umexi, we'n wax waj ja ta' ab'ajex sok pilan ixuk tak. Yuj ka mi lek waxa wilawex ja k'u'lub'al dyos jumasa, jas lom wax waj ja welk'anex ja kosa jumasa b'a snajtsil stsomjel b'a. 23Meran, jel waxa toyo a b'ajex, yuj ja ti a wi'ojex ja yab'al ja Dyosi, mi waxa k'u'anex ja jas wax yala, jelni k'ixwela a b'ajex ja b'a sti sat ja Dyosi.
24Ja'yuj ayni sb'ej ja wax yala ja yab'al ja Dyosi: —Ja kristyano ma mi sk'u'ani, mi lek wax k'umaniye sb'a ja Dyosi, yuj a mul we'nlex.
25B'a mi jas oj makunuk ta ay ma wax a'xi senya b'a sk'unili, ta mik'a sk'u'an ja mandari. Ta wan k'a sk'oko, lajan sok mini yi'ojuk senya'a. 26Jaxa ma mi yi'ojuk senya b'a sk'unili ta wan k'a sk'u'an ja mandari, lekni wax iljiye yuj ja Dyosi, a'nima mey senya b'a sk'unili. 27Ja'yuj ja ma wa sk'u'an meran ja mandari, ojni sk'el'ex ja we'nlexa, a'nima mey senya b'a sk'unili ja ye'nle'i. Yuj ja we'nlexi ayni senya b'a wa k'unilex sok ti'ni ay b'a wa k'ab'ex ja mandari, mini a k'u'anexa.
28Mok a wal'ex ke yuj ja' ti' judio'ex yuj ja waxa nochowex ja jastal ja judio jumasa, ma yuj ja lom ay senya b'a wa k'unilexi. 29Ja ma judio merani, ja ma wa sk'u'an ja yab'al ja Dyosi, mi ja'uk wa sk'u'an ja mandar sb'a kristyano, ja kristyano jastal iti, ja'ni wa sk'ana ja Dyosi, a'nima mi nix k'anji yuj ja kristyano jumasa, —xchi ja Pablo.
Iliyochaguliwa sasa
Romanos 2: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
