Rroman 6
6
Nkichon ng'ejuk nikiata taatua Yeso Kristo
1Ikijuaa naa taata iyioo? Ikipuo kue aas ng'ok payie eponari munyani e Nkai? 2Nakaiting'o! Kore ta mbata e ng'oki naa ikituata, metaa merekure eata nkitoria tee iyioo, naaku aji aitoki kinko tinikiwueni taatua ng'ok? 3Aa miyielolo aajo kore iyioo pooki ooipatisaki ta nkarna e Yeso Kristo naa payie kiaku lenyena? 4#Lkol 2:12Kore te nkipatisare naa ketunukayieki apa iyioo tenebo o ninye, nikiye paa kore ana naitipiwuaki Kristo to ngolon e nkitoo e Papa, nikitum sii iyioo aatewueni taatua nkichon ng'ejuk. 5Amu kore tanaa keitutumokaki iyioo ninye aaiko inji te lkiye otuwuana lenye, keitutumokini sii aitoki iyioo ninye te mpiunoto natuwuana nenye. 6Ikiyielo nchere ketechoki mpukunoto ang musana ee ng'ok tenebo o ninye, payie etumi aaidakie ngolon e ng'ok, nemeitokini aapik iyioo rrindikicho ee ng'ok. 7Amu kore ilo otua, netalakuaki taatua nkitoria ee ng'ok. 8Naa tanaa ikituata tenebo o Kristo, ikiruk sii aajo ikinchu tenebo o ninye. 9Amu ikiyielo aajo kore eitipiwuaki Kristo taatua lootuata naa meitoki aye, nemeitoki ꞉lkiye aitore ninye. 10Kore apa lkiye otua Kristo nkata nabo, naa ketua payie emir nkitoria e ng'oki, naa kore nkichon naichu ninye, naa nkichon naicho Nkai nkisisa. 11Nejia sii enkuna ntae, enkena ate aajo ituata netalakuaki ntae te nkitoria e ng'oki, kake kore nkichon ninchichu naa nkichon naicho Nkai nkisisa te Kristo Yeso. 12Naaku, emincho ng'oki meitoria seseni linchi ooye, eji paa iasias naayieu ng'uarrat enyena. 13Niminchocho sii rubat ee seseni linchi eaku masaa niasiesie ng'ok, eji paa too ntorrok easichereki. Kake kore naa ntae ootuata netumo nkichui, eitai ate aisiaai Nkai, ninchocho rubat inchi eaku masaa naasichereki too sipat. 14Meitore aikata ntae ng'ok, amu mitii taabori nkitanapat kake taabori munyani itii.
Sipat e Nkai naitore iyioo
15Nyo naa aitoki kijo iyioo? Ikijo, <<Mataas ng'ok amu mara taabori Nkitanapat kitii, kake taabori munyani?>> Nakaiting'o! Mikijo nejia! 16Miyielolo aajo kore ilo linchoo ate aaku laisiaayiak lenyena ooning'icho, niakuku rrindiki lenyena? Keidim ng'ok aaitoria ntae nitumtum lkiye teinia, tanaa sii iakuku rrindiki ooning Nkai, neitae ntae loosipat. 17Kake ache ta Nkai, amu kore apa ntae oaara rrindiki loo ng'ok, nitaa taata looning taa ltauja linchi pooki inia oitiei e nkiteng'ena naichoruaki metuutai ntae. 18Ketalakuaki naa taata ntae taatua nkitoria ee ng'ok, netaa taata sipata e Nkai naitore ntae. 19Kairorita to nkutuk nining'ung'u, tankaraki nirara ltung'ana oaachal. Kore ana ninchooitie apa rubat ee seseni linchi payie eaku rrindiki ee mbaa nemeichiaakino o ne ntorno metaasa ntorrok, enyiaaki sii taata enchoo rubat inchi eaku meitoria ꞉sipata e Nkai payie iakuku sinyat. 20Kore apa irara rrindiki loo ng'ok, naa meitore ntae sipata e Nkai. 21Naaku amaa, nyo apa itumo ntae tee nenia baa? Kore nitumo, naa nenia baa naaitam taata ntae anyit, naa kore nkiting'oto enche naa lkiye. 22Kake kore naa taata etalakuaki ntae taatua ng'ok neitoria ntae Nkai, kore nitumtum naa keitae ntae sinyat nintokiki tesiedi aatum nkichon ee ntarasi. 23Amu kore laata ee ng'ok naa lkiye, kake kore nkichooroto e pecheu e Nkai naa nkichon ee ntarasi taatua Kristo Yeso Laitoriani lang.
Iliyochaguliwa sasa
Rroman 6: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
