Miteko 19
19
Pawulo wEfeso
1Apolo areene oKorinto, Pawulo aavira ilapo sa ottuttuwani ni aaphiya wEfeso. Iwe aahaaphwanya oohusera akina 2ni aahaakoha: “Nyuwo mohaakhela Munepa Wootteela mwaaroromenlaanyu?” Awo yaamwaakhula: “Hoye, hata khaniiwale weera wookhala Munepa Wootteela.” 3Pawulo aahaakoha: “Vano, ni opatiso heeni nyuwo mwaapatisiwaanyu?” Awo yaamwaakhula: “Opatiso wa Yohaane.” 4Pawulo aaweerela: “Opatiso wa Yohaane waari opatiso wa orukunxa murima. Owo aaleela muloko wa atthu weera omuroromele Yoowo eera arwe vahoolowawe, eyo tiiyo omuroromele Yeesu.” 5Yiiwaka yeeyo, awo yaapatisiwa mwa Nsina na Apwiya Yeesu. 6Pawulo awiikaatheraka matata, waahaakhuruwela Munepa Wootteela, ni yaapacera wuuluma ni muulumo ni othalihera otthuna wa Muluku. 7Yaariwo wookwanaka asilopwana muloko neeli. 8Pawulo aavolowa muSinagogani*, ni mwemmo annuuluma ahoovaka etthu wa nyeeri miraru, avaanyihanaka nnenesene sa omwene wa Muluku. 9Akinatho a yaawo yaahuumiha mirimasaya, enakhootta ororomela, enapacera wuuluma soonanara sa Ephiro mwaatthuni. Vano Pawulo aasusa wa yaawo. Aakuxaka oohusera, annaaxuttiha khula nihuku muxikolani ya Tiranu. 10Eyo yaapwaherera wa iyaakha piili, moota wooweera aYuda ni aGrego ootheene yaamanke elapo ya wAsiya yaahiiwa masu a Apwiya. 11Muluku aapaka sootikhiniha sitokotoko ni matata a Pawulo, 12moota wooweera mpaka misako ni ikuwo sa namatterekha Pawulo aatamvaawe saakuxiwa, eniikaatheriwa aretta, vano yaalamihiwa iretta ni minepa soonanara saavenya wa yaawo. 13Akina a aYuda yoomola minepa soonanara, yaaheerera oromola Nsina na Apwiya Yeesu wa yaale yaarino minepa soonanara yeeraka: “Mwa Nsina na Yeesu mwa Yoowo Pawulo onimulaleiyaawe, kinoolamulela weera ovenye!” 14Yaawo yaapaka yeeyo yaari anamwane athanneeli a Skewa, muYuda mutokweene mmoha a asaserdoti*. 15Nihuku nimoha munepa woonanara mmoha waawaakhula: “Yeesu koomusuwela, Pawulo koosuwela weera ori taani, mene nyuwo taani?” 16Vano mutthu aarino munepa woonanara aahaatuphela yaawo ni aahaavara, aamanaka moota wootepaxa, ni awo yaatthawa mpaani ehiwanre ni evulanleene. 17Esuweliwakaru yeeyo ni aYuda ni aGrego ootheene yaamanke wEfeso, ootheene yaawo yaavariwa ni woova, ni Nsina na Apwiya Yeesu naahunnuwihiwa. 18Ancipale a yaawo yaaroromenle, yaahoowa ni yaalapa ehimaka mwaatthuni mitekosaya soonanara. 19Ancipale a yaawo yaapanke miteko sa wiiphini yaathukumanya ilivurusaya ni yaahisa. Waalikeliwaka mutteengo wa ilivuru iye, yaahoona weera saari idrakema* 50 000. 20Mooteene yoola masu a Apwiya yannamwaramwareya ni yaatepa olipaxa. 21Vahoolowaya, Pawulo aalakela mMunepani orowa oYerusaleemu, aviraka oMasedoniya ni wAkhaya. Owo aaheera: “Vahoolo wa okhala weiwo, ontthuneyatho weera kirowe kaxekure oRooma.” 22Vano aahaarumiha oMasedoniya eeli a anamakhaviheraawe, Timootheyo ni Erasto, mene owo aakhala ehuhu ekina elapo ya wAsiya.
