ARomo 2
2
Ga Mbori ruru sapangbanga
1Ako gu boro ka sapa ngbanga, ba ti birí ti ro te, bambiko gu pai mo nisapu ngbanga kura boro rogo, kina ro nakita ngbanga tiro rogo; bambiko gu pai mo nisapu ngbanga ha kina ha mo namanga. 2Ani ini aina ya ga Mbori sapangbanga du sangba rengo yo kuti agu aboro namanga tunga agu apai re. 3Ako gu boro nasapa ngbanga agu aboro namanga tunga agu apai re, ki nimangi wo, ya mo tigamo, mo amerft amerã be ga Mbori sapangbanga? 4Mo gberẽ na gu ũkumuko nga ga gako weneringise na zera na hipai, wa mo aina nga ga Mbori weneringise nangbe foro mbata yo sa saberã ya? 5Ono mo nadungura zinga kuti ro ku rago zinga na rago yugo ga Mbori ruru sapangbanga ku sangba nyanyaki riro yo na ngbaduro zanga saberã. 6Ko nikaringbisa ahe fu aboro dũ kuti gayo mangaapai. 7Mbori afú nyenye unga fu agu yo nagbata taarimo na irisa na zangazirã be zeresa ngbaduse namanga gu pai ngba angba. 8Ono ko afú zinga na era fu agu yo namanga gbarakagbaraka, agia nga sangba rengo ya, nigi kina sangba irairapai. 9Rungosi na nunga, ku ri agu yo dũ namanga gbegberẽ, fu aYudo mbata na aGiriki a. 10Ono taarimo na irisa na zereda fu agu yo du namanga wenengaĩ, fu aYudo mbata, na fu aGiriki a. 11Bambiko aboro bangiri Mbori sa.
12Bambiko agu yo zanga ina rugute mangi gbegberẽpai i akpi zanga rugute a; agu yo tii rugute mangi gbegberẽpai kuti rugute i asapa ngbanga yo asapa ku sangba rugute yo. 13Bambiko agu yo nagia rugute agia i nga ruru aboro bangiri Mbori te, kina agu yo namanga sangba rugute i ka i di pai ri yo. 14Ni gu rago zanga aGendiria rugute i namanga agu apai amanga nga ga rugute rogo sinoyo yo, agi yo zanga rugute re, i nga rugute fu tiyo; 15wa i nayugo gu mangapase nga ga rugute du kpotoyo yo ni keke he. Sangba kpotoyo yo nga dezirehe, boro gayo aberã nakua ngbanga yo na watadu si naida gayo mangapai. 16Wo si nikadu ni gu rago Mbori ka sapa ngbanga ga aboro gbugbu apai, ku sangba gi wene pangbanga yo, rogo Yesu Kristo yo.
AYudo na rugute
17Ono si ngia rimo Yudo ti ro, nakida kuti rugute, ki niabia tiro ni rimo Mbori, 18ki ini gu pai ko akpi nyemu he, ki rugu tiro na agu apai ngba gbe, wiriki mo ti rugute, 19ki ini aina ni tiro ya mo nga ngbembatayo fu airavurari, nga imarago fu agu yo du bitimo yo, 20nga rugu airamungo, nga bayugupai fu fogo agude, du na kpia inahe na rengo rugute yo― 21si du wa mo niyugu pai ti ni fu kura boro, mo nayugo nga pai fu tiro te? Wa mo nitungusi pai fu boro ya ka ni dĩ nga he ya, mo nadĩ he? 22wa mo naya ka boro mangi nga bari na dia boro ya, mo namanga bari na dia boro? Wa mo nine kpiaahe, mo natuka he rogo abambu kpiaahe yo? 23Wa mo naabia tiro rogo rugute, mo agbarasa nga rimo Mbori mbiko ga tindika te? 24“Bambiko i nagberã ngbayo yo ti rimo Mbori dagba aGendiria mbiko ro,” wa du he ni keke he.
25Bambiko ka mo amanga sangba rugute, pai dũ adu ti yeratise ni rengo, ono ka mo ti ndika, ga yeratise si du nga ni yeratise te. 26Ka si du wa zangayeratise ka kuti sangba rugute, i ya nga ti gani zanga yeratise yeratise te? 27Gu zangayeratise nga ga sino, ka ni mangi rugute, mo vura du na keke he na yeratise niti ndika, ni sapu nga ngbanga ro te? 28Bambiko Yudo nga ni ti kina kpotoni te; na gu yeratise du ti kina kpoto, si nga yeratise te: 29ono Yudo nga ni kina kpotoni yo; yeratise nga kina ga kpoto yo, kina rogo Toro yo, keke he te; gani tambuahe nga ga boro te, kina ga Mbori.
Iliyochaguliwa sasa
ARomo 2: ZB1978
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Sainte Bible en Zande © Alliance Biblique Universelle, 1978.
