Rroman 4
4
Nkurukoto e Abraam
1Nyo sa kijo iyioo ketumo akuyia lang Abraam? 2Amu tanaa apa keitaaki Abraam loosipat tankaraki asat, naa keata mbae nailachie, kake mara tekue Nkai. 3#Ng'as 15:6; Lga 3:6Amu kejuaa Lkigerot? <<Keiruko ꞉Abraam Nkai, neikenakini ninye teinia aajo loosipat.>> 4Kore to ltung'ani oas siaai, meikeni laata enye aajo keing'errokaki, kake keikeni aajo ntoki naichiaakino ninye. 5Kake kore ilo lemepik siligi asat enyena naasita, neiruk inia Ai naitaa laitarruok loosipat, naa keikenakini teinia kurukoto enye aajo loosipat. 6Nejia sii eikuna Daudi payie elimu ng'ida naata ltung'ani oikena ꞉Nkai ajo loosipat, menya ajo nyo etaasa. Ketejo,
7 #
SNk 32:1,2 <<Eng'ida lolo oaatapalikaki ntorrok enche,
netujutoyieki ng'ok enche.
8Neng'ida ilo tung'ani
lemeikenaki ꞉Laitoriani ng'ok enyena.>>
9Amaa ana ng'ida, noo Lyiaudi aapeny ana noo lkulie oreren sii? Amu ikijo nchere kore apa Abraam naa keikenaki aajo loosipat to nkurukoto enye. 10Anu apa eikenaki ninye aajo loosipat? Ewuon eitu emurati ninye ana eidipaki aatumurat? Mara naa eidipaki aatumurat kake ewuon eitu emurati. 11#Ng'as 17:10Kore muratare, neng'amaa ana nkitodolunoto naitodolu sipata ajo kera apake loosipat to nkurukoto ewuon abaki eitu emurati, payie eaku ninye papa loo lolo pooki ooiruk neikeni ninche aajo loosipat, abaki memurata. 12Neitaae sii papa loo loomurata, lolo lamara ake kemurata, kake looibung'aa sii rriata le nkurukoto naata apa papa lang Abraam ewuon memurata.
13 #
Ng'as 17:4–6, 22:17,18; Lga 3:29 Kore apa lekutuk oichoo ꞉Nkai Abraam o ichoi enye nchere keicho ninye nkop metaa nenye, naa eitu etum tankaraki naibung'a nkitanapat, kake ketumo tankaraki naikenaki aajo loosipat to nkurukoto enye. 14#Lga 3:18Tanaa lolo ooirukurukore Nkitanapat e Nkai ootum inia naisiligie ꞉Nkai ninche, naa meitoki nkurukoto ara toki, neim ilo lekutuk siu. 15Amu kore nayau nkitanapat naa ngoro e Nkai, kake kore nemetii nkitanapat naa meitoki egili. 16#Lga 3:7Naaku nkurukoto naa ake eitacheyie lekutuk, payie eaku munyani e Nkai eirichakino, netum pooki ng'ae oata nkurukoto natuwuana naa Abraam sipata ajo ketum ilo lekutuk, namara te ilo apeny ooibung Nkitanapat, kake te ilo sii oiruk ana Abraam. Kera ninye papa loo iyioo pooki ooiruk, 17#Ng'as 17:5ana naigeroki too Lkigerot Sinyat aajo, <</Kaaitaa iyie menye lochon kumo.>> Kore apa Abraam naa kera ninye papa lang tekue nkonyek e Nkai, inia Ai apa nairuko naa ninye naicho nkichon lootuata neitaa ntokitin nemeatae apake metaa keatae. 18#Ng'as 15:5Kore abaki meatae siligi, neisilig ake neiruk ajo keaku menye loo lochon kumo ana apa natiakaki, <<Nejia ewuai ichoi ino.>> 19#Ng'as 17:17Nedol ajo ketaarrarra oleng, netaa matejo laa larin ip nabo, nemekure eidimai payie etum Sara nkerai. Kake kore eyia, eitu echalu ninye to nkurukoto. 20Neitu etum lng'ach ajo kebaki nemebaya lekutuk le Nkai atuwuana ltung'ani lemeiruk Nkai, kake keitogoloki to nkurukoto enye eicho Nkai nkisisa. 21Neata sipata katukul ajo kore ilo oitayia lekutuk naa keidim sii ataasa ana natejo. 22Inia apa payie eikenaki ninye aajo loosipat. 23Kore ele rerei ojo, <<Eikenaki ninye aajo loosipat,>> neitu eigeri tankaraki ninye apeny, 24kake tankaraki sii iyioo ooiruko Nkai naitipiwua Laitoriani lang Yeso taatua lootuata, neikenaki aajo loosipat. 25#Isa 53:4,5Keichooyieki apa ninye metari metua tankaraki ng'ok ang, neitipiuni payie eikenakini iyioo aajo loosipat.
Iliyochaguliwa sasa
Rroman 4: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
