Rroman 8
8
1Naaku kore taata, merekure eatae nkiguana torno too lolo otii atua Kristo Yeso. 2Amu kore tankaraki nara le Kristo Yeso, naalaku#8:2 Kejo lkulie kigerot ikitalakuaki iyie. ngolon e ꞉Ltau Sinyati oichoru nkichui to ngolon naaitaa nanu rrindik loo ng'ok naayakita lkiye. 3Kore apa inia toki nemeidim nkitanapat e Nkai aataas tankaraki nachal ꞉mpukunoto ang torno, neas Nkai. Naa ana etaasa Nkai, ketalakua iyioo to ngolon e ng'oki natii atua sesen lo ltung'ani airriuu Nkerai enye nayewuo eata sesen oinyunyukore mpukunoto e sesen loo ng'ok, payie etum ataa lasar ooitayiaki tankaraki ng'ok ang. 4Ketaasa Nkai ana payie etumi aaitabai nayieu nkitanapat taatua iyioo lamara mpukunoto torno e ltung'ani kirukurukore, kake nayieu Ltau Sinyati. 5Amu kore lolo ooirukurukore naayieu mpukunoto torno naa nenia baa e mpukunoto torno enche eparraa. Kake kore lolo ooirukurukore mbaa naayieu Ltau Sinyati, naa nenia baa e Ltau Sinyati eparraa. 6Amu kore natum ilo oitore ꞉mbaa e mpukunoto torno e ltung'ani naa lkiye, kake kore natum ilo oitore ꞉mbaa e Ltau Sinyati naa nkichui o seriani. 7Amu kore ltung'ani oitore ꞉mpukunoto torno, naa lmang'antita le Nkai, nemeyieu ninye payie eitore ꞉nkitanapat e Nkai, nemeidim abaki neicho meitoria. 8Kore lolo oopuo taatua mpukunoto enche torno naa meidim aaiting'ida Nkai. 9Kake mitii ntae taabori nkitoria e mpukunoto inchi torno, taabori nkitoria e Ltau Sinyati itii, tankaraki kemanya ntae Ltau le Nkai atua. Kore tenemeata ꞉ltung'ani Ltau Sinyati le Kristo naa mara lenye. 10Kake tenetii Kristo atua ntae, naa keye seseni linchi tankaraki ngolon e ng'oki, kake kore Ltau le Nkai, naa nkichui taa ntae, tankaraki keitaaki ntae loosipat tekue Nkai. 11#1Lkor 3:16Kore tanaa kemanya atua ntae Ltau le ilo oitipiwua Yeso Kristo too lootuata, naaku keicho kenya ninye seseni linchi ooye nkichui to ngolon e Ltau lenye, oamanya atua ntae.
12Naaku lalachera o nkanachera, keatae nayieuni tee iyioo menya ajo nyo eyieu mpukunoto ang torno, meyiere payie kiwueni ana nayieu ꞉ninye. 13Amu tiniwuenini ana nayieu mpukunoto inchi torno naa iyeye, kake tiniarrar metuata asat e mpukonoto inchi torno, to ngolon e Ltau Sinyati, ninchichu. 14Naa kore pooki oorikoo ꞉Ltau le Nkai naa nkera e Nkai. 15#Lga 4:5–7#Mrk 14:36; Lga 4:6Neitu itumtum Ltau le rrindikicho eji paa intokiki aawueni to ngureticho, kake itumo Ltau oicho ntae sipat niakunyienyie nkera e Nkai. Kore te ninye nikibuak aajo, <<Papa! Papa lai!>> 16Ilo Tau olimu sipata tenebo o ltauja lang ajo ikira iyioo nkera e Nkai. 17Naa tanaa nkera e Nkai kira, ikira sii lootum tenebo o Kristo inia naisiligie iyioo Nkai, naa tanaa iking'ar sina lenye, iking'ar sii nkitoo enye.
