Epacerero 40
40
Yoseefe ontaphulela sooloha
1Vahoolowaya yaaheereya weera namarumeela a soowura ni namooxa ipaawu a amwene a wExipitu yaahaapahula apwiyaaya, amwene a wExipitu. 2Farawu* aahaanyoonyeriwa vancipale asitokweene eeli ale, mutokweene a anamarumeela soowura ni mutokwene a anamooxa ipaawu, 3analamulela otthukiwa vaate wa mutokweene a anamalipelela, mukaliposomwene mwemmwe aaraawemo Yoseefe. 4Mutokweene a anamalipelela aamulamulela Yoseefe waawehaweha ni waarumeela yaawo. Eviraleene ehuhu ekina, 5namarumeela a soowura ni namooxa ipaawu a amwene a wExipitu yaari mukaliposo, yaalohasa. Khula mutthu aakhalano yoolohaawe, ooweeli ohiyu omoha, ni khula yooloha yaakhalano etaphulelowaaya. 6Oxaawaya, Yoseefe aarowa waaxekura, anawoona weera yaari oohitteene. 7Owo aahaakoha anamiteko ale a Farawu* yaatthukiwetho vaate wa apwiyaaya: “Heeni nyuwo olelo muraanyu oohitteene?” 8Vanonto, awo yaamwaakhula: “Niwoko hiyo ooweeli nooloha, mene khaawo ongwera onitaphulela soolohasahu.” Yoseefe aaweerela: “Ti Muluku paahi ongwera onitaphulela sooloha. Mukithalihere seiyo mulonghaanyu.” 9Mutokweene a anamarumeela a soowura aamuthalihera Yoseefe yoolohaawe: “Moolohanimwaka kohoona ohoolowaka evideira*. 10Vano mwireene yoowo waakhalano iphandi tthaaru, onaphuwa makukhu, onakhalano ithutu, oniima mukhucenimwaya iwuuva* siitthwa. 11Mmatatanimwaka kaakhalano ekoomixi ya Farawu*. Kaakuxa iwuuva*, kinaamela mukoomixini ya Farawu*, kinaavaherera ekoomixi mmatatanimwaya.” 12Yoseefe aamwaakhula: “Yoothapulela ti ela: Iphandi tthaaru sintaphulela mahuku mararu. 13Evinreene mahuku mararu, Farawu* anootaphule ni anoohokoloxere muteko waavaraawo khalayi. Hiiho onuuwinnyerere ekoomixi mmatatanimwaya a Farawu*, ntoko waakhovelenlaawo khalayi waaraawo mutokweene a anamarumeela a soowura. 14Kinoovekela weera wakuupuwelele miyo, itthu saaweettelaka nnenesene, ni waadyoonttelele aFarawu* weera yuupuwelele mulattwaaka weera miyo kikhume mukaliposo mu. 15Hapo kiroonyesererihiwa mweelaponi ya aHeberi nitho nno kheewo kipankaaka weera kiwaleliwe mukaliposomu.” 16Iiwaka mutokweene a anamooxa ipaawu etaphulelo yooreerela ele, aamweerera Yoseefe: “Vano miyotho kooloha kiirengyeene mipapara miraru sa ipaawu sootteela. 17Mumpaparani kiirengyaaka waakhala moota wootheene wa ipaawu ni soococowa soohiyanahiyana saasiva aFarawu*. Vanonto, saahoowa ipalame, sinaca seiyo kiirengyaaka.” 18Yoseefe aamwaakhula: “Etaphulelo ti ela: “Mipapara miraru sintaphulela mahuku mararu. 19Eviraleene mahuku mararu, aFarawu* eniilamulele ohitiwawawo ni onuutthukeleliwe mmwirini, moota wooweera ipalame sinimoowa wookhuura.” 20Eviraleene mahuku mararu yaari efesta yoowuupuweleliwa oyariwa wa Farawu*, ni owo aahaarehererela anamalakaawe yooca. Vamaithoni wa ootheene aalamulela oruuhiwa mutokweene a anamarumeela a soowura ni a anamooxa ipaawu weera erowe ohoolowawe. 21Aamuhokoloxeratho mutekwaawe mutokweene a anamarumeela a soowura, moota wooweera ole aahokoleela okhala yoole aamwinnyerera ekoomixi Farawu*. 22Vaheera aamutthukelela mmwirini mutokwene a anamooxa ipaawu, ntoko Yoseefe aataphulenlaawe. 23Wa soothesene, mutokweene a anamarumeela a soowura khamuupuwelenle Yoseefe. Ohiyanawaya, aamuttiwalaxa.
Iliyochaguliwa sasa
Epacerero 40: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.