Onyakulihana wEfeso
23Ehuhuweene yeele waakhala onyakulihana otokotoko niwoko na Ephiro. 24Vano, aakhala weiwe namahana a iyuuma soorikaxa mmoha iitthaniwa Demetriyo. Owo aapaka icaambulo sikhaaneene sa iyuuma sa empa ya muluku Artemide, ni aahaavaha owina vancipale wa yaale anaruso yaavara muteko ni yoowo. 25Aahaathukumanyiha yaawo ni akina a eruswaaya ni aaweerela: “Asikhwaaka, nyuwo moosuwela weera ninnaakhela owina otokotoko ni muteko ola, 26ni munoona ni muniiwa moota mulopwana owo Pawulo onaaviriyelaawe ni onaahapuxaawe atthu ancipale a wenno wEfeso nitho a elapo yootheene ya wAsiya. Owo oneera weera miluku soopakiwa ni matata a atthu khasihiyono miluku. 27Vano, woopiha khoohiyono paahi weera eruswaahu enooyelela epilaaya, menetho weera empa ya muluku mutokweene Artemide enoowera oyeleela epilaaya. Hiiho, wunnuwawawe muluku owo osuweliwe elapo yootheene ya wAsiya ni elapo ya vathi yootheene, onuuramusiwe.” 28Yiiwaka yeeyo, awo yaanyoonyiwa ni yaapacera okhuwela: “Artemide a wEfeso ti mutokweene!” 29Woowaakuveya esidade yootheene yaanyakuleleya. Atthu a wEfeso yaahaavara ooweeli a oMasedoniya Gaiyu, ni Aristarko, asikhwaawe Pawulo, etthimakaka ni murima mmoha wa nipuro anthukumanaayawo atthu. 30Pawulo aatthuna wiixoonihera ohoolo wa atthu ancipale, vaheera oohusera khaayaamutthunihale. 31Asitokweene akina a elapo ele, asinthamenaawe Pawulo, yaaphiyatho weera emooperere emvekelaka weera ahirowe vanipuroni na othukumana nne. 32Muthukumano khawaareherereiye: akina yaakhuwela etthu emoha, ni akina etthu ekinatho. Atthu ancipale a muloko khayaasuwenle eheeni yaarowenlaayawo. 33aYuda yaamukakhela Alesandre ohoolo wa muthukumano, ni akina a atthu ancipale yaamuleela yeeyo yaatthuneya ohima yoowo. Alesandre aahaathoonyera ni ntata, atthunaka wiixaakiha ohoolo wa muloko wa atthu. 34Vaheera esuwelakaru weera owo aari muYuda, ootheene yannakhuwela ni nsu nimoha wa iwoora piili yeeraka: “Artemide a wEfeso ti mutokweene!” 35Namalepa a esidade ahaamaaliha atthu ancipale ni aaweerela: “Atthu a wEfeso, ootheene ansuwela weera esidade ya wEfeso ti namathokorora a empa ya Artemide mutokweene ni a yoocaambulaaya yaamonre wiirimu. 36Tivawo, yeenre eyo ekhalaka yoohikhootteya, mmaale ni muhipake etthu ya mvai. 37Nyuwo mohaaruuha va asilopwana ala, naamwi awo ehiiyale empa ya muluku, naari ehimveihaka mulukwaahu. 38Demetriyo ni asikhwaawe yaarino yoowoothera emoha wa mukina, sookhala impa soowuuluma milattu soohuleya, ni aakhalatho aphuki. Awo anoowera waathalihera soowootherasaya. 39Yaariwotho etthu nyuwo muntthunaanyu ohima, eyo enoolakeliwa mmuthukumanoni wa milattu. 40Moota eraaya, nihanle vakhaani wootheriwa niwoko na onyakulihana wu wa olelo. Eyo yakhumelela, khanaawera waakiha onyakulihana wu, woonaka weera khaninkhala nthowa wa wu.” 41Ni eerakaru hiiho, aamaliha muthukumano.
Iliyochaguliwa sasa
Miteko 19: VMK2021
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Makhua Shirima Bible © Christelike Lektuurmaatskappy NPC, 2021.
