2 Corintios 5
5
Wax k'anatik oj ajyukotik ja b'a snaj ja Dyosi
1Ja ke'ntiki, wax na'atik lek jastal aytik ja b'a lu'um iti, lajan sok jastal ti aytik b'a jun na'its k'u'lub'al sok k'u'uts, oj k'otuk ja k'ak'u oj ch'ay sna'jel. Jaxa b'a satk'inali, ay jun jnajtik b'a mini oj ch'akuka, ja na'its jawi, ja' sk'u'lunej ja Dyosi, mi sk'u'lb'enuk winik. 2-3Ja janek' ti'to aytik b'a lu'um iti, wax ok' jk'ujoltik ja na'its b'a ti oj ajyukotik spetsanil k'ak'u. Wax na'atik lek ja yajni ti'xa ayotik tiwi, talnanub'al lek oj ajyukotik. 4Ja janek' ti'to aytik b'a na'its iti, ja'ni ja jkwerpotiki jel cham k'ujol aytik wax kab'tik sok yajtikotixta. Sok mi yuj mix k'anatik oj chamkotik, ja wax k'anatiki, ja oj tukb'uk ja jkwerpotiki, jaxa jas ojni ch'ay sna'jeli, a tukb'uk spetsanil k'ak'u. 5Ye'nani schapa ja Dyos ja jastal oj tukb'ukotiki, sok b'a oj na'tik yujni jach' oj sk'u'luk merana, ja' ya'ki'tik ja Espiritu Santo.
6Ja'yuj spetsanil k'ak'u gusto aytik, yuj ja wax na'atik ja yajni ti'to aytik ja b'a jkwerpotik iti, najat aytik sok ja Kajwaltik Jesusi. 7Cho a'nima mix kilatik wanix k'u'antik ja ye'na. 8Mi lom xcham jk'ujoltik a'nima wax k'anatik ojxa ka'tikan ja jkwerpotik it b'a ojxa wajtik sok ja Kajwaltiki. 9Ja'yuj jle'atik jastal jk'u'antikta, a'nima ti'to aytik ili, ma' ti'xa aytik b'a satk'inal. 10Jayuj jpetsaniltik t'ilani lek oj ek' je' jb'ajtik ja b'a sti sat ja Kajwaltik Jesusi, yuj ja ye'nani jwes oj ajyuk ja k'ak'u jawa. Ye'n oj yal kab'tik ja jas jk'u'lunejtik ja yora sak'anotikto, lek ma mi lekuk, ja'yuj ye'n oj yal ta oj ya'ki'tik ja jmajtantiki, ma oj yaj tup ja jmultiki.
La kamigo'uk jb'ajtik sok ja Dyosi
11Ja ke'ntikoni, wax na'atikon jel t'ilani oj k'u'uktik sok oj toytik ja Dyosi. Ja'yuj jle'atikon jastal oj ka'tikon sk'u'uke ja tuk jumasa, b'a oj sk'u'uke ja Dyosi. Ja Dyosi, wani sna'a lek jastal ay ja kaltsiltika, jach' wax majla sok ja we'nlex oj a na'ex lek jb'aj ja ke'n. 12Mini yuj wa'nukotikon sle'jel jastal b'a oj t'en'extikon b'a oj a wal'ex jel lek ja jas wa'ntikon yaljeli. Ja jas wax k'anatikoni, yuj ja oj kaltikon a wabyex b'a lek oj ajyanik jmoktikon. B'a jach' oj a na'ex jas oj a wal'ex yab' ja ma jel wa stoyo sb'aje'i, jaxa smeranili, mini yuj jachukuke jastal jawa.
13Ta yuj k'a loko aytikon, ja'yuj ja wax k'ana oj ka'teltatikon ja Dyosi. Ta yuj k'a mi jachuk jastal jawi, lekni oj a wil'ex ja we'nlexa. 14Ja syajal sk'ujol ja Kajwaltik Jesusi, wani stojb'es ja jmodotiki. Wax na'atik lek cham ja Ye'n yuj b'a jpetsaniltik, jasyuj ja ajyi yujni sb'a oj ch'ak chamkotik jpetsaniltik ajyi'a. 15Ja'yuj ta yuj k'a Ye'n cham ja Kajwaltik Jesús yuj ja ke'ntiki, mixani sb'ejuk ja oj k'ultik ja jas wax k'anatik ja ke'ntiki, ja was k'ana oj k'ultik ja jas was k'ana ja Kajwaltik Jesús ja ma chami cho sak'wi b'a oj ya' ja sak'aniltiki.
16Ja'yuj man ya'n ja ke'ntiki, mokxa kistik ja jastik wax yala ja kristyano jumasa b'a lu'um iti. A'nima jach' wax kilatik ajyi ja Kajwaltik Jesusi, ja ya'n mixa jach' oj kiltik jastal jawi. 17-19Ja ya'n ti'xa aytik b'a sok ja Kajwaltik Jesusi, yujni ajk'achotikxa'a. Ja Dyosi mixani wa sna'a ja jastal ja jpoko jmodotik ajyi'a, ja Ye'n ya'ta ki'tik jun yajk'achil jmodotik. Spetsanil ja iti, ye'nani wax ya'a ja Dyosi. Ja ajyi mi lek wax yilawotik, jaxa ya'ni, yuj ja sts'akatal ja Kajwaltik Jesusi lek xa wax yilawotik, cho ya' b'a jk'ab'tik b'a oj kaltik b'a spetsanil ja chonab' jumasa ja tsamal ab'al iti: Yuj ja Kajwaltik Jesusi, ja'yuj ja Dyosi sch'ayata spetsanil ja jmulal jumasa, sok wanix ya' laman b'a jpetsaniltika. 20Ja'yuj sjekawotik ja Kajwaltik Jesús b'a oj waj kaltik ek' ja yab'ali, cho ye'n ja Dyos wa sk'ana a wi'ex ts'akatal b'a oj ja maklayex ja jas oj kaltikon a wabyexi. Ja'yuj ye'n ja Kajwaltik Jesusi, wax k'anatikon a wi'ex: laman ajyanik sok ja Dyosi.
21Ja Kajwaltik Jesusi mini sle'a smul ja ye'ni. Jaxa Dyosi, jach' yila jastal jun mulanum, b'a jach' oj yal mini jun smul sle'a ja Kajwaltik Jesusi.
Iliyochaguliwa sasa
2 Corintios 5: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021