Hechos 20
20
Ja Pablo waj b'a Masedonia sok b'a Gresia
1Yajni lamxi spetsanil ja k'umali, jaxa Pablo ti sjeka spayjel ja ma'tik sk'u'aneta ja yab'al ja Dyos b'a yal yab' mok lom ya'wekan sk'u'ajel ja Jesusi. Ti'xta'a ch'ak sk'umuk kan ja ye'nle'i, ti waj b'a Masedonia. 2Chol ek'i, b'a stsatsal k'ujolan ja yuntikil ja Dyosi a'b'i ajyuke tsats b'a sk'u'ajel ja Kajwaltiki. Yajni el ja tiwi ti waj b'a Gresia, 3Oxe ixaw ti ajyi tiwi.
Ja Pablo ojxa waj k'e b'a jun barco ajyi ti'xa wajum ajyi b'a Siria, waj yab' yab'alil ay b'i chab' oxe judio chapan yujile oj b'i yamjuk. Ja'yuj yala ti oj cho kumxuk b'a Masedonia. 4Jitsan winik mojtaji yuj: Waj ja Sopatro yunin ja Pirro sb'a Berea; ja Aristarco, ja Segundo sb'a Tesalonica; ja Gayo, sb'a Derbe; ja Timoteo, ja Tiquico sok ja Trofimo, ja ye'nle'i ti sb'aje b'a Asia. 5Spetsanil ja ye'nle'i ye'n b'ajtan wajye yuj ja ke'ntikoni, ti smajlayotikone sok ja Pablo b'a chonab' Troade.
6Yajni ek' ja sk'inil ja pan it mey yi'oj levadura, ja Pablo sok ja janek' jmoj b'ajtikoni, eltikon b'a Filipo man b'a sti' niwan paman ja' b'a Filipo man k'otikon b'a chonab' Troade. Jo'e k'ak'u yi'aj kujtikon ja b'eji, ti k'otikona, jta'a jb'ajtikon sok ja winik jumasa jawi, ti kantikon juke k'ak'u sok ja ye'nle'i.
Ja Pablo waj b'a chonab' Troade
7-8Ja k'ak'u domingo jtsomo jb'ajtikon b'a jun na'its b'a jun kaje cha'an, b'a oj wa'kotikon sok ja wa'el sb'a Kajwaltiki. Ay jitsan kandil wa'n ajlel. Ja Pablo ja pilan k'ak'u yuj ja oxa wajuki, ja'yuj mix ch'ak yaljel ja yab'al ja Kajwaltik Jesusi, man nalan a'kwal ti'toni wa'n yaljela. 9Ay jun kerem Eutico sb'i'il, ti kulan ek' b'a jun sbentana'il ja na'itsi, yuj ja alb'i wa'n yaljel ja yab'al ja Dyos ja Pablo, ti och swayel ja kerem jawi, junta ch'ay k'ujol mokoni, tey k'ot man b'a yoxil kaje ja na'itsi. Yajni waj stul'e'i chamelxa. 10Jaxa Pablo ko'i, snujts'in sb'aj ja b'ay ja keremi, ti stela'a ti yala'a: —Mok chamuk a k'ujolex— Sak'an ay, xchi.
11Ti'xta'a, cho k'ek'e ja b'a ajyi k'oti, ti'xa och spil ja wa'el sb'a Kajwaltiki, ti cho och yal ja yab'al ja Dyosi, man el ja k'ak'u. Tsa'an ti'xa waja.
12Jaxa Eutico, i'ji och b'a snaj yuj ja jmoj alijeltik jumasa, lek ay lek, sok ja jawi jel a'ji stsatsal k'ujoluk sb'aj.
Ja Pablo b'a Mileto
13Ja Pablo yala oj waj sok yok man chonab' Aso, jaxa ke'ntikoni wajtikon sok jun barco b'a oj waj ta'tikon jani. 14Jaxa yajni k'otikoni, ti jak sta'otikon ja b'a barco aytikon soki, lajanxa wajtikon ja b'a niwan paman ja' b'a Mitilene. 15-16B'a schab'il k'ak'u ti ek' ja barco b'a sti' xe'n takin lu'um k'inal b'a chonab' Quio, b'a yoxil k'ak'u ti k'otikon b'a sti niwan ja' b'a Samos, ja Pablo mixa sk'ana oj ek'uk' b'a Efesio cho mi sk'ana oj alb'uk b'a Asia, yuj ja wa sk'ana oj k'ot wego ja b'a chonab' Jerusaleni, b'a ti oj ajyuk tiw ja sk'ak'u'il k'in Pentecostesi. Ayto sk'ana jun k'ak'u ja k'in ja k'otikon b'a sti' niwan ja' b'a Mileto.
