Ekisodha 35
35
VI. SILELETELO NYA WUPHASI NYA MHAMBA
Sabhadho
(Ekisodha 20:8-12; Mitengo 15:32-41)
1Mosi na ranide tshangano watshavbo nya sanana sa Israyeli, a di va embela, khuye: “Magana Pfhumu Nungungulu a rumidego gukhuye ma landriswe khaya: 2#Wona gambe: Eks 20:8-11; 23:12; 31:15; 34:21; Levh 23:3; Dhet 5:12-14. Mu na thuma livbandre na limwedo matshigu, aholu eli nya livbandre na mavili li na bani liri litshigu li agidego vbakari gwanu, litshigu nya guhefemule gasi gu rungudza Pfhumu Nungungulu. Oyu a na thumago litshigu lolo, a na songwa. 3Gu nga khondriswi nilo mudzindrangani gwanu khu litshigu nya Sabhadho.”
Guresa miningelo nyumbani nya nombelo
(Ekisodha 25:1-9)
4Mosi a di embela gambe tshangano watshavbo nya sanana sa Israyeli, khuye: “Khayo aya Magana Pfhumu Nungungulu a rumidego khu gu ganela, khuye:” 5Mu na dzegani esi mu gu naso mu gira hwengo wa Pfhumu Nungungulu; muthu ni muthu a gu na ni monyo nya wuhindzi, khu gudzina gwaye, a nata bikela ga Pfhumu Nungungulu; ndralama, parata ni sugu; 6myendra nya wuzundzo nya livala nya nga la damboni, ni giwunguwungu ni guvbyuga ni seda ni mawoya nya phongo; 7malowo nya dzinvuta nya gupendrwe khu nyiwa nya gufuvile, ni malowo nya wuzundzo, ni mapulango nya sena; 8ni mafura nya gukhondrise khayo dzikandriya ni sinungedziso nya gugire khiso mafura nya gutodze ni libani nya gunungele gwadi; 9ni siwindri nya wuzundzo ni siwindri nya onikisi ni siwindri nya gute namegedza avbo nya efodhe, ni esi sa avba nya gikhweso gya vbakhanatunu.
Sombo sa wulangani nya guage
(Ekisodha 39:32-43)
10Vathu vatshavbo vbakari gwanu va gu na ni giningwa nya wumeseri, va nate va ta thuma esi Pfhumu Nungungulu a leletedego, a gu esi: 11Wulanga nya Guage ni Tshatsha waye, ni sipfhulelo sakone, masindra, sivbaregedzo, ni mapulango nya mitalatsi, madingo ni dzitshina; 12Ngasa ni mipingo yaye; gikhalo nya ditshedzo ni mwendra wu gi bhiyago; 13meza ni mipingo yaye, ni sombo satshavbo, ni sibaba nya ningelo; 14gidzigaredzo nya dzikandriya ni sombo saye satshavbo, dzikandriya, ni mafura nya dzikandriya; 15giluvelo nya libani ni mipingo yaye, mafura nya gutodze, libani nya gunungele gwadi, ni mwendra nya gusege mwanya nya makhuvi nya guage; 16giluvelo nya miphaso nya guvbiswe ni gihuto gyakone nya sugu, mipingo ni sombo saye satshavbo; ginamelo ni girandro gyaye; 17mwendra nya likupakupa ni madingo ni dzitshina, ni mwendra wa vbamwanyatunu nya likupakupa. 18Sikhongwane nya wulanga nya guage ni sipharegedzo saye, ni esi nya likupakupa ni dzingodzi dzakone. 19“Guambala nya thumo nya wuphasi nya Wulanga nya Guage, a gu guambala nya gukategiswe ga muphasi nya mhamba Aroni ni guambala ga sanana saye, gasi va thume kha nga vaphasi nya mhamba.”
