Matheyo 28
28
Ovenyerera
1Niviraka nihuku na eSaabadu, nittaandaka nihuku noopacera na esimana, Mariya oMagadalene ni Mariya mukina yaarowa woona nihiye. 2Vano waakhala otetereiya otokotoko, ni ndyelo a Apwiya aakhuruwa wiirimu ni aphiyaka vanihiyeni, aapirikixa nluku naawaleliwe ni aakilaathi vasuluwaya. 3Ekhalelowaawe yaari ntoko overinya ni ikuwosawe saari sootteela ntoko etthapwe. 4Anamalipelela yaathukumela ni woova ni yaahookhwa maririmela. 5Ndyelo aaweerela asithiyana: “Muhoove! Koosuwela weera nyuwo mummwaasa Yeesu okhomeliwe. 6Owo khaamomo, oovenyerera ntoko aahimalaawe. Ngwe, moone nipuro waaraaya muttembo. 7Murowe woowaakuveya ni mwaaleele oohuseraawe: ‘Owo oovenyerera mookhwaani ni onrowa ohoolowanyu mpaka oGalileiya, weiwo muneeraanyu mwamoone. Vano kohooleelani.” 8Hiiho, asithiyana yaavenya mmahiyeni yoovaka nitho ehakalalaka. Yaatthimaka ni yaahaaleela oohusera a Yeesu. 9Wootutuxereya Yeesu aahaakumanano asithiyana ni aaweerela: “Salaama!” Awo yaamwaattamela Yoowo, yaamukhubaara nyetto ni yaamulapa. 10Vano Yeesu aaweerela: “Muhoove. Murowe mwaaleele axunnaka weera erowe mpaka oGalileiya. Weiwo awo eniikoone.”
Ethalihero ya anamalipelela
11Asithiyana ale ereene nlelo mphironi, akina a anamalipelela yaarowa osidade ni yaahaathalihera ahooleli a asaserdoti* sootheene seiye seereiye. 12Ethukumanaka ahooleli a asaserdoti* ni asitokweene a muloko, yaavaanela weera yaavahe anakhotto musurukhu mwincipale, 13eweerelaka: “Nyuwo ontthuneya weera: ‘Oohuseraawe yaahoowa ohiyu ni yaahiiya muttembo, hiyo nikonaka.’ 14Iiwa guvernadori yeeyo, hiyo ninoomuthalihera ni khamukhalano mulattu.” 15Hiiho anakhotto yaahaakhela musurukhu ni yaapaka ntoko yaalamuleliwaaya. Mwaha ola waamwaramwaxeya variyari wa aYuda mpaka olelo.
Orummwa otokotoko
16Vano oohusera muloko ni mmoha yaarowa oGalileiya mpaka mwaako Yeesu aathoonyenraawe. 17Emoonaka Yeesu, yaamulapa, mene akina yaahovela. 18Yeesu aawaattamela yaawo ni aaweerela: “Koovahiwa ikuru sootheene sa wiirimu ni vathi. 19Tivawo, murowe ni mwaakhalihe oohusera a amalapo ootheene, mwaapatisaka mwa Nsina na Atiithi, na Mwaana ni na Munepa Wootteela, 20mwaaxuttihaka wiiwelela sootheene Miyo koolamulenlaakani. Ni Miyo kinookhala ni nyuwo mahuku ootheene, mpaka ommaleloni wa ehuhu.”
Iliyochaguliwa sasa
Matheyo 28: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