Ja Pablo sok ja ma'tik ay ya'tel b'a Efesio
17Yajni tey ja Pablo b'a chonab' Mileto sjeka spayjel ja ma'tik ay ya'tel yujile ja moj aljeltik jumasa b'a Efesio b'a oj lo'lanuk soke. 18Yajni k'otye'i, ti yal yabye'a:
—Ja we'nlexi, waxa na'awex lek jastalon ja k'en, man sb'ajtanil k'ak'u k'otyon b'a Asia. 19A'nima jel ki'aj ja wokol yuj ja ab'al k'umal jumasa, sk'u'laneki ja judio jumasa, a'nima sok spetsanil jk'ujol jk'u'lanta ja jas yala kab' ja Kajwaltik Jesusi. 20Mini t'un ka'kan yaljel a wabyex ja jastal oj ja ta' wa koltajelex b'a tsamal oj ek' a wujilexi, a'nima ti b'a pat maka kala wabyex ma ti b'a wa najex kalani awabyexa. 21Ja ma' judio sok ja ma mi judio'uk, kala a wabyex k'anawik yi ja Dyos a sch'ay ja wa mulexi, cho k'u'anik ja Kajwaltik Jesusi.
22—Ja ya'n ojxa b'ob' wajkon b'a Jerusaleni, ja Espiritu Santo yuj jach' wa'n yaljel kab'i. Mi na'b'en jasunk'a oj ek' kujil ja tiwi. 23Chikan b'a wala wajyon ek'a, ja Espiritu Santo wax yala kab'i ja b'a Jerusaleni oj b'i slut'one sok jel b'i oj yixtala'ukone. 24Minix cham jk'ujola yuj ja ojni chamkona. Ja b'a wanix k'ana ja ti' oj ajyuk jmok ja slekil stsamalil ja jastal kala ja syajal sk'ujol ja Dyos ja jastal yaloj kab' ja Kajwaltik Jesusi.
25—Wax na'a lek mixani jun ma' ojto b'ob' yil'on a wujilex ja ma'tik je'a a wi'ex ja yab'al ja Dyosi. 26Ja'yuj wax kala wabyex b'a jach' mini jun ma oj jta' jmul sok ja we'nlexi, 27ch'aktani kala wabyex ja jastal wa sk'ana ja Dyosi. Mi jas jnak'a a wi'ex.
28—We'nani oj b'ob' a talnan b'ajexa, oj cho a talnayex ja jmoj alijeltik jumasa. Na'awik t'unuk ye'n ja Espiritu Santo ya'a wa'telex yuj ja jmoj alijeltik jumasa, b'a oj ja talnayex spetsanil ja ma'tik skolta ja Dyos yuj ja schik'el ja yunini.
29Yajni la chamyoni, ay ma oj jak jastal ja k'ak'al ok'il oj jak sjom yi s'olom spetsanil ja jmoj alijeltik jumasa. 30Ja ya'n cho ay chab' oxe wa'ne snochjel ja Kajwaltik Jesusi, ja tsa'ani, toj le'uj ab'al ja jas oj sje'e'i, jach' oj noch juke yuj ja jmoj alijeltik jumasa sok jach'ni oj k'u'ajuke'a.
31—Ja'yuj talna lek a ab'ajex. A jak lek a k'ujolex ja jas kala wabyex b'a yojol oxe jab'ili, a'nima yoj ab'al k'umaluk ja ke'n kalani a wabyexa.
32—Ja ya'n wax k'ana yi ja Dyos a stalnayex lek. Ja' tsamal yab'al oj skoltayex b'a spetsanil tiempo b'a tsamal oj ajyaniki. Ta wan k'axa k'u'anex, ja Dyosi, ojni sk'u'luk ja jas yalunej yab' spetsanil ja ma stsa'unej b'a oj och yuntikili.
33—Mini t'un b'a jk'ana a wi'wex tak'in ma jk'u' jwex. 34Waxa na'awex lek sok jk'ab' ke'n a'tijiyon b'a jta'a spetsanil ja jas makuni kujtikon sok ja ma'tik wa skoltayoni. 35Je'a a wi'ex t'ilan oj a'tijananik b'a oj ja koltayex ja ma' mi ja syi'oji. A jak a k'ujolex ja jas yal kab'tik ja Kajwaltik Jesusi: —Mas lek wax yila ja Dyos ja ma' wax ya'a ke yuj ja ma' wax yi'aji, xchi.
36Yajni ch'ak k'umanuk ja Pablo, ti ko' mek'an sok spetsanil ja ma'tik ay ya'tel b'a snajtsil tsomjeli, ti och sk'umuk ja Dyos yuj ja ye'nle'i. 37Spetsanile ch'ak och ok'uke, stela sb'aje sok ja Pablo yujts'ane. 38Jel cham k'ujol aye yuj ja lom aljita yabye yuj ja Pablo mixani oj yil sb'aje pilan majke'i. Tsa'an smojtaye spetsanile ja Pablo, man k'e' b'a barco.
Iliyochaguliwa sasa
Hechos 20: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021
