2 Corintios 1
1
Spatulab'il k'ujolal jumasa
1-2Jmoj aljel jumasa b'a Corinto, sok b'a lugar jumasa b'a Acaya:
Ja ke'n Pablo'on jaxa jmoji Timoteo, wax jekatikon spatulab'il a k'ujolex. Ja jtatik Dyos sok ja Kajwaltik Jesús ja ma' stsa'awon b'a sjekab'anumil a ya'wi'ex ja syajal sk'ujoli, sok a ya'wex laman.
Ye'n ja Dyos wa skoltayotik ja b'a jwokol jumasa
3—La ka'tik yi ts'akatal ja Dyos ja stat ja Kajwaltik Jesusi— Ja ye'n jun Tatal jel lek sok jel ja syajal sk'ujoli, sok spetsanil k'ak'u wa skoltayotik. 4Ja yajni ay wokoltiki, ma ja yajni ti wa'ntik yi'jel ja wokoli, Dyos wa skoltayotik ja ke'ntik b'a oj b'ob' koltatik ja ma wa'n wokol sok ja ma'tik ay yi'oj ab'al k'umali.
5Ja ke'ntikoni, jel wax ki'ajtikon ja wokol jastal yi'aj ja Kajwaltik Jesusi. Yuj ja ye'n, ja'yuj ja jTatik Dyosi, wax ya' kulan jk'ujoltik. 6Wax ki'ajtikon wokol ja b'a oj a wa' kulan a k'ujol ja we'nlexi, cho i'ajik lek ja wala koltaxiyexi. Ja ke'ntikoni, Dyos wa skoltayotikon b'a oj ka'tikon kulan a k'ujolex ja we'nlexi. B'a jach' oj b'ob' kuchuk a wujilex takal takal ja wokol jumasa ja jastal wax ki'ajtikon ja ke'ntikoni. 7Ay lek sniwanil jk'ujoltikon a mokex wax na'atikon ja wokol wa'nex yi'jel ja ya'n, jach'ni ja Dyosi, ojni cho ya' kulan a k'ujolexa.
8Moj aljel jumasa wax k'anatikon oj a na'ex ja tsatsal wokol ki'atikon ja b'a chonab' jumasa b'a Asia. Jel tsats waj ja jwokoltikoni lajan sok mi oj kuch kujtikon, kalatikon lajan sok oj chamkotikon ajyi. 9Ja smeranili, wanxax kab'tikon jach' aytikon jastal ma aljita yab' oj miljuk. Ja jastal jawi, jel skoltayotikon b'a oj k'u'uktikon ja Dyos it ma oj ya sak'wuk ja cham winik jumasa, mi kechan ke'n oj kaltik yujni oj b'ob' kujtik spetsanila. 10Ye'n ja Dyos ja ma skoltayotikon ja b'a niwak wokol jumasa jawi, yuj ja lajan sok ojni chamkotikon ajyi'a, sok wax k'u'antikon ye'nani oj stalnayotikon spetsanil k'ak'u'a. 11Wax k'anatikon a wi'ex ts'akatal, koltayotikonex, k'umanik ja Dyos yuj ja ke'ntikoni. Ta jitsan k'a ja ma oj sk'umuk ja Dyos yuj ja ke'ntikoni, cho jach'ni jitsan ja ma oj ya'yi ts'akatal ja Dyos yuj ja skoltaneli, sok spetsanil ja jas lek wax ya'ki'tiki.
Ja Pablo stukb'es ja jas chapan yuj ajyi
12Jel gusto wax kab'tikon jel lek ja jas jk'u'lantikoni, yuj ja toj ajyitikon sok ja tuk jumasa, cho jach'ni yuj a petsanil ja we'nlexi. Mi ja'uk jk'u'lantikon ja jas wax jak jk'ujol oj k'u'ltikon ja ke'ntikoni, wax k'u'lantikon ja'ni yuj ja wa skoltayotikon ja Dyosi, sok sts'akatal ja sniwanil ja syajal sk'ujoli.
13Jaxa ya'n wax ts'ijb'a a wi'ex toj lek b'a mi wokoluk oj a wabyex sb'ej. Wax majlan spetsanil, lek oj a wil'ex 14Ja jas mixa wabyex lek sb'ej ja ya'n. Cho jach'ni ja yajni oj kumxuk ja Kajwaltik Jesusi, ja we'nlexi, jel gusto oj ajyanik yuj ja ke'ntikoni, cho jach'ni ja ke'ntikoni jel gusto oj ajyukotikon yuj ja we'nlexi.
15Yuj ja waxa k'u'anexi, ja'yuj jpensaran oj waj k'il'ex, b'a jach' oj b'ob' kulatayex chab' majke. 16Tey jk'ujol ajyi oj ek' kulatayex ja yajni la wajyon ja b'a chonab' jumasa b'a Masedonia, cho ti oj k'otkon tiw ja yajni la kumxiyoni, b'a jach' oj b'ob' a koltayonex ja we'nlex ja yajni oj wajkon b'a Judea. 17¿Ma yuj waxa walawex yuj mix na'a lek ja jas wax kala? ¿Ma yuj wax cho walawex ja lajanon sok ja ma'tik wax yala juts'in lek juts'in mi lekuki? —Waxa lo'la a b'ajex— 18Ti wax yila ja Dyos wax k'u'lantikon meran ja jas wax kalatikoni. 19Ja Timoteo ja Silas sok ja ke'n, kalatikon ja yab'al ja Kajwaltik Jesús yunin ja Dyosi. Ja Kajwaltik Jesusi, mi tuk jas oj yal ja b'ajtani, jaxa tsa'ani cho tukxa ja jas oj yale, miyuk, ja jas oj yali, yujni oj sk'u'l merana. 20Sok spetsanil ja jas yala jan ja jTatik Dyosi, yuj ja Kajwaltik Jesusi, ti ch'ak k'ot smeranil tiwi. Ja'yuj ja yajni wax toyotikon ja Dyosi, ja'ni yuj ja Kajwaltik Jesusi, wax kalatikon. —Jach'ni'a.
21Ja ke'ntikon sok ja we'nlexi, Ye'nani ja Dyos ja ma wax ya' ajyukotik toji, sok ti wa stsomowotik yuj ja Kajwaltik Jesusi. Yuja ye'nani stsa'awotikona 22b'a jach' oj sje' yuj sb'a jotikon ye'na, ya'a jun jsenyatikon: Ja senya jawi, ja ya'ki'tikon ja Espiritu Santo.
23Ta yuj k'a mitox b'ob' waj kulatayex, na'awik ke wanix kisawexa. —Kechan ta yuj k'a wa'non le'uj ab'al, a'nima ti sch'aya jna'jel ja Dyosi— 24Ja ke'ntikoni mix k'anatikon ja ke'n oj kaltikon ja jas oj ja k'u'lukexi, jasyuj sok ja jaw jumasa, ja we'nlexi wanxanixa na'awex leka. Ja b'a wax k'anatikoni, oj koltayextikon, b'a jach' gusto oj ajyanika.
Iliyochaguliwa sasa
2 Corintios 1: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021