Amokedi 14
14
APauro na Barunaba Ikonio yo
1Pai ki da Ikonio yo ya i mongo rimi arima ku rogo ga aYudo ba mbutiria yo, i ki gumba pai bakere rimbasa aYudo ki idi he aida a na aGiriki. 2Ono agu aYudo nabasa ha i ki zingisi kpoto aGendiria yo, ki sa yo gbegberẽ kuti awirina. 3I ki ta ima aima koyo gbe nigumba pai agumba gbayaga mbiko Gbia nafu he ni dezire sa pa gako undahe, ki fu agu apai i aina pai ti ni na iiriwo apai i nimangi he ni beyo. 4Ono rimbasa aboro bakporo ki kparaka: agu yo ki ka kuti aYudo, agu yo ki du na amokedi. 5Ho aGendiria azingisi pai ni na aYudo a na abazogoyo i mangi yo amanga gbegberẽ, ki sopo yo na ambia. 6I ki ini he aina ki oro ku rogo agu abaakporo du Rukaonia yo, nangia Rusetura na Derube, na gu rago du yo kirikiri. 7I ki tungusi wene pangbanga yo.
Rimbasa akpi nyemu ka tumo fu amokedi Rusetura yo
8Kumba asungu Rusetura yo, adu nga na ome ti kpenduko ya, i avungu ko na gbarã, ko ata nga wa sa te. 9Gi ko agi pa Pauro re ko nigumba pai. Pauro ki dua bangiriko ti ko ki bi he ya ko du na idapase rengbe na husa ko, 10ko ki poi ku ari ya, “Mo gúari ku ari ni nduro.” Ko ki gu ku ari ki ta. 11Ho arimbasa abi gi pai ni re Pauro amangi, i ki poi ku ari niya rogo pa aboro Rukaonia, “Ambori azorõ kono du ani ni ni kpia aboro!” 12I ki yambu rimo Barunaba, nga Zeu: na Pauro nga Ereme, bambiko ko adu ni bagumbapai. 13Gu boromotumo nga ga Zeu, gako yekaru adu barangba bakporo, ko ki ye na ababagara na kãikãi akpe ku ngbadimo bakporo yo, wa ka ko tumo ho na arimbasa. 14Ono ho amokedi agi pa ha ni nga aBarunaba na Pauro, i ki siri gayo remu ki oro ku dagba rimbasa yo, nipoi ku ari, 15niya, “Aboro, oni mangi agi apai re tipagine? Ani nga aboro a, ringirani wa kina gaoni, ani ye na wene pangbanga fu roni, ya oni sa nga tironi ti agi apai du gbua re sa gu Mbori du ni ungako, nga gu ko namangi ngbangbaturũ na sende na baime, na ahe dunduko rogo yo. 16Ko ahe rika aboro ahe dunduko i peke kina gayo agene mbata ni agu arikayo nasusi. 17Wo si adu ono ko ahe nga dezireko te, wa ko animangi wene pai, ki fu mai fu roni ngbangbaturũ yo, na rago ida riahe gbe, ki hihisi kpotoroni yo ni riahe na ngbarago.” 18I ki za rimbasa ti tumo ni ahe fu yo ni agi apai re ono i mbedi ka manga wo.
19AYudo ki ye Andiokia yo na Ikonio yo ku ho; ho i asosodi rimbasa ni, i ki nisopo Pauro ni ambia ki nigbefe ko ti bakporo yo, niberẽ ya ko kpi. 20Ono wa abawiriki aru kirikiri pati ko ko ki guari ki rimi ku bakporo yo; rago ya giri i ki ndu na Barunaba ku Derube yo.
Maa abaakumba rogo akanisa dunduko
21Ho i atungusi wene pangbanga ni fu aboro gu bakporo re, ki sa dungu yo ni abawiriki, i ki karaga tiyo ku Rusetura yo, na ku Ikonio yo, a ku Andiokia yo, 22ki nyakasi mbisimo abawiriki, ki ngarasi yo i ka kuti idapase, ki ya, ani aríma arima ku rogo ga Mbori ngbi ti dungu gberãrago. 23Ho i amoi abaakumba ni fu yo rogo akanisa dũ, ki nikpari nigina riahe, i ki fu yo ku be Gbia, nga gu ko i aidi pa ko.
Karagatise ku Andiokia yo Suria yo
24I ki kuru Pisidia yo, ki ye ku Pamburia yo. 25Ho i agumba pai ni Peruga yo, i ki zorõ ku Ataria yo. 26I ki guari yo kurungba yo ki ndu ku Andiokia yo, yo i afu yo ni ku be ga Mbori undahe tipa gu sungei anyasi re. 27Hoi aye ni, ki dungura kanisa, i ki peke agu apai dunduko re Mbori amangi na yo, a wa ko aza gene ku rogo idapase fu aGendiria. 28I ki ima na abawiriki tipa gbanga rago.
Iliyochaguliwa sasa
Amokedi 14: ZB1978
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Sainte Bible en Zande © Alliance Biblique Universelle, 1978.
