Amokedi 23
23
1Pauro ki ningana abororondo, ki ya, “Awirinami, mi adu ni ungare ni wene sangba kpotore yo barangba Mbori dati kina gi rago re.” 2Gbiamotumo, nangia Anania, ko ki ya fu agu yo naru pati ko i ta ko ti ngbako. 3Pauro ki ya fu ko tie; “Mbori ata ro, mo nga vurusivurusi pere bambu; mo nasunga ka sapa ngbanga re wa kina pa rugute, mo ki ya i ta re wa adu nga pa rugute ya?” 4Agu yo naru ho i ki ya, “Mo nakpakana ga Mbori gbiamotumo?” 5Pauro ki ya, “Awirinami, mi aina nga ya ko nga gbiamotumo te; bambiko si du ni keke he ya, ‘Ka mo gúmba nga gbegberẽ pai fu bazogo ngbatungaro ya.’”
6Ono ho Pauro abi he ni ya agu yo angia aSadoke, agu yo ki ngia aFarusi, ko ki poi ku ari dagba abororondo yo, ki ya, “Awirinami, Farusi nga mi, nga wiri Farusi. I nasapa ngbanga re tipa kina maabangirise ti zinga aboro be kpio.” 7Ho ko agumba ha ni were, darãpai ki du dagba aFarusi na aSadoke ni kangu; gbuuyo ki kpara. 8Bambiko aSadoke niya zingabekpio ho te, maraika a te, atoro ho a te. Ono aFarusi naida pa ha dũ. 9Gbarakagbaraka pai ki du dagba yo: agu abakeapai nadu na aFarusi i ki ru ku ari, ki ti kangu, niya, “Ani abi nga gbegberẽpai ti gi kumba te re. Wa ka toro agumba pai fu ko, na maraika, si ki du wãi?” 10Ho bakere darãpai adu ni dagba yo, bairarivura ki gunde ya Pauro ka kuadi be yo, ko ki ya fu abanzengere i zorõ ki di ko be yo ni ome, ki ye na ko ku gbata yo.
11Ni gu yuru kusa re, Gbia ki ru pati Pauro ki ya, “Mo ngárã; bambiko wa mo agumba pai tipa re Yerusarema yo, mo nikadu ni dezirere Roma yo a wo.”
Ta bura kuti Pauro
12Ho rago agiri ni aYudo ki kpamia tiyo ki zunga he niya, i ari nga riahe ki mbiri he wa sa te da kina ho i ka imo Pauro ni. 13I asusi 40 nga agu aboro nata gi bura re. 14I ki ye koyo du abairamotumo ni na ga aYudo abaakumba, ki ya, “Ani azunga he ni bakere zungahe, ya ka ani gí nga fuõ riahe te da kina ho ani ka imo Pauro ni. 15Were oni na abororondo oni sána bairarivura, ko zorõ na ko kono du oni ni wa ka oni kpi nyemu ka sana he ti gako pai wenengaĩ. Ani ki ima ru nguru ka imo ko mbata ko nikambeda kono.”
16Ono wiri dawiri Pauro agi pa gayo nguru, ko ki ye ki rimi ku gbata yo ki gumba ha fu Pauro. 17Pauro ki yambu barukuri aboro 100 koyo du ko ni, ki ya, “Mo ndú na gi paranga re koyo du bairarivura ni; bambiko pai dũ ngbako ko ka gumba ha fu ko.” 18Ko ki di ko ki ndu na ko koyo du bairarivura ni, ki ya, “Pauro nga kisikisi boro niyambu re koyo du ko ni, ki ya fere mi ye na gi paranga re kono du mo ni, ko du pai ngbako ka gumba ha foro.” 19Bairarivura ki zi beko, ki ndu ku sa yo, ki sana ko ni rondo, “Gini pai mo agumba ha fere?” 20Ko ki ya, “AYudo aidi gu pai dagba yo ka sana ro mo zorõ na Pauro fu abororondo gba, wa ka i nakpi nyemu ka sana he ti gako pai wenengaĩ. 21Were ka mo ídi nga ha fu yo wo ya; bambiko akumba naru nguru tipa ko, i susi 40, i azunga he ya i ari nga riahe ki mbiri he te, da kina ho i ka imo ko ni. I nasunguda furaro awere.” 22Were bairarivura ki he paranga ko ndu; ki rugu ko, ya, “Ka mo gúmba nga ha ya mo ayugu agi apai fere re fu boro wa sa ya.”
Pa ndu Pauro koyo du Ferika ni
23Bairarivura ki yambu abarukuri aboro 100 ue koyo du ko ni, ki ya “Oni mbákadi abanzengere 200, na aboro farasi 70, na aboro baso 200, i ndu da Kaisaria yo ti saa ribua nga ga yuru.” 24Ko ki ya “I fú anya Pauro sungu auru ra, i ki ye na ko wenengaĩ koyo du Ferika ni nga banyaki.” 25Ko ki ke waraga wa gere:
26“Kuraudio Rusia nasanango Ferika nga wene banyaki gbe. 27AYudo azi gi kumba re, ki niye ka imo ko, ho mi ayara ni koyo du yo ni na abanzengere, ki batasi ko be yo, wa mi agi he ya Romo nga ko. 28Mi ki zorõ na ko koyo du gayo abororondo ni, nikpi nyemu ka ina ndu gu pai i akiti ngbanga ko ti ni. 29Mi ki bi he ya i nakita ngbanga ko kuti pa gayo rugute, ono i akita nga ngbanga ko kuti gu pai rengbe na kpi ko na vo ko a te. 30Ho i ayugu he fere ni ya i nikaru nguru ti gi kumba re, mi ki kedi ko koyo du mo ni ni ba sa, ki ya fu agu yo nakita ngbanga ko a i gumba pai kuti ko barangba ro.”
31Were abanzengere ki di Pauro, wa i agumba ha fu yo, ki ye na ko yuru ku Andipaturi yo. 32Ono rago ki ya giri i ki he abanduri farasi i ndu na ko, i ki karaga tiyo ku gbata yo. 33Ho agu yo ada ni Kaisaria yo, ki fu keke waraga fu banyaki i ki moi Pauro barangba ko. 34Ho ko agedi he ni, ko ki sana he ya ko aye rogo gini ringara; ho ko aini he ni ya ko aye Kirikia yo, 35ko ki ya, “Mi agia ga pai ho agu aboro nakita ngbanga ro ka ye ni a”. Ko ki ya i banda ko ti ga Erode bambu ngbanga yo.
Iliyochaguliwa sasa
Amokedi 23: ZB1978
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Sainte Bible en Zande © Alliance Biblique Universelle, 1978.
