Asat 26
26
1Nejoki ꞉Agiripa Paulo, <<Kore taata, iyata mpaach ning'ororie koon.>> Neapaa ꞉Paulo nkaina, neng'asu airo ang'oroo koon nejo, 2<<Kaiken ajo kamunyak aitache tekue iyie lkinkii lai Agiripa ana parri, payie ang'oroo koon tee nenia baa pooki naatayie ꞉Lyiaudi. 3Kamunyak naa oleng tankaraki iyielo iyie lkerretin pooki loo Lyiaudi o nchankar enche, naaku naa kaomon oleng payie kining niminauru.
4<<Kore Lyiaudi pooki naa keyielo nkichon ai ang'asu ara lelerie, atii apa nkop ang naayielo sii atii apa Yerusalem. 5#Asat 23:6; Lpi 3:5Kore tanaa keyieu nelimu sipata naaipirita, kaayielo apake aajo kara lobo lo lturrur loo Lparisayo ooibung'uta aaitirrichaki lkerreti le nkurukoto ang. 6Naa kaitache taata nanu tene aaiguanareki tankaraki siligi lai laata te lekutuk oitaka ꞉Nkai lmakui lang. 7Naa ele lekutuk apa eanyuta lmareita tomon o oare le Isirael payie eitabari, eisiaita Nkai kuarie o parkiji. Lkinkii lai, naa tankaraki ele siligi, payie eata kulo Yiaudi kuna mbaa naatayie. 8Aanyo sa payie ijoijo ntae meidimai payie eitipiu ꞉Nkai lootuata?
9 #
Asat 8:3, 22:4,5 <<Katejo abaki apa nanu nchere keyiere payie anyok oleng aany nkarna e Yeso le Nasaret. 10Naa nejia apa ataasa te Yerusalem. Kore te nkitoria naaichoo laitainok kutuaa la lasar, katipika lairukok kumo atua jila, naa kore payie eri metuata, naang'amaa sii nanu inia. 11Kajing'aa apake nanu atua Sinagogini enche to ng'oji pooki, aiteme nanyok aisimaki ninche metediaa Yeso. Kore apa tankaraki nkiba kitok naata tee ninche, nalang'aki abaki lkulie kerenketi leiching'a aar ninche.
12<<Nainyuototo mparri nabo alo Damasikas te nkitoo o nkitoria naichoo ꞉laitainok kutuaa la lasar payie atum achomo kue aaitam sina lolo ooiruko Yeso. 13Lkinkii lai, kore aibung'uta nkoitiei matejo saai ile e mparkiji, naaipung'oki wong'an napi alang ndama naing'uaa chumata. Naaitoong taa mbat pooki o lboitiei lainien. 14Nikinang pooki nkop, naning ltoilo aajoki to nkutuk ee Lburania, <Saulo, Saulo, aanyo payie kintamita sina? Meidimai te iyie payie irere yieunoto ai.> 15Naipar ajoki, <Ng'ae dei ira iyie, Laitoriani?> Naajoki, <Kara nanu Yeso, ilo lintamita sina. 16Inyuo ntacho amu kaipung'oka agelu taa laisiaayiani lai, nilimu sipata ee mbaa ainien nitoduaa o naaitoki aitodol. 17Kaaitejeu iyie too ltung'ana linono o too loreren laairruaki, 18tobolo nkonyek enche nichuku taatua naimin apik atua wong'an. Impung'unyie taatua nkitoria e Chitani achukoki Nkai, netum mpalikinoto ee ng'ok o mpaach enche taatua lolo ooitisinyaki tankaraki naairuko nanu.>
19<<Naaku naa, Lkinkii lai Agiripa meatae nkae mara tanayanyit inia duata natoduaa te chumata. 20#Asat 9:20,28,29Kore tekue nang'asu aliki ltung'ana ta Damasikas, naitoki te Yerusalem o te Yudea pooki o too Loreren, payie eirriidu neibelekenyakino Nkai, neas mbaa naaichiaakino too ltung'ana ooirriidutua. 21Naa tankaraki ana payie aaibung'a ꞉Lyiaudi atii atua nkaji e Nkai naajo entar matua. 22Kake kore ana metabaki ana parri naa Nkai naairrita, naa kaitache taata tene alimu sipata tekue lkunini o lkutuaa, meatae nkae nalimu mara inia natejo Musa o loibonok le Nkai keasai. 23#1Lkor 15:20, Isa 42:6, 49:6Katilika ninche nchere keitami ilo Aitejeunoni oaanyutae oji Kristo sina neri metua, neaku lekue opiu taatua lootuata nelikoo wong'an, aliki lorere lang o lkulie oreren.>> 24Kore ake inia kata, nebuaaki ꞉Peseto Paulo ajo, <<Paulo, imada! Kore inia kiteng'ena kitok niata naa ikintamadita.>>
25Kake nejoki ꞉Paulo, <<Peseto lkitok lai oayanyiti, mamada, kake sipata ajoito nairorita rerei oning'unoi. 26Keata Lkinkii lomon ooipirita kuna baa pooki, naa kairorie ninye maata ngureticho, tankaraki naata sipata ajo meata ntoki natalang'a ninye too kuna pooki, amu eitu easi to lkutoto. 27Lkinkii lai Agiripa, amaa iruk iyie loibonok le Nkai? Kayielo ajo iruk.>>
28Nejoki ꞉Agiripa, <<Ijo dei iyie ikintaa nanu lobo oara le Kristo too kulo kuti rereii?>>
29Nejoki ꞉Paulo, <<Kore abaki tanaa keikuni tanaa sii keikumo, kaomon Nkai metaa mara iyie ake apeny oiruk, kake kayieu abaki payie etiuu kulo pooki laaning'ito nanu ana parri ana natiu nanu, mara ake payie meeni tana naena nanu.>>
30Neinyuototo inia kata ilo kinkii o ilo kitok o Bernise o lolo kulie pooki oowueni tenebo o ninche, nepuo. 31Kore payie epuo teinie, neimaki maate ana ejo pooki, <<Kore ele tung'ani naa eitu eas mbae torno naaichiaakino lkiye tanaa sii eanata.>> 32Nejoki ꞉Agiripa Peseto, <<Kore ele tung'ani naa keidimai duo payie elakuni tana eitu ejo keyieu nelo meing'unareki tekue Kaisari.>>
Iliyochaguliwa sasa
Asat 26: saq
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2021, Bible Translation and Literacy