Siligi oichooki iyioo
18Kadol ajo kore sina le ng'amata e taata, naa meitoki tenetemieki inia kitoo naibalunyieki kenya metaa nanang. 19Kore ntokitin pooki naaitibirua ꞉Nkai, naa keisiluguta oleng ꞉ninche oleng nkera e Nkai meibalunyieki. 20#Ng'as 3:17–19Amu ketipikaki ntokitin pooki naaitibiruaki taabori ldeket payie erroyo. Namara te yieuna enche etaase inia, kake te yieunoto e ꞉ilo otipika ninche taabori ilo deket. Kake kore eyia keata ake ninche siligi, 21aajo kelakuni ntokitin pooki naaitibiruaki, te rrindikicho e ilo deket, nejing atua lakunoto e nkitoo naata ꞉nkera e Nkai. 22Ikiyielo aajo kore ntokitin pooki naaitibiruaki, naa keigorito nesaisai pooki metabaki taata, 23#2Lkor 5:2–4namara ake ninche aapeny, kake abaki iyioo oichooki Ltau Sinyati ana nkichooroto ekue naichoo iyioo Nkai. Kore abaki iyioo naa ikingor taatua ate, kianyuta payie kiaku nkera e Nkai katukul payie elakuni seseni lang. 24Amu ele siligi apa kitumo payie eitejeuni iyioo. Naa kore siligi olioo naa mara siligi, amu ng'ae oisilig inia nadolita? 25Kake tinikisilig inia nimikidolita, naa ikianyu te ng'iriata.
26Nejia sii eiko Ltau Sinyati teneretu iyioo ta nchalan ang. Amu kore inia nayiere payie kiomonu naa mikiyielo. Kake keomonoki iyioo ninye to nkoitiei nemelimunoi tee rerei. 27Naa kore ilo oing'uraa ltauja loo ltung'ana naa keyielo inia nayieu Ltau Sinyati, amu keomonoki sinyat le Nkai ana nayieu ꞉Nkai.
28Ikiyielo nchere kore pooki naasai, naa kesupataki lolo oaacham Nkai, lolo ooipotoki ana nayieu ꞉Nkai. 29Amu kore lolo ooteyielo ꞉ninye apake tekue, netegelua inia kata metinyunyukore Nkerai enye, payie etum inia Kerai enye ataa lkikau taa lalachera lenyena kumo. 30Naa kore lootegelua apake tekue, ninche sii eipoto, naa kore looipoto /neitaa sii ltung'ana loosipat, naa kore /looitaa loosipat neitoki sii aicho nkitoo.
Nchaman e Nkai
31Kaa hae, nyo naa taata kijo naaipirita kuna baa? Amaa tanaa keti Nkai mbata aang, ng'ae ilo oidim atarere iyioo? 32Amaa ilo leitu emit eri Nkerai enye metua, kake keichorua metanang'a iyioo pooki, aji naa eiko payie meicho iyioo ntokitin pooki pecheu eichoo iyioo Nkerai enye? 33Ng'ae ilo oidim aitara kusaka lgelunot le Nkai? Meitoki! Nkai naitaa loosipat. 34Ng'ae odung'oki iyioo nkiguana torno? Meatae! Ketanang'a iyioo Kristo Yeso, naa mara ake inia, kake ninye sii eitipiwuaki too lootuata. Ninye owuenita ta nkaina e tetene e Nkai, naa ninye sii ilo oomonokita iyioo. 35Ng'ae oidim atoorie iyioo chaman e Kristo? Keidim sa nyamali anaa sina? Oo sa teneitam iyioo ltung'ana sina, tanaa tenear iyioo sumach, tanaa tinimikiata nkilani, tanaa tenetum iyioo ntoki nagol, tanaa teneri iyioo matuata? 36#SNk 44:22Ana naigero ajo, <<Kore tankaraki iyie, keri iyioo mparri pooki, keikenakaki iyioo nkerra naayieng'i.>> 37Meitoki naidim atoorie iyioo! Kore te nenia baa pooki, naa ikisul katukul, te ilo oatachama iyioo. 38Amu kaata sipata ajo, mara lkiye, namara nkichon, namara lmalaikani, namara laitoriak, namara mbaa naatii taata, namara mbaa naapuonu kenya, namara ngolon naje, 39namara te keper lakir tanaa tokop, namara nkae toki naitibiruaki naidim atoorie iyioo nchaman e Nkai inia natii atua Kristo Yeso Laitoriani lang.
Iliyochaguliwa sasa
Rroman 8: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