20Khu guralo, tshangano watshavbo nya sanana sa Israyeli wu di khuga, wu tshiya Mosi wu hongola. 21Vathu vatshavbo nya myonyo nya yadi ni lihaladzo, na va tshulegide, va di hongola va yisa mihengo yawe ga Pfhumu Nungungulu, gasi yi ta thuma gu vbahisa Tshatsha nya Tshangano, ni mithumo yaye gumogo ni guambala nya guagiswe. 22Vama ni vanyamayi ni vatshavbo nya myonyo nya wuhindzi; va dita na va pharide masindra ni dziphera ni maniya, ni mafumbu yatshavbo nya simburiselo nya gugirwe khu ndralama; moyo ni moyo a di ta bikela ningelo waye nya ndralama owu a wu dongisedego gu ningela Pfhumu Nungungulu. 23Vathu vatshavbo va nga bani vari ni myendra nya wuzundzo nya livala nya nga la damboni, ni giwunguwungu, ni malowo nya phongo ni malowo nya dzinvuta nya gupendrwe khu nyiwa nya gufuvile, ni malowo nya wuzundzo, va di dzega va hongola naso. 24Vatshavbo vale va nga dzi kodzago gu henga khu parata mwendro sugu, va di si yisa ga Pfhumu Nungungulu. Vatshavbo va nga bani vari ni mapulango nya sena dzindrangani gwawe nya guningane guthumiswa vbathumotunu, va di hongola nawo. 25Vanyamayi vatshavbo va ningidwego gu kodza gu lugela, va di luga khu mandza yawe, va resa myendra nya wuzundzo nya livala nya nga la damboni, ni giwunguwungu ni gu vbyuga, ni seda. 26Vanyamayi vatshavbo va kodzago ni gu gola va di lugela mawoya nya phongo. 27Vathangeli va di yisa siwindri nya wuzundzo, Onikisi ni simbe ni simbe si vbwetegago gasi gu thedzedwa avbo nya efodhe ni avba nya gikhweso gya vbakhanatunu, 28ni sinungedziso ni mafura nya dzikandriya, ni mafura nya gutodze ni libani nya gunungele. 29Sanana satshavbo sa Israyeli, nya vama ni vanyamayi, va nga bani va gola khu myonyo yawe guhengela ga wevbi ni wevbi thumo owu Pfhumu Nungungulu, khu lito la Mosi, a nga khuye wu na thumwe, a di dzega miningelo yaye na tshulegide aya bikela ga Pfhumu Nungungulu.
Vameseri
(Ekisodha 31:1-11)
30Mosi a di embela sanana sa Israyeli, khuye: “Dzitini gukhenu Pfhumu Nungungulu hathide Bhezaleli, mwamana wa Uri, gyanana gya Huri, nya lihundzu la Judha, 31a mu tadzide khu Liphuvbo la Nungungulu, li mu ningidego guti, ni gugengela ni gu kodza mithumo ya mafumbu yatshavbo; 32a mu ningide wugengeli nya gusike mithumo a wuya a yi gira khu ndralama, parata ni sugu; 33ni gu koka siwindri nya wumburi, ni gu vata misimbo, ni gu gira mafumbu yatshavbo nya mithumo nya wumeseri. 34A mu ningide uye ni Awoliyabhi, mwamana wa Ayisamaki, nya lihundzu la Dhani, giningwa nya guhevbudze vambe thumo nya wumeseri. 35A va tadzide khu guti ni gugengela nya gukodze mithumo yatshavbo nya wumeseri, nya guvate ni gu luga myendra nya wuzundzo nya livala nya nga la damboni, ni giwunguwungu, ni guvbyuga ni linyu nya wumburi, gasi va kodza gu gira gwadi mithumo yatshavbo, ni mano nya gu tugule yimbe mithumo.
Iliyochaguliwa sasa
Ekisodha 35: BGE2014
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
A Bíblia em Gitonga © Bible Society in Mozambique, 2014.