1 Corintios 6
6
La jtojb'es ke'ntik ja ab'al k'umal jumasa
1Ta ay k'a junuk ja we'nlex waxa ta'awex jun ab'al k'umal sok jun jmoj aljeltik, mok waj a wal'ex yab' ja ma' ay ya'tel b'a ye'n oj stojb'esta yuj k'a mi sk'u'an ja Dyosi, mas lek alawik yab' b'a ye'n oj stojb'es ja ma' ay ya'tel b'a snaj ja Dyosi. 2Ja yajnix k'ot tik'an ja k'ak'ui, ja'ni ja yuntikil ja Dyos oj sk'el ja smul ja kristyano jumasa'a. Ta yuj k'a we'n oj a k'el'ex ja smul ja kristyano jumasa ja b'a lu'um iti, cho jach'ni ja yal ch'in ab'al k'umal jumasa ojni b'ob' a k'el'exa. 3Ta yuj k'a oj jk'eltik ja jas wa sk'u'lan ja anjel jumasa, —Jasyuj ja mi oj b'ob' jk'eltik jastal ja kristyano jumasa b'a lu'um iti. 4¿Jasyuj ja waxa k'anawex oj stojb'ese ja ab'al k'umal jumasa ja jwes jumasa ma' mi wa sk'u'ane ja Dyos b'a? 5Wax kal a wabyex ja iti, ja sb'a oj ka' k'ixwaniki. Yuj ja janek' ayexi, ay ma wa sna'a jastal oj stojb'es ja ab'al k'umal jumasa. 6Ja we'nlexi, mi kechanuk ita we'nlex wax och k'e'anik k'umal —Man waxa le'awex june ja ma mi sk'u'an ja Kajwaltik Jesús b'a ye'n oj stojb'ese.
7Ja ma' wa'n sch'ayel ja b'a ab'al k'umali, we'nlex ita. Ja'yuj, ja lek a'nima ti ixta la iljiyexa, ma tix elk'aji wa jastik a b'ajexi, 8yuj ja we'n ixta oj ilwananiki, ma yuj ja we'n oj elk'ananiki. Jaxa we'nlexi, tuk ja jas waxa k'u'lanexta: —We'nlex ita mixa kisa a b'ajex we'n ita waxa welk'an a b'ajex wa jastik a b'ajexi.
9-10Mok a wa'a b'ajex lo'lajel. Ja we'nlexi, waxa na'awex lek ja ma wa sk'u'lan ja b'a mi lekuki mi oj ochuk ja b'a kulan ja Dyosi. Ja iti, ja wa'non yaljel ja ma wax yi'a sb'aj sok tuktukil ixuki, ja ma wa stoyo k'u'lub'al dyosi, ja ma wax yi'a sb'aj sok pilan ixuk ma pilan winiki, ma ja winik ja sgusto oj yij sb'aj sok ja smoj winikili, ja elk'anum jumasa, ja ma kechan ye'n wa sk'ana oj ajyuk leki, ja yakb'um jumasa, ja ma wax och sta' ti lom ja smoj jumasa, sok mini ja ma wax ok' sk'ujol ja jastik sb'aj ja smoji, spetsanil ja ma jach' wa sk'u'lan jastal iti, mini oj ochuke ja b'a kulan ja Dyosi. 11Jach' ajyiyex jastal jaw chab' oxe ja we'nlexi. Ja Dyosi, sch'aya a wi'ex ja mulal jumasa jawi, sak'awex lek, ya ochanik kwenta sok ja yuntikil jumasa. Spetsanil ja iti, ja'ni b'ob' yuj ja yip ja Kajwaltik Jesús sok ja Yespiritu ja jDyostiki.
La ka'tik yi ts'akatal ja Dyos yuj ja jas wa sk'u'lanki'tiki
12Ay chab' oxe jach' wax yala a wujilex jastal iti: —Ja ke'n elyonta libre wax k'ulan ja jas wax k'ana ja ke'ni—. —Merani ye'na, mi spetsaniluk lek ja ma ay ja jas waxa k'ana oj sk'u'luki; ja'yuj mini jastal ka'a jb'aj b'a ay jas oj sk'okona. 13Cho ay ma wax yalawe: —Ja jwa'eltiki ti'ni wax waj b'a jlukumtika, jaxa jlukumtiki ja'ni sb'aj ja jwa'eltika—. —Merani ye'na— Jaxa Dyosi, ojni sch'ay sna'jel schab'il cosa'a. Jaxa jkwerpotiki, mi sb'ejuk wax ka'tik makunuk b'a oj yij sb'a tuktukil ixuk ma sok tuktukil winik. Ja sb'eji, ja oj ka'tik makunuk b'a oj toytik ja Kajwaltik Jesusi, yuj ja jkwerpotiki sb'ajni ye'na'a. 14Jach' jastal sk'u'lan ja Dyos ya sak'wuk ja Kajwaltik Jesusi, jach'ni ja ke'ntiki, ojni cho ya sak'wukotika yujni ay yip b'a oj sk'u'luka.
15Ja we'nlexi, waxa na'awex kada jujune, ja'ni ti wa stojb'es sb'aj ja yuntikil ja Dyosi, sok ja'ni skwerpo ja Kajwaltik Jesusi. Ja'yuj mi sb'ejuk ta yuj k'a junuk ja jkwerpo jaw ja smoj b'aj sok ja yuntikil ja Kajwaltiki, sok oj waj yij sb'aj sok jun ixuk manyosa, 16B'a' miyuka, yajni wax yi aj sb'aje ja ixuk sok ja winik jawi, jun itani kwerpo wax kanye'a. Jach'ni wax yala ja b'a sts'ijb'anub'al ja yab'al ja Dyosi: —Ja schawanile'i, june itani wax kanye'a— 17Jaxa ma' wa sta'a sb'aj sok ja Kajwaltik Jesusi, jun itani kwerpo wax kan sok jach' ik' asona.
18Mokxa a wi'a b'ajex sok tuktukil ixuk. Ja mulal jawi, ja jel wa sjomo ja kwerpo yuj ja pilan mulali. 19Jawa kwerpo'exi jach' jastal jun snajtsil tsomjel, jaxa b'a snajtsil tsomjel jawi, ti'ni ay ja Espiritu Santo it ya'oj a wi'ex ja Dyosi. Ja kwerpo jawi, mini a b'ajukexa. 20Ja yajni skoltayex ja Dyosi, ja smeranili, smanawexni'a, jaxa sts'akol ya'a yuj ja we'nlexi, jel niwan. Ja'yuj jel t'ilan oj a wa'ex jawa kwerpo'exi b'a oj a toy'ex ja Dyosi.
Iliyochaguliwa sasa
1 Corintios 6: YABD
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Sociedad Bíblica de México 2021